ជប៉ុនថាចិនបញ្ជូននាវាប្រដាប់អាវុធចូលក្នុងតំបន់ប្រជុំកោះជាប់ជម្លោះ
ឆ្មាំសមុទ្ររបស់ជប៉ុនបានអះអាងនៅថ្ងៃពុធនេះថា នាវាល្បាតមួយគ្រឿងរបស់ចិន ដែលមានបំពាក់ទៅដោយគ្រឿងសព្វាវុធផង បានចូលទៅក្នុងដែនទឹក ក្នុងតំបន់ប្រជុំកោះសេនកាគូ ដែលកំពុងជាប់ជម្លោះ។ ចិនវិញបានឆ្លើយតបមកវិញថា នាវាល្បាតដែនសមុទ្រនេះស្ថិតនៅក្នុងដែនទឹករបស់ចិន ហើយមិនបានធ្វើខុសពីច្បាប់អន្តរជាតិនោះទេ។
ចុះផ្សាយនៅថ្ងៃ៖
នាវាល្បាតដែនសមុទ្ររបស់ចិនតែងតែធ្វើដំណើរជារឿយៗ ចូលទៅក្នុងដែនទឹក ជុំវិញប្រជុំកោះជាប់ជម្លោះ ដែលជប៉ុនហៅថា “សេនកាគូ” ហើយចិនហៅថា “ទៀវយូ”។ ក៏ប៉ុន្តែ បើយោងតាមមន្រ្តីអ្នកនាំពាក្យអង្គភាពឆ្មាំសមុទ្រជប៉ុន នេះគឺជាលើកទីមួយហើយ ដែលនាវាល្បាតដែនសមុទ្រនេះបំពាក់ទៅដោយគ្រឿងសព្វាវុធ។
មន្រ្តីអ្នកនាំពាក្យក្រសួងការបរទេសជប៉ុនវិញបានឲ្យដឹងថា រដ្ឋាភិបាលជប៉ុនបានធ្វើការតវ៉ាយ៉ាងខ្លាំងក្លាបំផុត ហើយទាមទារឲ្យនាវាល្បាតសមុទ្ររបស់ចិនបញ្ឈប់រាល់សកម្មភាពរបស់ខ្លួនក្បែរប្រជុំកោះសេនកាគូនេះជាបន្ទាន់ ហើយថា ជប៉ុននឹងបន្តប្រកាន់ជំហររឹងមាំ តែប្រកបដោយភាពអត់ធ្មត់ នៅក្នុងការការពារបូរណភាពដែនដីរបស់ខ្លួន ទាំងដែនគោក ដែនអាកាស និងដែនសមុទ្រ។
ឆ្លើយតបមកវិញ រដ្ឋាភិបាលក្រុងប៉េកាំងហាក់ដូចជាបានទទួលស្គាល់ថា នាវាល្បាតដែនសមុទ្ររបស់ខ្លួនពិតជាបានចូលទៅក្បែរប្រជុំកោះនេះមែន ក៏ប៉ុន្តែ បានអះអាងថា នាវាល្បាតនេះមិនបានធ្វើអ្វីដោយខុសច្បាប់នោះទេ ពីព្រោះថា ប្រជុំកោះនេះគឺជារបស់ចិនតាំងពីសម័យបុរាណមកម៉្លេះ។
លោកហុង ឡី មន្រ្តីអ្នកនាំពាក្យក្រសួងការបរទេសចិនក៏បានបញ្ជាក់ផងដែរថា គ្រឿងសព្វាវុធដែលបំពាក់លើនាវាល្បាតដែនសមុទ្រនេះ គឺជាគ្រឿងសព្វាវុធធម្មតា ដែលគេតែងតែមានប្រើជាទូទៅ ស្របទៅតាមទំនៀមទម្លាប់ជាអន្តរជាតិ។
គួរបញ្ជាក់ឡើងវិញថា ប្រជុំកោះសេនកាគូ ឬ ទៀវយូនេះ បច្ចុប្បន្ន ស្ថិតនៅក្រោមការគ្រប់គ្រងរបស់ជប៉ុន ក៏ប៉ុន្តែ ចិនតែងតែធ្វើការទាមទារយកមកវិញ ដោយអះអាងថា វាជាកម្មសិទ្ធិរបស់ចិន ហើយនៅក្នុងជម្លោះនេះ គេតែងតែសង្កេតឃើញ នាវាល្បាត ព្រមទាំងយន្តហោះចម្បាំង របស់ប្រទេសទាំងពីរ ត្រូវប្រឈមមុខដាក់គ្នាជារឿយៗ នៅក្នុងតំបន់ជាប់ជម្លោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ