ប្រទេសថៃនឹងរៀបចំការបោះឆ្នោតម្តងទៀត
គណៈកម្មធិការរៀបចំការបោះឆ្នោតថៃ បានប្រកាសកាលពីថ្ងៃអង្គារទី ១១កុម្ភៈ ថា ប្រទេសថៃនឹងរៀបចំការបោះឆ្នោតមួយទៀត នៅមណ្ឌលបោះឆ្នោតណា ដែលមិនបានបើកទ្វារ កាលពីអំឡុងបោះឆ្នោត នៅថ្ងៃទី ២ កុម្ភៈកន្លងទៅ។ យោងតាមអគ្គលេខាធិការនៃគណៈកម្មាធិការរៀបចំការបោះឆ្នោត ការបោះឆ្នោតលើកទីពីរ នឹងធ្វើឡើង នៅថ្ងៃទី ២៧មេសាខាងមុខ។
ចុះផ្សាយនៅថ្ងៃ៖
ស្តាប់ - ០១:៤០
គណៈកម្មាធិការរៀបចំការបោះឆ្នោតបានប្រកាសជាផ្លូវការ កំណត់យកថ្ងៃទី ២៧មេសាខាងមុខដើម្បីរៀបចំការបោះឆ្នោត នៅមណ្ឌលបោះឆ្នោតណា ដែលបានទទួលការរំខានពីក្រុមប្រឆាំង និងត្រូវបិទទ្វារកាលពីថ្ងៃទី ២កុម្ភៈកន្លងទៅ។ ដោយសារចលនារំខានពីក្រុមប្រឆាំងរដ្ឋាភិបាល ប្រជាជនថៃ រាប់លាននាក់មិនអាចចូលទៅបោះឆ្នោត។ ការិយាល័យបោះឆ្នោតប្រមាណ១០ភាគរយត្រូវបានបិទទ្វារ កាលពីថ្ងៃអាទិត្យ ដើមខែកុម្ភៈនេះ។
មួយវិញទៀត គណៈកម្មាធិការបោះឆ្នោតមិនទាន់សម្រេចចិត្តយ៉ាងណានៅហើយចំពោះមណ្ឌលបោះឆ្នោតជាង ២៨ ដែលគ្មានបេក្ខជនឈរឈ្មោះ ដោយសារតែការរារាំងរបស់ក្រុមប្រឆាំងមិនឲ្យបេក្ខជនចុះឈ្មោះ។
ប៉ុន្តែ សម្រាប់សមាជិកម្នាក់របស់គណៈកម្មាធិការរៀបចំការបោះឆ្នោត គឺលោកស៊ុមឆៃ ស្រីសុធិយ៉ាកន រដ្ឋាភិបាលថៃត្រូវពលីចោលការបោះឆ្នោតកន្លងមក និងត្រូវរៀបចំការបោះឆ្នោតថ្មីស្រឡាងមួយទៀត ដើម្បីអាចចាកចេញពីភាពច្របូកច្របល់បច្ចុប្បន្ននេះ។ តាមលោកស៊ុមឆៃ ប្រសិនបើស្ថានភាពនៃការប្រឆាំងមិនប្រែប្រួលទេ គេមិនអាចរៀបចំការបោះឆ្នោតថ្មី បានដោយជោគជ័យទេ ហើយគេនៅតែមិនអាចប្រមូលសំឡេងឲ្យបានគ្រប់គ្រាន់ដើម្បីបំពេញសភាឲ្យបាន៩៥ភាគរយ ដើម្បីបោះឆ្នោតជ្រើសតាំងរដ្ឋាភិបាល។ តាមរដ្ឋធម្មនុញ្ញថៃ ការបោះឆ្នោតទាំងអស់ ត្រូវធ្វើនៅថ្ងៃតែមួយ ដូច្នេះ ការបោះឆ្នោត ថ្មី ដោយកន្លែង នៅតាមមណ្ឌល ដែលមានបញ្ហា គឺជារឿងខុសច្បាប់។ លោកស៊ុមឆៃបានស្នើឲ្យរដ្ឋាភិបាលកំណត់យកថ្ងៃបោះឆ្នោតសកលថ្មី ដែលនឹងត្រូវមានការយល់ព្រមផងដែរ ពីព្រះមហាក្សត្រ។
រដ្ឋាភិបាលរបស់លោកស្រី យីងឡាក់វិញ បានធ្វើការបកស្រាយផ្ទុយពីនោះ ដោយសំណូមសុំឲ្យមានការបោះឆ្នោត តែនៅមណ្ឌលណា ដែលមានជួបបញ្ហា ប៉ុន្តែ មិនមែនការបោះឆ្នោត សកល នៅទូទាំងប្រទេសទេ។ តាមសមាជិករបស់គណៈកម្មាធិការរៀបចំការបោះឆ្នោតខាងលើ សេណារីយ៉ូរបស់រដ្ឋាភិបាលរឹតតែមិនអាចចេញបាន ដោយសារតែបក្សប្រឆាំងនៅតែជំទាស់នឹងការបោះឆ្នោត និងចង់ឲ្យប្រទេសដឹកនាំដោយក្រុមប្រឹក្សាប្រជាជន មួយដែលមិនមែនចេញមកពីការបោះឆ្នោត។ ក្រុមនេះ ដែលចេញមក ពីក្រុមបញ្ញាវន្ត និងអ្នកទីក្រុង បានទាមទារឲ្យលោកស្រីនាយករដ្ឋមន្រ្តីចុះចេញពីតំណែង។ ក្រុមប្រឆំាងចង់រំលាយអំណាចក្រុមគ្រួសារបក្សពួកនិយមរបស់គ្រួសារលោកថាក់ស៊ីន ដែលតាមពិតទទួលបានការគំាទ្រខ្លាំងពីប្រជាជននៅតាមជនបទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ