បាតុករសម្រុកចូលកាន់កាប់បានវិមានរដ្ឋាភិបាលថៃ
ចុះផ្សាយនៅថ្ងៃ៖
ស្តាប់ - ០៧:១៨
ក្រុមបាតុករអាវលឿងបានសម្រុកចូលបានសម្រេច វិមានរដ្ឋាភិបាល និងទីស្នាក់ការកណ្តាលប៉ូលិស នៅព្រឹកថ្ងៃអង្គារនេះ ដោយគ្មានការប្រឈមមុខហិង្សាដាក់គ្នារវាងបាតុករ និងអាជ្ញាធរ។ អ្វីជាការកត់សំគាល់ គឺប៉ូលិសជាអ្នករំកិលថ្មបេតុង និងលួសបន្លា ដើម្បីបើកផ្លូវឲ្យក្រុមបាតុករចូលកាប់កាប់វិមានរដ្ឋាភិបាល។ ក្រុមប្រឆាំងមានការភ្ញាក់ផ្អើលនឹងវិធានការបើកផ្លូវរបស់ប៉ូលិស នៅពេលដែលកាលពីថ្ងៃចន្ទម្សិលមិញ ប៉ូលិសទើបបានបាញ់ទឹក និងឧស្ម័នបង្ហូរទឹកភ្នែក បង្រ្កាបបាតុករ។ ចាប់តាំងពីមានបាតុកម្មហិង្សា មានមនុស្សបួននាក់បានស្លាប់ របួស នៅក្នុងបង្រ្កាប និងការប្រឈមមុខដាក់គ្នា រវាងក្រុមអាវក្រហម និងក្រុមអាវលឿងក្នុងទីក្រុងបាងកក។
ក្នុងពេលដែលបាតុករដណ្តើមចូលកាន់កាប់វិមានរដ្ឋាភិបាល លោកស្រី នាយករដ្ឋមន្រ្តី យីងឡាក់ ស៊ីណាវ៉ាតបានធ្វើដំណើរទៅហួហិន រួចហើយ ដើម្បីត្រៀមរៀបចំប្រារព្ធខួបចម្រើនព្រះជន្មរបស់ព្រះមហាក្សត្រថៃ។ គឺលោកស្រី យីងឡាក់ ដែលបានបញ្ជាឲ្យប៉ូលិសបើកផ្លូវឲ្យបាតុករអាចសម្រុកចូលក្នុងវិមានរដ្ឋាភិបាល និងទីស្នាក់ការប៉ូលិស។ ហេតុផលរបស់លោកស្រី គឺដើម្បីជៀសវាងការប្រឈមមុខហិង្សាជាមួយបាតុករ គឺជៀសវាងស្នាមដំបៅចាស់ ដែលថៃបានជួប កាលពីឆ្នាំ ២០១០ ដែលកាលណោះ រដ្ឋាភិបាលរបស់លោកអាភីស៊ីតបានប្រើកម្លាំងយោធា និងប៉ូលិសដើម្បីបង្រ្កាបបាតុករ ក្រុមអាវក្រហម រហូតធ្វើឲ្យមានអ្នកស្លាប់ ៩០នាក់ និងរបួសរាប់ពាន់នាក់ផ្សេងទៀត។ លោកស្រីយីងឡាក់ចង់បង្ហាញថា លោកស្រីធ្វើនយោបាយស្រទន់ ជាងក្រុមបក្សប្រឆាំង ដែលនៅពេលកាន់អំណាចបានប្រើកម្លាំងប៉ូលិសបង្រ្កាបលើបាតុករ។
មួយវិញទៀត ព្រឹត្តិការណ៍ចូលដណ្តើមកាន់កាប់វិមានរដ្ឋាភិបាល គឺមានដូចកាលពី៥ឆ្នាំមុន នៅពេលក្រុមអាវលឿង បានធ្វើបាតុកម្មប្រឆាំងនឹងរដ្ឋាភិបាល ដែលដឹកនាំដោយប្អូនថ្លៃរបស់លោកថាក់ស៊ីន។ នៅឆ្នាំ ២០០៨ ក្រុមអាវលឿងបានចូលកាន់កាប់វិមានរដ្ឋាភិបាល ដល់ទៅបីខែ។ រដ្ឋាភិបាលនៅសម័យនោះ បានសុខចិត្តប្តូរទីតាំង ទៅនៅព្រលានយន្តហោះ ដនមឿង (ក្នុងស្រុក) ប៉ុន្តែ នៅទីបំផុត ក្រុមបាតុករបានលើកគ្នា បន្តទៅអុកឡុក និងកាន់កាប់ព្រលានយន្តហោះ សុវណ្ណភូមិ និងដនមឿង។ ការប្រឈមមុខយ៉ាងហិង្សា រវាងក្រុមអាវលឿង និងអាវក្រហម ដែលគាំទ្ររដ្ឋាភិបាល នៅទីបំផុត បានទាក់ទាញឲ្យយោធា លូកដៃ រហូតដល់សម្រេចធ្វើឲ្យរដ្ឋាភិបាលស្និទនឹងលោកថាក់ស៊ីនត្រូវដួលរំលំ។
ក្រុមអាវលឿង ដែលស្និទនឹងរាជវាំង ចង់លេងស្នៀតបែបនេះទៀត ប៉ុន្តែ រហូតមកដល់ពេលនេះ ទាហាននៅមិនទាន់ចេញមុខ កាន់ជើងក្រុមអាវលឿងនៅឡើយទេ ដោយគ្រាន់តែចង់ធ្វើជាអន្តរការី ជួយដោះស្រាយភាគីជម្លោះប៉ុណ្ណោះ។ យោធាថៃ ដែលតាមរយៈមេបញ្ជាការកងទ័ពជើងគោកថៃ លោក ប្រាយុទ្ធ ចាន់អូចា បានបញ្ជាក់នៅថ្ងៃនេះ ទៅលោកស្រី យីងឡាក់ ថា កងទ័ពនឹងកោះប្រជុំបន្ទាន់ នៅក្រោយពិធីបុណ្យចម្រើនព្រះជន្មរបស់ព្រះមហាក្សត្រ ដើម្បីរកច្រកចេញ ឲ្យវិបត្តិនយោបាយដែលប្រទេសថៃកំពុងជួបនាពេលបច្ចុប្បន្ននេះ។
លោកស្រីនាយករដ្ឋមន្រ្តីថៃ ក៏សារភាពថា លោកស្រីមើលមិនឃើញច្រកចេញ ណាមួយ ដែលអនុវត្តទៅតាមច្បាប់ធម្មនុញ្ញថៃ បច្ចុប្បន្ន ផង និងដែលអាចបំពេញចិត្តរាល់ប្រជាជនថៃគ្រប់គ្នាផងនោះទេ។ កាលពីថ្ងៃម្សិលមិញ លោកស្រី នាយករដ្ឋមន្រ្តីបានប្រកាសថា លោកស្រីនឹងអាចលាលែងពីតំណែង និងរំលាយសភា ប្រសិនបើធ្វើដូច្នេះ នឹងធ្វើឲ្យសង្គមថៃបានជួបសន្តិភាព។
►សូមអាន៖ ថៃ៖ កិច្ចចរចាទទួលបរាជ័យ អំពើហិង្សាកំពុងបន្តយ៉ាងក្តៅគគុក
នៅក្រោមការចរចាជាមួយប្រមុខរដ្ឋាភិបាល លោកស៊ូថេប ថងស៊ូបាន មេដឹកនាំក្រុមប្រឆាំង ដែលពេលនេះ កំពុងប្រឈមនឹងដីកាចាប់ខ្លួនជាលើកទីពីរពីតុលាការក៏អះអាងដែរថា ការលាលែងពីអំណាច របស់លោកស្រីយីងឡាក់ និងការរំលាយសភា មិនគ្រប់គ្រាន់ដើម្បីបញ្ចប់បាតុកម្មលើកនេះទេ។ អ្វីដែលលោកស៊ូថេបចង់បាន គឺការបង្កើតក្រុមប្រឹក្សាប្រជាជនមួយដើម្បីធ្វើការកែទម្រង់ ប្រព័ន្ធនយោបាយថៃឲ្យបានស៊ីជម្រៅ។ លោកស៊ូថេប មិនបានបញ្ជាក់ឲ្យស៊ីលម្អិតពីកំណែទម្រង់នយោបាយយ៉ាងម៉េចទេ ប៉ុន្តែ គ្រាន់តែ នៅប៉ុន្មានថ្ងៃចុងក្រោយនេះ លោកស៊ូថេបបានទន្ទេញ ចង់ឲ្យទំហំព្រំដែននៃការបោះឆ្នោតរួមតូច នៅក្នុងនយោបាយថៃ។ ផ្ទុយទៅវិញ អំណាចដើម្បីកំណត់នយោបាយថៃត្រូវប្រគល់ទៅឲ្យរាជបល្ល័ង្ក។ តាមស្តាប់សំដីរបស់លោកស៊ូថេប គឺមិនខុសអី ពីការត្រលប់ទៅប្រគល់អំណាចឲ្យរាជវាំងឡើងវិញ និងដកហូតអំណាចចេញប្រជាជន ដែលបានចេះប្រើសិទ្ធិដើម្បីបោះឆ្នោតជ្រើសរើសគ្រួសាររបស់លោកថាក់ស៊ីនឲ្យដឹកនាំប្រទេសថៃ។
លោកស្រីយីងឡាក់វិញ បានបដិសេធមិនទទួលយកគំនិតរបស់មេក្រុមប្រឆាំង។ សម្រាប់លោកស្រី គឺវាខុសនឹងច្បាប់រដ្ឋធម្មនុញ្ញ។ នៅថ្ងៃនេះ ប្រមុខរដ្ឋាភិបាលថៃទើបបានបញ្ជាក់ដែរថា លោកស្រីបានចាត់តាំងរដ្ឋមន្រ្តីពីរូប ដើម្បីបង្កើតវេទិការប្រជាជន ដើម្បីដោះស្រាយវិបត្តិនយោបាយ ដែលនៅក្នុងនោះ នឹងមានការចូលរួមពីបញ្ញវន្ត អ្នកជំនាញច្បាប់ ផងដែរ។ ទិសដៅ គឺរកគន្លឹះ វិធីសាស្រ្តណាមួយ ដើម្បីជៀសវាងកុំឲ្យប្រទេសថៃ ជួបវិបត្តិនយោបាយ ទៅថ្ងៃមុខទៀត និងរក្សានយោបាយថៃក្នុងផ្លូវដើរលទ្ធិប្រជាធិបតេយ្យ។
ប្រជាធិបតេយ្យថៃកំពុងរងគ្រោះថ្នាក់
លោកស្រីនាយករដ្ឋមន្រ្តីថៃ ដែលយល់ឃើញថា ខ្លួនកំពុងតែឯកោ នៅក្នុងវិបត្តិលើកនេះ កំពុងចាត់តាំងរដ្ឋមន្រ្តីការបរទេសរបស់ខ្លួន ឲ្យពន្យល់ពីស្ថានភាពគ្រោះថ្នាក់នៃលទ្ធិប្រជាធិបតេយ្យ ក្នុងប្រទេសថៃ។ កាលពីថ្ងៃចន្ទ លោកស៊ូរ៉ាពង្ស ដែលជាឧបនាយករដ្ឋមន្រ្តី និងជារដ្ឋមន្រ្តីការបរទេសបាននិយាយប្រាប់ទៅអ្នកតំណាងទូត និងអង្គការសង្គមស៊ីវិល ដោយសង្ឃឹមថា វិបត្តិនយោបាយមានលក្ខណៈផ្ទៃក្នុងថៃពិតមែន ប៉ុន្តែ រដ្ឋាភិបាលថៃត្រូវការការគំាទ្រពីសហគមន៍អន្តរជាតិ ព្រោះថា គណបក្សភឿថៃ ដែលឈ្នះឆ្នោត និងដឹកនាំរដ្ឋាភិបាលបច្ចុប្បន្ន កំពុងជួបនឹងជោគវាសនាអាក្រក់ ដូចរដ្ឋាភិបាលមុនៗ ដែលស្និទនឹងលោកថាក់ស៊ីន និងដែលចេញពីការបោះឆ្នោតរបស់ប្រជាជន។
►សូមអាន៖ ថៃ៖ លទ្ធិប្រជាធិបតេយ្យថៃត្រូវមួយដំបងធ្ងន់
ប្រជាធិបតេយ្យថៃមិនមែនទើបតែជួបរងគ្រោះថ្នាក់នៅពេលនេះទេ។ ចាប់តាំងពីឆ្នាំ ១៩៣២មក ប្រទេសនេះបានជួបរដ្ឋប្រហារ ឬការប៉ុនប៉ងធ្វើរដ្ឋប្រហារទម្លាក់នាយករដ្ឋមន្រ្តីចេញពីការបោះឆ្នោត ដល់ទៅ ១៨លើក។ រដ្ឋប្រហារត្រូវគេឃើញកាន់តែញឹកនៅក្នុងរយៈពេល២០ឆ្នាំចុងក្រោយនេះ គឺនៅពេលដែលបក្សប្រជាធិបតេយ្យដែលមាននិន្នាការទៅរកព្រះរាជវាំង និងគាំទ្រដោយក្រុមអ្នកមាន យោធា មិនដែលបានជាប់ឆ្នោត ដើម្បីដឹកនាំប្រទេស។ នៅប៉ុន្មានឆ្នាំចុងក្រោយនេះ តាមរយៈការបោះឆ្នោតបែបប្រជាធិបតេយ្យ ប្រជាជនមកពីជនបទ និងអ្នកក្រីក្រ ដែលមានភាគច្រើន នៅក្នុងប្រទេសថៃ បានសំដែងមតិរបស់ខ្លួននៅក្នុងការបោះឆ្នោត ដើម្បីជ្រើសរើសមេដឹកនាំ ជាពិសេស លោកថាក់ស៊ីនដែលពួកគេវាយតម្លៃថា បានយល់ និងយកចិត្តទុកដាក់លើជីវភាពរបស់ពួកគេ។ គឺខុសពីមេដឹកនាំរបស់បក្សប្រជាធិបតេយ្យដែលប្រមូលផ្តុំតែទៅលើអ្នកទីក្រុង អ្នកមាន។
សង្គមថៃ បែកបាក់ ចំណែកលទ្ធិប្រជាធិបតេយ្យថៃក៏កំពុងរងការគំរាមកំហែង នៅពេលដែលមេក្រុមប្រឆាំងចង់ប្រគល់អំណាចទៅឲ្យព្រះរាជា ដោយដកហូតអំណាចចេញពីរដ្ឋាភិបាល ដែលចេញមកពីការបោះឆ្នោត។ ប្រទេសថៃ ពេលនេះ កំពុងធ្លាក់ចូលក្នុងជ្រោះវិបត្តិដែលមិនងាយនឹងរកច្រកចេញមួយបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ