វិបត្តិនយោបាយថៃ ៖ ការបោះឆ្នោតមិនមែនជាការបញ្ចប់បញ្ហា?
ចុះផ្សាយនៅថ្ងៃ៖
ស្តាប់ - ០៤:៣៩
ការិយាល័យបោះឆ្នោតបានបិទទ្វារ តាមម៉ោងកំណត់ ទោះបីជាមានការរំខាន និងបិទខ្ទប់ការិយាល័យបោះឆ្នោតខ្លះក្នុងអំឡុងពេលបោះឆ្នោតក្តី។ ប្រជាជនថៃ ប្រមាណ៤៦លាននាក់ បានបំពេញកាតព្វកិច្ចជាពលរដ្ឋ ដោយបានទៅបោះឆ្នោត។ សភាពការណ៍ជាទូទៅមានលក្ខណៈស្ងប់ស្ងាត់ជាងកាលពីម្សិលមិញ។ ជាសរុបមានការិយាល័យប្រមាណ១០% ភាគច្រើននៅភាគខាងត្បូង និងក្រុងបាងកកត្រូវបានរំខាន ឬគ្មានដំណើរការ។ ប៉ុន្តែ ការបោះឆ្នោត ដែលគណបក្សប្រឆាំង បានធ្វើពហិការ ទំនងជាមិនអាចឈានដល់ការបើកសម័យប្រជុំសភាបានឡើយ ព្រោះគ្មានសមាជិកគ្រប់យ៉ាងហោច៩៥% តម្រូវដោយច្បាប់។
មានការរំខានតែដំណើរការបោះឆ្នោតថ្ងៃនេះប្រព្រឹត្តបានទៅដល់ទីបញ្ចប់ ការិយាល័យបោះឆ្នោតបានបិទទ្វារតាមម៉ោងកំណត់
ការិយាល័យបោះឆ្នោត បានបើកទ្វារ តាំងពីព្រលឹម លើកលែងតែការិយាល័យខ្លះដែលគ្មានសន្លឹកឆ្នោត ព្រោះត្រូវក្រុមបាតុករបិទខ្ទប់មជ្ឈមណ្ឌលចែកចាយសន្លឹកឆ្នោត។ ការបោះឆ្នោតមុនអាណត្តិដែលប្រមុខរដ្ឋាភិបាលថៃ លោកស្រី យីងឡាក់ស្នើឡើង ដើម្បីបិទបញ្ចប់វិបត្តិ តែមិនបានសម្រេច ព្រោះបក្សប្រឆាំងធ្វើពហិការមិនចូលរួមបោះឆ្នោតថ្ងៃនេះទេ។ នៅក្នុងចំណោមមណ្ឌលបោះឆ្នោត ទាំង៣៧៥ មានតែ៤២ ប៉ុណ្ណោះមិនអាចប្រព្រឹត្តទៅបាន។ ការិយាល័យនេះ ភាគច្រើនស្ថិត នៅទីក្រុងបាងកក ត្រង់ម្តុំដែលមានការប្រមូលផ្តុំធ្វើបាតុកម្មច្រើន មានជាអាទិ៍សង្កាត់ឡាក់ស៊ី និងនៅតំបន់ភាគខាងត្បូងប្រទេស ដែលទីតាំងយុទ្ធសាស្ត្ររបស់ក្រុមអ្នកប្រឆាំង។ អ្នកប្រឆាំងនៅភាគខាងត្បូងម្នាក់ ដែលបានស្លាប់ ក្នុងបំផ្ទុះគ្រាប់បែក ព្រឹកមិញនេះ គ្មានពាក់ព័ន្ធនឹងហិង្សានយោបាយទេ គឺជាភេរវកម្មរបស់ក្រុមអ៊ីស្លាមជ្រុលនិយមចង់ផ្តាច់ទឹកដី។ ជារឿងពីរដាច់ដោយឡែកពីគ្នា។
នៅព្រឹកថ្ងៃអាទិត្យនេះ ស្ថានភាពហាក់ដូចជាស្ងប់ស្ងាត់ជាងម្សិលមិញ។ ប្រជាជនថៃជាង៤៦លាននាក់ ត្រូវបានអញ្ជើញឱ្យទៅបោះឆ្នោត ដើម្បីជ្រើសរើសសមាជិកសភា ៥០០រូប។ ប៉ុន្តែ អាសនៈរាប់សិបកៅអី ទំនងជាងត្រូវនៅទំនេរ ព្រោះក្រុមបាតុករបានរារាំងតំណាងរាស្ត្រមិនទាំងឱ្យចុះឈ្មោះបានទាន់ពេលវេលា និងបានប្រមូលសម្ភារៈបោះឆ្នោតបាន។ សភាថៃ ក៏ទំនងមិនអាចបើកសម័យប្រជុំរបស់ខ្លួនបាន ព្រោះគ្មានតំណាងរាស្ត្រ គ្រប់ចំនួន៩៥% ទាមទារដោយច្បាប់។
សភាមិនអាចបើកប្រជុំបាន
នៅភាគខាងត្បូង គ្មានការបោះឆ្នោតសោះ ក្នុងមណ្ឌលចំនួន ២៨ ដោយហេតុតែការបិទខ្ទប់ពីសំណាក់ក្រុមប្រឆាំង។ គេបានគ្រោង និងកំណត់ពេលវេលាធ្វើការបោះឆ្នោតមួយភាគបន្ថែមតាមតំបន់អាក់ខាននេះ នៅថ្ងៃទី ២៣កុម្ភៈខាងមុខ។ ប៉ុន្តែដំណើរការអាចនឹងអូសបន្លាយ ជាច្រើនសប្តាហ៍ទៀត លើសពីការគ្រោងទុកនេះ។ យោងតាមសភាពការណ៍បែបនេះ សភាដែលទើបជាប់ឆ្នោតថ្មីនេះមិនអាចធ្វើអ្វីកើតទេ គ្មានសមាជិកគ្រប់គ្រាន់យ៉ាងតិច៩៥% ចូលរួម ការប្រជុំបង្កើតរដ្ឋាភិបាលក៏មិនអាចប្រព្រឹត្តទៅកើត។
គណៈកម្មាធិការរៀបចំការបោះឆ្នោតទៀតសោត ដឹងខ្លួនជាស្រេច ថានឹងមានពាក្យបណ្តឹង ឬការតវ៉ា ឬប្រើមធ្យោបាយប្តឹងតវ៉ានេះ ច្រើនកំពុងរង់ចាំ នៅថ្ងៃខាងមុខ។ ដូច្នេះគ្រោះថ្នាក់ដែលធំនិងធ្ងន់ធ្ងរខ្លាំង គឺប្រសិនបើមានការតវ៉ាខ្លាំង ការបោះឆ្នោតថ្ងៃទី ២កុម្ភៈនេះ អាចនឹងត្រូវប្រកាសលុបចោលទៅវិញ យ៉ាងខ្លី ដូចករណីបោះឆ្នោតឆ្នាំ២០០៦។ ឆ្នាំ២០០៦ ដែលជាចំណុចចាប់ផ្តើមនៃវិបត្តិនយោបាយថៃ រហូតមកទល់នឹងថ្ងៃនេះ ម៉ោងនេះ។ ក្នុងសម័យបោះឆ្នោត២០០៦ លោកថាក់ស៊ីន ស៊ីណាវ៉ាត់ ជាបងប្រុស និងដែលក្រុមប្រឆាំងចោទថាជាអ្នកនៅពីក្រោយខ្នង លោកស្រី នាយករដ្ឋមន្ត្រី យីងឡាក់ បានជាប់ឆ្នោត តែដោយមានការតវ៉ា គណៈកម្មការបានលុបចោល ការបោះឆ្នោតនោះ ភាពវឹកវរនយោបាយបានផ្ទុះឡើង យោធាក៏ចេញមុខធ្វើរដ្ឋប្រហារទម្លាក់លោកថាក់ស៊ីនទៅ។ ប្រទេសថៃធ្លាក់ក្នុងវិបត្តិតាំងពីពេលនោះមក។
៧ឆ្នាំក្រោយរដ្ឋប្រហារ និងក៏ព្រោះតែលោកចេះនាំប្អូនស្រី ឱ្យក្លាយជាតំណាងបង ឱ្យបានឡើងកាន់អំណាចជាថ្មី ឈ្មោះថាក់ស៊ីនស៊ីណាវ៉ាត់ឬប្រព័ន្ធថាក់ស៊ីន បានក្លាយជាគូប្រជែងរវាងថៃអភិរក្ស ថៃរាជានិយមមានព្រះមហាក្សត្រចាស់ជរាព្យាធិ និងថៃទំនើប សកលភាវូបនីកម្ម ដឹកនាំដោយអ្នកមានថ្មី ចង់ដឹកនាំប្រទេសប្រសិនបើបន្តយូរទៅទៀត ជំនួសរបបប្រជាធិបតេយ្យទៅជារបបដឹកនាំឯកបក្ស ប្រជាភិថុតិ ដ៏គ្រោះថ្នាក់បំផុតសម្រាប់រាជានិយម និងបិទខ្ទប់ រាល់សំណាងនៃការផ្សះផ្សាជាតិ ក្នុងសង្គមដែលមានបែងចែកជាងពេលណាៗទាំងអស់។ ការបោះឆ្នោតថ្ងៃនេះ បានត្រឹមបញ្ជាក់អំពីហានិភ័យនៃការបែងចែកនេះ និងរុញច្រានឱ្យកាន់តែមានភាពហិង្សាថែមតែទៀត ជាមិនខាន មិនមែនជាបិទបញ្ចប់បញ្ហាទេ។ ហើយសេណារីយោចុងក្រោយ គឺនឹងអាចមានរដ្ឋប្រហារយោធាទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ