ព្រះមហាក្សត្រថៃប្រកាសរំលាយរដ្ឋសភា និងកំណត់ថ្ងៃបោះឆ្នោតទី២កុម្ភៈ
នៅល្ងាចថ្ងៃចន្ទម្សិលមិញ ព្រះមហាក្សត្រថៃបានឡាយព្រះហស្ថលេខាលើព្រះរាជក្រឹត្យរំលាយរដ្ឋសភា ដែលស្នើដោយលោកស្រីនាយករដ្ឋមន្ត្រី យីងឡាក់ ស៊ីណាវ៉ាត់ហើយ។ ហើយព្រះអង្គក៏បានកំណត់ថ្ងៃ បោះឆ្នោតថ្មីនៅថ្ងៃទី២កុម្ភៈមុខនេះ។ ប៉ុន្តែ នេះនៅតែមិនអាចបញ្ជាក់អំពីការបញ្ចប់វិបត្តិនយោបាយផ្ទៃក្នុងរបស់ថៃឡើយ។ ក្រុមគណបក្សប្រឆាំងបានប្រកាសបន្តធ្វើសកម្មភាពរហូតដល់របបថាក់ស៊ីន លែងមានវត្តមានតែម្តង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣០
វិបត្តិនយោបាយផ្ទៃក្នុងរបស់ប្រទេសថៃកាន់តែធ្លាក់ចុះជ្រៅឡើងៗ បើទោះជាព្រះមហាក្សត្រថៃបានប្រកាសរំលាយរដ្ឋសភា ហើយកំណត់កាលបរិច្ឆេទនៃការបោះឆ្នោតថ្មីនៅថ្ងៃទី២កុម្ភៈខាងមុខនេះក៏ដោយ។ ការប្រកាសរបស់ព្រះមហាក្សត្រថៃ មិនបានធ្វើអោយការតវ៉ារបស់គណបក្សប្រឆាំងបញ្ចប់សកម្មភាពនោះឡើយ។ មេដឹកនាំការតវ៉ា លោកស៊ូថេប ថងស៊ូបាន ដែលជាអគ្គលេខាធិការគណបក្សប្រជាធិបតេយ្យរបស់លោកអាប់ភីស៊ីតនោះ បានប្រកាសថា ការតវ៉ារបស់ខ្លួននឹងត្រូវបន្ត រហូតដល់ប្រទេសថៃ គ្មានរបបលោកថាក់ស៊ីនទាំងស្រុង។
និយាយយ៉ាងដូច្នេះ គណបក្សប្រឆាំងក្នុងប្រទេសថៃថ្លែងថា ពួកគេនៅតែប្រឆាំងការបោះឆ្នោតសកលនៅពេលខាងមុខនោះដដែល គ្រាន់តែថា ពួកគេអនុញ្ញាតអោយមានការបោះឆ្នោតថ្មីក្នុងរយៈពេល៦០ថ្ងៃ ទៅតាមច្បាប់តែប៉ុណ្ណោះ ខណៈដែលប្រទេសថៃកំពុងជួបវិបត្តិនយោបាយ។
គួរបញ្ជាក់ថា ខណៈដែលថ្នាក់ដឹកនាំគណបក្សភឿថៃរបស់លោកស្រីយីងឡាក់ ស៊ីណាវ៉ាត់នៅតែមានជំនឿថា គណបក្សដែលគាំទ្រដោយប្រជាជនអាវក្រហមនេះ នឹងឈ្នះនៅក្នុងការបោះឆ្នោតក្នុងខែកុម្ភៈទៀតនោះ មេដឹកនាំគណបក្សប្រឆាំងបានទាមទារអោយលោកស្រីយីងឡាក់ និងគណៈរដ្ឋមន្ត្រីរបស់ខ្លួនចុះចេញពីតំណែងភ្លាម ហើយក្រុមគណបក្សប្រឆាំងនឹងបង្កើតអោយមានក្រុមប្រឹក្សាប្រជាជនមួយ ដើម្បីដឹកនាំប្រទេសនោះ។
លោកស៊ូថេបដែលកំពុងប្រឈមនឹងដីកាចាប់ខ្លួនពីបទផ្តួលរំលំរដ្ឋាភិបាលនោះ បានអំពាវនាវដល់អ្នកគាំទ្រ អោយនៅបន្តតវ៉ារយៈពេល៣ថ្ងៃទៀត។ ជាឱសានវាទថ្មីមួយទៀត ដែលគណបក្សប្រឆាំង បានដាក់អោយ លោកស្រីយីងឡាក់ និងមន្ត្រីរបស់ខ្លួនចុះចេញពីដំណែងក្នុងឋានៈជារដ្ឋាភិបាលចាំផ្ទះ មុននឹងមានការបោះឆ្នោតថ្មីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ