ជនស៊ីវិលរាប់ពាន់នាក់រត់ភៀសខ្លួនពីការវាយប្រយុទ្ធគ្នានៅកាស្មៀរ
មនុស្សយ៉ាងតិច ៥នាក់ ត្រូវបាត់បង់ជីវិត នៅក្នុងការវាយប្រយុទ្ធគ្នា រវាងទាហានឥណ្ឌា និងប៉ាគីស្ថាន ដែលកើតមានឡើងតាំងពីថ្ងៃអាទិត្យ នៅក្នុងតំបន់ព្រំដែនជាប់ជម្លោះ នៅតំបន់កាស្មៀរ។ ការវាយប្រយុទ្ធគ្នាបានបន្តរហូតមកដល់ថ្ងៃអង្គារ ហើយស្ថិតក្នុងស្ថានភាពតានតឹងផ្នែកយោធានេះ ជនស៊ីវិលរាប់ពាន់នាក់បានបង្ខំចិត្តរត់ភៀសខ្លួនចោលផ្ទះសម្បែង។
ចុះផ្សាយនៅថ្ងៃ៖
ស្តាប់ - ០១:៤៥
ភាពតានតឹងនៅតំបន់កាស្មៀរ រវាងឥណ្ឌា និងប៉ាគីស្ថាន ដែលសុទ្ធតែជាមហាអំណាចនុយក្លេអ៊ែរ បានចាប់ផ្តើមរាលដាលខ្លាំង ចាប់តាំងពីសប្តាហ៍មុន នៅពេលដែលឆ្មាំព្រំដែនប្រទេសទាំងពីរបានបាញ់តបតគ្នា បណ្តាលឲ្យទាហានឥណ្ឌាម្នាក់ និងទាហានប៉ាគីស្ថាន ២នាក់ ត្រូវបាត់បង់ជីវិត។
ការវាយប្រយុទ្ធគ្នា ដែលរួមមានទាំងការប្រើកាំភ្លើងធំបាញ់ផ្លោងដាក់គ្នាទៅវិញទៅមកផងនោះ បានចាប់ផ្ទុះឡើងសាជាថ្មី នៅថ្ងៃអាទិត្យ និងថ្ងៃចន្ទ ហើយបន្តរហូតមកដល់ថ្ងៃអង្គារនេះ។
អាជ្ញាធរប៉ាគីស្ថានបានអះអាងថា ចាប់តាំងពីថ្ងៃអាទិត្យមក ការបាញ់ផ្លោងពីសំណាក់ទាហានឥណ្ឌាបានបណ្តាលឲ្យជនស៊ីវិលប៉ាគីស្ថាន ៤នាក់ ត្រូវបាត់បង់ជីវិត ដោយក្នុងនោះក៏មានក្មេងប្រុសជំទង់ម្នាក់ផងដែរ។ អាជ្ញាធរឥណ្ឌាវិញអះអាងថា មានទាហានរបស់ខ្លួនម្នាក់ត្រូវបាត់បង់ជីវិត ក្នុងការបាញ់ផ្លោងពីសំណាក់ប៉ាគីស្ថាន។
នៅក្នុងពេលដែលកងទ័ពទាំងពីរបន្តបាញ់ផ្លោងដាក់គ្នា និងចោទប្រកាន់គ្នាទៅវិញទៅមកថាជាអ្នកបាញ់មុន ជនស៊ីវិលរាប់ពាន់នាក់ ដែលរស់នៅជាប់នឹងព្រំដែនកាស្មៀរ ខាងទឹកដីស្ថិតក្រោមការកាន់កាប់របស់ឥណ្ឌា បាននាំគ្នារត់ភៀសខ្លួនចោលផ្ទះសម្បែង ដើម្បីគេចចេញពីសមរភូមិ ដែលកំពុងតែរាលដាលចេញពីទីតាំងយោធា ទៅដល់ទីតាំងរបស់ប្រជាជនស៊ីវិល។ អ្នកភូមិឥណ្ឌាម្នាក់បានប្រាប់ទីភ្នាក់ងារព័ត៌មានរ៉យទ័រថា គាត់បានសម្រេចរត់ភៀសខ្លួនពីភូមិ ក្រោយពីឃើញគ្រាប់ផ្លោងមួយគ្រាប់ត្រូវគេបាញ់ចូលក្នុងបរិវេណសាលារៀន ដែលស្ថិតនៅចម្ងាយជាង ៣គីឡូម៉ែត្រពីព្រំដែន។
សហរដ្ឋអាមេរិក ក្រៅពីបានសម្តែងការចូលរួមមរណទុក្ខដល់ជនរងគ្រោះ ក៏បានអំពាវនាវផងដែរឲ្យឥណ្ឌា និងប៉ាគីស្ថានដោះស្រាយជម្លោះតាមរយៈការចរចា។
គួរបញ្ជាក់ថា ភាពតានតឹងនៅកាស្មៀរនេះកើតឡើង តែប៉ុន្មានថ្ងៃប៉ុណ្ណោះ មុនពេលដែលលោកចន ឃែរី រដ្ឋមន្រ្តីការបរទេសអាមេរិកត្រូវធ្វើដំណើរទៅបំពេញទស្សនកិច្ច នៅក្នុងប្រទេសឥណ្ឌា ហើយលោកប្រធានាធិបតីអូបាម៉ា ក៏គ្រោងនឹងទៅបំពេញទស្សនកិច្ចនៅឥណ្ឌាដែរ នៅចុងខែនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ