ចិនសារភាពថា កំពុងផលិតនាវាផ្ទុកយន្តហោះចម្បាំងមួយទៀត
ក្រសួងការពារជាតិចិន បានប្រកាសនៅថ្ងៃព្រហស្បតិ៍ទី ៣១ ធ្នូ ថាចិនកំពុងតែកសាងនាវាផ្ទុកយន្តហោះចំបាំងមួយគ្រឿងទៀត។ ការផលិតនាវាផ្ទុកយន្តហោះចំបាំងរបស់ចិន ត្រូវបានគេមើលឃើញថា ជាសកម្មភាពត្រៀមលក្ខណៈ ដើម្បីកម្ញើញប្រទេសជិតខាង ដែលកំពុងតែមានជម្លោះក្នុងដែនសមុទ្រ ជាមួយនឹងចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
លោក យ៉ាង យូជុន អ្នកនាំពាក្យក្រសួងការពារចិន បានបញ្ជាក់ឲ្យដឹងក្នុងសន្និសីទកាសែតមួយថា ចិនកំពុងតែផលិតនាវាផ្ទុកយន្តហោះចម្បាំងទីពីរ មួយគ្រឿងទៀត។ សកម្មភាពសាងសង់ កំពុងធ្វើឡើង នៅកំពង់ផែក្រុងតាលាន ភាគឦសាន្តក្រុងប៉េកាំង។ យោងតាមប្រសាសន៍អ្នកនាំពាក្យចិនដដែល នាវាផ្ទុកយន្តហោះចម្បាំងនេះ គឺជាស្នាដៃផលិត ក្រោមបច្ចេកវិទ្យារបស់ចិនទាំងស្រុង ហើយវាដើរដោយប្រព័ន្ធរុញច្រានធម្មតា មិនមែនដើរដោយប្រព័ន្ធថាមពលនុយក្លេអ៊ែរទេ។ តួនាទីនាវានេះ គឺដើម្បីផ្ទុក និងជាកន្លែងចុះចតរបស់យន្តហោះចម្បាំងចិន ឈ្មោះ Shenyang J-15។
គួររំលឹកថា ចិនកំពុងតែពង្រឹងវិស័យកងទ័ព ជាពិសេសគឺក្នុងវិស័យកងទ័ពជើងទឹកតែម្តង។ អ្វីដែលចិនប៉ងប្រាថ្នា គឺចង់ប្រជែងជាមួយកងទ័ពជើងទឹកអាមេរិក ដែលបានតាំងទីនៅតាមប្រទេសមួយចំនួន ក្នុងតំបន់ប៉ាស៊ីហ្វិក។ ប្រាក់ចំនួនរាប់ពាន់លានដុល្លារ ត្រូវបានរដ្ឋាភិបាលចិនចំណាយឥតស្តាយ ដើម្បីពង្រីកសមត្ថភាពកងទ័ពជើងទឹករបស់ខ្លួន។
មហិច្ឆតាដ៏ធំរបស់ចិនមួយទៀត គឺដើម្បីសម្ញែងសាច់ដុំ ដាក់ប្រទេសក្នុងតំបន់ ដូចជាជប៉ុន ហ្វីលីពីន វៀតណាម និងម៉ាឡេស៊ីជាដើម ដែលកំពុងតែមានជម្លោះជាមួយចិន ក្នុងការដណ្តើមដែនកោះ និងដែនទឹកគ្នាកាន់កាប់ នៅក្នុងសមុទ្រចិនខាងត្បូង។
សូមបញ្ជាក់ថា នាវាផ្ទុកយន្តហោះចម្បាំងទីមួយរបស់ចិន ឈ្មោះ Liaoning តាមពិតជានាវាដែលបានផលិតនៅក្នុងជំនាន់អតីតសហភាពសូវៀត ប៉ុន្តែមិនទាន់បានរួចរាល់ ហើយត្រូវបោះបង់ចោល ដោយសារតែសហភាពសូវៀតរលំ។ ចិនបានទិញយកនាវានោះ ហើយបានជួលជុលកែសម្រួល និងដាក់ឲ្យប្រើប្រាស់ជាផ្លូវការនៅឆ្នាំ២០១២។ នាវាផ្ទុកយន្តហោះចម្បាំងទីពីរនេះ បានទទួលឥទ្ធិពលបច្ចេកវិទ្យាមួយផ្នែកធំ ពីនាវាទីមួយ។ ប្រជាជនចិន អ្នកជាតិនិយម កំពុងតែអបអរ សរសើរប្រទេសខ្លួនមិនដាច់ពីមាត់ថា ចិនពីជាអស្ចារ្យមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ