អ្នកនយោបាយថៃម្នាក់ប្រឈមមុខនឹងទោស៥ឆ្នាំ ក្រោយរិះគន់មេទ័ពម្នាក់តាមហ្វេសប៊ុក
អ្នកនយោបាយថៃមកពីគណបក្សភឿថៃម្នាក់ កំពុងតែត្រូវតុលាការចោទប្រកាន់ និងអាចប្រឈមមុខនឹងទោសជាប់ពន្ធនាគា៥ឆ្នាំ បន្ទាប់ពីបានសរសេររិះគន់នៅលើទំព័រហ្វេសប៊ុក ទៅលើលោកមេទ័ពថៃ ឈ្មោះប្រាវីដ វង់ស៊ុវុន ថាបាននិយាយសម្តីបែបរើសអើងមើលងាយស្ត្រី។ លោក ប្រាវីដ វង់សុវណ្ណ ជាមនុស្សសំខាន់ទីពីរនៃរបបយោធាថៃ ហើយលោកមេទ័ពនេះ ធ្លាប់បាននិយាយថា ពួកទាហានចូលចិត្តថតរូបជាមួយលោកស្រីយីងឡាក់ ស៊ីណាវ៉ាត្រា អតីតៈនាយករដ្ឋមន្ត្រីថៃ ក៏ដោយសារតែលោកស្រីជាស្រីស្អាត មិនមែនមកពីគេស្រលាញ់គាំទ្រលោកស្រីទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
លោក វឌ្ឍនា មួងស៊ុក អ្នកនយោបាយដ៏សំខាន់ម្នាក់ នៃគណបក្សភឿថៃ របស់គ្រួសារលោកថាក់ស៊ីន កំពុងតែប្រឈមមុខនិងទោសជាប់ពន្ធនាគារ៥ឆ្នាំ ដោយសារតែសំណេរមួយឃ្លាដែលលោកបានសរសេរលើទំព័រហ្វេសប៊ុករបស់លោក។ លោក វឌ្ឍនា មួងស៊ុក បានសរសេរថា៖ “វាជារឿងមិនគួរឲ្យជឿសោះ ដែលមេដឹកនាំយោធាកំពូលមួយរូបរបស់ប្រទេស ហ៊ានពោលពាក្យបែបនេះ។ នេះគឺជាសម្តីពេបជ្រាយ រើសអើង និងមើលងាយលើមនុស្សស្រី”។
ឃ្លារិះគន់ របស់លោក វឌ្ឍនា មួងស៊ុក គឺបានសំដៅទៅដោយផ្ទាល់លើសម្តីរបស់លោក ប្រាវីដ វង់សុវណ្ណ អគ្គមេបញ្ជាការកងទ័ពថៃ ដែលបាននិយាយកាលពីពេលថ្មីៗនេះថា ៖ “ពួកទាហានថៃ នៅតែចូលចិត្តថតរូបលោកស្រីយីងឡាក់ ស៊ីណាវ៉ាត្រា មិនមែនមកពីគេគាំទ្រលោកស្រីទេ គឺមកពីលោកស្រីមានសម្រស់ស្អាត តែប៉ុណ្ណោះ”។
ភ្លាមៗក្រោយពីបានសរសេររិះគន់លើសម្តីរើសអើងរបស់លោក ប្រមុខមេទ័ពថៃ ប្រាវីដ វង់សុវណ្ណ លោកវឌ្ឍនា មួងស៊ុក ដែលជាម្ចាស់ទំព័រហ្វេសប៊ុក ត្រូវបានក្រុមយោធា អញ្ជើញឲ្យចូលខ្លួន ទៅឆ្លើយបំភ្លឺ កាលពីថ្ងៃពុធ ហើយម៉ាស៊ីនកំព្យូទ័រ ព្រមទាំងឯកសារមួយចំនួនធំរបស់លោក ត្រូវបានក្រុមយោធាថៃ រឹបអូសយកទាំងអស់។ បន្ទាប់មកនៅថ្ងៃព្រហស្បតិ៍ទី ៣ មីនានេះ តុលាការឧក្រិដ្ឋប្រចាំភាគខាងត្បូងប្រទេសថៃ មានសម្រេចចោទប្រកាន់ជាផ្លូវការលើរូបលោក វឌ្ឍនា មួងស៊ុក ដោយយោងទៅលើបទឧក្រិដ្ឋតាមបណ្តាញព័ត៌មានវិទ្យា។ លោក វឌ្ឍនា មួងស៊ុក ត្រូវបានដោះលែងឲ្យនៅក្រៅឃុំ បន្ទាប់ពីបានបង់ប្រាក់ធានាចំនួន១លានបាត ដែលស្មើនឹង២៨០០ដុល្លារ។ ទោះបីជាយ៉ាងណា សាវនកាកាត់ទោស នៅមិនទាន់កំណត់បរិច្ឆេទនៅឡើយទេ។
លោកប្រាយុទ្ធ ចន្ទអូចា នាយករដ្ឋមន្ត្រីថៃ បានថ្លែងប្រាប់ទៅអ្នកកាសែតថា កុំចេះតែចុះផ្សាយថាពួកទាហាន បានចាប់ខ្លួនលោក វឌ្ឍនា មួងស៊ុក។ ក្រុមទាហានគ្រាន់តែបានអញ្ជើញលោកម្នាក់នេះមកសាកសួរព័ត៌មានតាមសម្រួលតែប៉ុណ្ណោះ។ លោក ប្រាយុទ្ធ ចន្ទអូចា បន្តថា៖បើសិនជាយើងមិនទៅរិះគន់គេ មានរឿងអីសុខៗ គេទៅរករឿងយើង?
សូមបញ្ជាក់ថា លោកប្រាយុទ្ធ ចន្ទអូចា និងលោកប្រាវីដ វង់សុវណ្ណនេះ គឺជាមនុស្សស្និតស្នាលនឹងគ្នាបំផុត។ មានព័ត៌មានលេចឮថា លោកប្រាវីដ វង់សុវណ្ណនេះហើយ ដែលជាមនុស្សមានឥទ្ធិពល និងជាអ្នកផ្តល់ប្រឹក្សាយោបល់ក្នុងកិច្ចការនយោបាយ ទៅឲ្យលោកប្រយុទ្ធ ចន្ទអូចា។ លោកប្រាយុទ្ធ ចន្ទអូចា ខ្លួនឯងក៏ធ្លាប់បាននិយាយសម្តីបែបមើលងាយមនុស្សស្រីផងដែរ ក្រោយហេតុការណ៍ឃាតុកម្មលើស្ត្រីអ្នកទេសចរណ៍ម្នាក់ ដោយលោកបានថ្លែងថា៖ ជនរងគ្រោះត្រូវគេរំលោភនឹងសម្លាប់ ដោយសារតែខ្លួនជាស្រីស្លៀកឈុតប៊ីគីនី ដើររហេតរហូតពេលយប់ព្រលប់ មិនប្រយត័្ន ទើបធ្វើឲ្យពួកឃាតុករអត់ទ្រាំមិនបាន។ ទោះបីជាយ៉ាងណា បទចោទប្រកាន់ទៅលើអ្នកនយោបាយមកពីគណបក្សភឿថៃ លោក វឌ្ឍនា មួងស៊ុក នាពេលនេះ គឺគ្រាន់តែជាលេសនយោបាយ ដើម្បីធ្វើការបំបិតមាត់ និងកំចាយសម្លេងប្រឆាំងរិះគន់ របស់ក្រុមពួកអាវក្រហមតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ