លោកស្រីយីងឡាក់ស្នើឲ្យរៀបចំបោះឆ្នោតមុនកាលកំណត់ ចំណែកតំណាងរាស្រ្តរបស់បក្សប្រឆំាងលាចុះពីតំណែង
នៅថ្ងៃច័ន្ទ ទី៩ ធ្នូនេះ ក្រុមបាតុករអាវលឿងកំពុងត្រៀមខ្លួនចុះផ្លូវធ្វើបាតុកម្មជាថ្មីក្នុងគោលដៅផ្តួលរំលំរដ្ឋាភិបាលរបស់លោកស្រីនាយករដ្ឋមន្រ្តីយីងឡាក់។ គម្រោងក្បួនបាតុកម្មជាថ្មីថ្ងៃនេះបានធ្វើឡើង បន្ទាប់ពីតំណាងរាស្រ្តទំាងអស់របស់គណបក្សប្រឆំាងបាននំាគ្នាលាចុះពីតំណែងកាលពីថ្ងៃអាទិត្យ ទី៨ ធ្នូ។ មួយវិញទៀត និងដើម្បីបិទបញ្ចប់វិបត្តិ លោកស្រីយីងឡាក់ក៏បានស្នើឲ្យមានការរៀបចំបោះឆ្នោតមុនកាលកំណត់ដែលនឹងអាចធ្វើឡើងនៅ ២ខែខាងមុខ។ តែក្រុមបាតុករបានផ្តល់ចម្លើយថា ពួកគេមិនពេញចិត្តនឹងសំណើនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ថ្ងៃចន្ទ ទី៩ ធ្នូនេះ ត្រូវបានមេដឹកនំាបាតុករ លោកស៊ូថេបចាត់ទុកជាថ្ងៃផ្តាច់ព្រ័ត្រក្នុងការរំលំរដ្ឋាភិបាលរបស់លោកស្រីនាយករដ្ឋមន្រ្តីយីងឡាក់។ ទន្ទឹមគ្នានោះ ក្រុមបាតុករក៏បានប្តេជ្ញាចិត្តរួចហើយថា ក្រៅពីការផ្តួលរំលំលោកស្រីយីងឡាក់ ពួកគេមានបំណងចង់កំចាត់ឲ្យដល់ឫសគល់តែម្តងនូវប្រព័ន្ធនយោបាយលោកថាក់ស៊ីន។ លោកថាក់ស៊ីនដែលជាបងប្រុសរបស់លោកស្រីយីងឡាក់ និងជានាយករដ្ឋមន្រ្តីធ្លាក់ពីអំណាចដោយរដ្ឋប្រហារយោធាក្នុងឆ្នំា ២០០៦។ ទោះបីជាលោកថាក់ស៊ីនកំពុងភៀសខ្លួនរស់នៅបរទេសក៏ដោយ ក៏ក្រុមបាតុករអាវលឿងនៅតែមានអារម្មណ៍ថា ស្រមោលរបស់លោកថាក់ស៊ីននៅតែបន្តវិលវល់ក្នុងនយោបាយថៃជានិច្ច។
គេនៅមិនទាន់ដឹងទេថា តើនឹងមានបាតុករប៉ុន្មាននាក់ចូលរួម និងថា តើអ្វីទៅ ជាយុទ្ធសាស្រ្តថ្មីរបស់ពួកគេនៅក្នុងក្បួនបាតុកម្មថ្ងៃនេះនោះ។ អ្វីដែលគេដឹងនោះគឺថា គម្រោងបាតុកម្មថ្ងៃនេះត្រូវបានរៀបចំឡើង បន្ទាប់ពីតំណាងរាស្រ្តចំនួន ១៥៣នាក់របស់គណបក្សប្រឆំាង គឺគណបក្សប្រជាធិបតេយ្យបានប្រកាសលាលែងពីមុខតំណែងកាលពីថ្ងៃអាទិត្យ ទី៨ ធ្នូ។ ការប្រកាសលាលែងពីតំណែងតំណាងរាស្រ្តរបស់បក្សប្រឆំាងត្រូវបានធ្វើឡើង នៅក្រោយការប្រកាសរបស់លោកស្រីនាយករដ្ឋមន្រ្តីដែលបានស្នើឲ្យមានការរៀបចំបោះឆ្នោតសភាមុនកាលកំណត់។
ថ្លែងទៅកាន់ប្រជារាស្រ្តតាមកញ្ចក់ទូរទស្សន៍ លោកស្រីយីងឡាក់បានបញ្ជាក់ថា ប្រសិនបើក្រុមគណបក្សប្រឆំាងយល់ព្រមគោរពតាមដំណើរការលទ្ធិប្រជាធិបតេយ្យ នោះរដ្ឋាភិបាលយល់ព្រមនឹងរំលាយសភា ប្រសិនបើមតិភាគច្រើនយល់ព្រម និងថា ការបោះឆ្នោតអាចនឹងរៀបចំឡើងនៅ ៦០ថ្ងៃខាងមុខ។ ទន្ទឹមគ្នានេះ លោកស្រីយីងឡាក់ក៏បានស្នើឲ្យមានការរៀបចំបោះឆ្នោតប្រជាមតិមួយទៀត ដោយមិនបានបញ្ជាក់លំអិតពីប្រធានបទច្បាស់លាស់ទេ។
យ៉ាងណាក៏ដោយ ក្រុមបាតុករបានផ្តល់ចម្លើយតបវិញថា ពួកគេមិនពេញចិត្តនឹងសំណើរបស់លោកស្រីយីងឡាក់ទេ។ តែលោកអាប់ភីស៊ីត ប្រធានគណបក្សប្រជាធិបតេយ្យដែលជាបក្សប្រឆំាងសំខាន់ជាងគេបានបង្ហើបឲ្យដឹងថា គណបក្សរបស់លោកអាចនឹងចូលរួមបោះឆ្នោតតាមសំណើរបស់លោកស្រីយីងឡាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ