ទស្សនកិច្ចប្រធានាធិបតីបារាំងនៅឥណ្ឌាក្នុងក្របខណ្ឌនៃកិច្ចសន្យាធំៗ
ប្រធានាធិបតីបារាំង លោក François Hollande នឹងបំពេញទស្សនកិច្ចនៅប្រទសឥណ្ឌា នៅថ្ងៃព្រហស្បតិ៍សប្តាហ៍នេះ ក្នុងក្របខណ្ឌនៃកិច្ចសហប្រតិបត្តិការសេដ្ឋកិច្ចនិងពាណិជ្ជកម្មរវាងបារាំងនិងឥណ្ឌា។ ក្រុងប៉ារីស សង្ឃឹមនឹងអាចសំរេចបានឆាប់ៗ ជាមួយក្រុងញូវដេល្លី នូវកិច្ចសន្យាធំៗមួយចំនួន ទាក់ទងនឹងវិស័យគមនាគមន៏ ការលក់យន្តហោះចំបាំង Rafale របស់បារាំងទៅអោយឥណ្ឌា រឺក៏រោងចក្រនុយក្លេអ៊ែរ ជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
ប្រទេសឥណ្ឌាកំពុងរង់ចាំស្វាគមន៍ទស្សនកិច្ចរបស់ប្រធានាធិបតីបារាំង គឺលោក François Hollande ដែលនឹងទៅដល់ក្រុងញូវដេល្លី នៅថ្ងៃព្រហស្បតិ៍សប្តាហ៍នេះ។ ទស្សនកិច្ចរបស់ប្រធានាធិបតីបារាំង នឹងធ្វើឡើងក្នុងក្របខណ្ឌនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្ម រវាងបារាំងនិងឥណ្ឌា។
គេនឹងបានឃើញនូវដំណើរទស្សនកិច្ចដ៏អធិកអធមនេះ ជាមួយនឹងវត្តមានរបស់រដ្ឋមន្ត្រីបារាំងយ៉ាងហោចណាស់ក៍៥នាក់ដែរ។ ក្នុងនោះក៏មានប្រធានសហគ្រាសធំៗជាង៦០នាក់ផងដែរ មកពីក្រុមហ៊ុន Dassault, Thales, Veolia រឺក៏Areva ដែលនឹងទៅហែរហមលោក François Hollande។ សហគ្រាសទាំងនេះ ចង់បង្កើនល្បឿននៃទំនាក់ទំនងបានមួយកម្រិតទៀតជាមួយឥណ្ឌា។ ឥណ្ឌា ដែលជាធ្លាប់ស្ថិតនៅក្រោមអាណានិគមអង់គ្លេស អាចនឹងក្លាយជាប្រទេសមហាអំណាចទីបី ក្នុងពិភពលោក នាអំឡុងឆ្នាំ ២០៣០ ខាងមុខ។
ក្រុងប៉ារីស សង្ឃឹមនឹងអាចសំរេចបានឆាប់ៗជាមួយក្រុងញូវដេល្លី នូវកិច្ចសន្យាធំៗមួយចំនួន ទាក់ទងវិស័យគមនាគមន៏ ការលក់យន្តហោះចំបាំង Rafale របស់បារាំងទៅអោយឥណ្ឌា រឺក៏រោងចក្រនុយក្លេអ៊ែរ ជាដើម។ ប៉ុន្តែ គេមិនបានរំពឹងថានឹងមានការចុះហត្ថលេខាលើកិច្ចសន្យាទាំងអស់នេះ ក្នុងដំណើរទស្សនកិច្ចរបស់ប្រធានាធិបតីបារាំងនោះឡើយ។
បារាំងចង់សំរេចបាន នូវកិច្ចសន្យាលក់យន្តហោះចំបាំង Rafale ចំនួន១២៦គ្រឿង ទៅអោយទ័ពអាកាសឥណ្ឌា មុនដំណាច់ឆ្នាំ២០១៣នេះ។ កិច្ចសន្យាលក់នេះ នឹងអាចអោយបារាំងទទួលបានទឹកប្រាក់ប្រហែលជា ១២ពាន់លានដុល្លារ ជាជោគជ័យមួយសំរាប់វិស័យនាំចេញយន្តហោះចំបាំងបារាំង ទៅក្រៅប្រទេស។
លើផ្នែកនុយក្លេអ៊ែរស៊ីវិលវិញ ក្រុមហ៊ុនឧស្សាហកម្ម Areva បារាំង ចង់អោយមានការសាងសង់ម៉ាស៊ីនប្រតិករនុយក្លេអ៊ែរចំនួនពីរ នៅចៃតាពួរ ស្ថិតនៅភាគខាងត្បូងក្រុង Bombay។ ការពិភាក្សាកន្លងមកជាមួយឥណ្ឌាលើការសាងសង់នេះ ពុំទាន់សំរេចជាផ្លែផ្កានៅឡើយទេ ប៉ុន្តែឥណ្ឌាប្រាប់ថា កិច្ចពិភាក្សាមានការលូតលាស់ទៅមុខ។
ក្រៅពីការគាំទ្របេក្ខភាពរបស់ឥណ្ឌាអោយក្លាយជាសមាជិកអចិន្ត្រៃយ៍នៃអង្គការសហប្រជាជាតិ ក្រុងប៉ារីស ក៏បានគាំទ្រចង់អោយឥណ្ឌាមានសកម្មភាពនុយក្លេអ៊ែរផ្នែកស៊ីវិលផងដែរ។ គួររំលឹកថា ទ័ពឥណ្ឌាមានសក្តានុពលផ្នែកនុយក្លេអ៊ែរ ហើយប្រទេសឥណ្ឌាមិនបានចុះហត្ថលេខាលើសន្ធិសញ្ញាដែលហាមឃាត់ការរីកសាយអាវុធនុយក្លេអ៊េរនោះឡើយ។
ទន្ទឹមនេះដែរ ប្រធានាធិបតីបារាំងក៏នឹងលើកឡើងពីការបារម្ភរបស់ក្រុងប៉ារីស លើគោលជំហររបស់ឥណ្ឌាដែលតែងតែធ្វើខ្លួនជាអាជ្ញាកណ្តាល លើឆាកអន្តរជាតិ។
បញ្ហាសង្គមផ្សេងៗដែលទាក់ទងនឹងប្រទេសទាំងពីរ នឹងមិនត្រូវលើកមកពិភាក្សានៅក្នុងទស្សនកិច្ចរបស់លោក Hollande នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ