ចិនបណ្តេញអ្នកកាសែតជនជាតិបារាំងម្នាក់ ចេញពីប្រទេស
អ្នកឆ្លើយឆ្លងព័ត៌មានជនជាតិបារាំង ប្រចាំនៅក្រុងប៉េកាំងប្រទេសចិន ទើបបានទទួលដំណឹងពីអាជ្ញាធរចិន ប្រាប់ឲ្យចាកចេញពីទឹកដីចិន ចាប់ពីថ្ងៃទី៣១ធ្នូ ឆ្នាំ២០១៥នេះ ជាកំហិត។ នេះជាករណីទីមួយហើយ ដែលអ្នកកាសែតបរទេស ត្រូវបានអាជ្ញាធរចិន ធ្វើការបណ្តេញចេញបែបនេះ។ សេចក្តីសម្រេចនេះ បានបង្ហាញឲ្យកាន់តែច្បាស់ អំពីការប្រើប្រាស់អំណាចផ្តាច់ការ ពីសំណាក់រដ្ឋាភិបាលចិន ដែលចង់បំបិទមាត់អ្នកណាដែលហ៊ានសរសេរប្រឆាំង និងរិះគន់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
លោកស្រី Ursula Gauthier អ្នករាយការណ៍ព័ត៌មាន ជនជាតិបារាំង ប្រចាំនៅក្រុងប៉េកាំង បានទទួលទូរស័ព្ទពីក្រសួងការបរទេសចិន ដែលបញ្ជាក់ថា ទិដ្ឋាកាលោកស្រី នឹងមិនត្រូវបានពន្យាថ្មីទេ ហើយលោកស្រីត្រូវចាកចេញពីប្រទេសចិន នៅថ្ងៃទី ៣១ ធ្នូ ប៉ុន្មានថ្ងៃខាងមុខនេះ។ ការបណ្តេញអ្នកកាសែតរូបនេះចេញពីចិន គឺបានធ្វើឡើង បន្ទាប់ពីអ្នកកាសែតរូបនេះ បានសរសេរអត្ថបទមួយ រិះគន់ពីចំណាត់ការបោសសំអាតសហគមជនជាតិអ៊ុយហ្គួរ ដែលរដ្ឋអំណាចចិន បានប្រើធម៌ក្តៅ និងមិនគោរពទៅតាមគោលការណ៍សិទ្ធិមនុស្ស។
លោកស្រីបានអះអាងថា ក្រសួងការបរទេសចិន បានទាមទារឲ្យលោកស្រី ធ្វើការសុំទោសជាសាធារណៈ បើពំនោះទេ រដ្ឋអំណាចចិន នឹងមិនចេញប័ណ្ណអ្នកកាសែតថ្មីឲ្យលោកស្រីទេ។ ក្នុងន័យនេះ ទិដ្ឋាកាស្នាក់នៅក្នុងប្រទេសចិន នឹងត្រូវបញ្ចប់ ហើយលោកស្រីត្រូវបណ្តេញចេញពីចិន នៅពេលផុតកំណត់ ពោលគឺថ្ងៃទី ៣១ធ្នូ។ យ៉ាងណាក៏ដោយ លោកស្រី Ursula Gauthier ធ្លាប់បានបញ្ជាក់ប្រាប់ អាជ្ញាធរចិនហើយថា លោកស្រីមិនអាចធ្វើការសុំទោសជាសាធារណៈជាដាច់ខាត ព្រោះអ្វីដែលលោកស្រីបានសរសេរ វាគឺជាសេរីភាពនៃសារព័ត៌មាន ហើយជាតួនាទីរបស់អ្នកកាសែត គឺសរសេរនូវការពិត ជូនទៅដល់អ្នកអាន។
នេះជាលើកទីមួយហើយ ចាប់តាំងពីឆ្នាំ២០១២មក ដែលមានអ្នកកាសែតបរទេស ត្រូវរដ្ឋាភិបាលចិន បណ្តេញចេញបែបនេះ។ អត្ថបទដែលលោកស្រី Ursula Gauthier ហើយដែលធ្វើឲ្យរដ្ឋាភិបាលចិន ក្តៅស្លឹកត្រចៀកនោះ គឺមានចំណងជើងប្រែជាភាសាខ្មែរថា ចិនធ្វើជាចូលរួមសោកស្តាយជុំវិញរឿងភេរវកម្ម ព្រោះមានចេតនាកេងចំណេញ។
អត្ថបទនេះ មានខ្លឹមសារជាអាទិ៍ បរិយាយអំពីចេតនារបស់រដ្ឋាភិបាលចិន នៅពីក្រោយការចូលរួមថ្កោលទោសអំពើភេរវកម្មដែលបានកើតឡើង នៅទីក្រុងប៉ារីស កាលពីថ្ងៃទី ១៣ វិច្ឆិកា។ យោងតាមអត្ថបទ អ្នកកាសែត បានសរសេររិះគន់ ពីការកេងចំណេញនយោបាយ ដើម្បីបង្រ្កាបសកម្មជនជនជាតិអ៊ុយហ្គួរ ដែលតស៊ូរើបំរាស់ពីក្រញ៉ាំដែករបស់ចិន។ ចិនយកលេស ដែលពួកជនជាតិអ៊ុយហ្គួរ ដែលជាអ្នកកាន់សាសនាអ៊ីស្លាម លាបពណ៌ថាពួកគេគឺជាក្រុមភេរវកម្ម ហើយបង្ករអសន្តិសុខនៅចិន។ បន្ទាប់ពីអត្ថបទនេះបោះផ្សាយ ចិនបានប្រើប្រាស់ ប្រព័ន្ធផ្សព្វផ្សាយរដ្ឋ ធ្វើការរិះគន់ ជេរប្រមាថតបទៅអ្នកកាសែតរូបនេះ ថាបាននិយាយបង្ខូចកិត្តិយសរដ្ឋាភិបាលចិន។
យោងតាមប្រសាសន៍លោកស្រី ការបណ្តេញលោកស្រីចេញពីចិន វាបង្ហាញឲ្យកាន់តែច្បាស់ ពីការប្រើអំណាចផ្តាច់ការរបស់គណបក្សកុម្មុយនីស្តចិន ដែលដឹកនាំដោយ លោកស៊ី ជិនពីង។ ចិនកំពុងតែព្យាយាមបង្រ្កាបសហគមជនជាតិអ៊ុយហ្គួរ នៅខេត្តស៊ីនជាំង និងជនជាតិទីបេ នៅខេត្តទីបេផងដែរ។ ខេត្តទាំងពីរសំបូរធនធានរ៉ែមហាសាល ដែលចិនកំពុងតែស្រេកឃ្លាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ