ឥណ្ឌាលុបចោលជំនួបជាមួយប៉ាគីស្ថានដោយសារបញ្ហាចម្រូងចម្រាសនៅតំបន់កាស្មៀរ
រដ្ឋាភិបាលឥណ្ឌាបានប្រកាសឲ្យដឹង កាលពីថ្ងៃចន្ទម្សិលមិញថា ខ្លួននឹងលុបចោលជំនួបជាមួយរដ្ឋមន្រ្តីការបរទេសប៉ាគីស្ថាន ដែលគ្រោងធ្វើនៅសប្តាហ៍ក្រោយ ដោយសារតែប៉ាគីស្ថានបានបញ្ជូនមន្រ្តីរបស់ខ្លួនឲ្យទៅជួបជាមួយក្រុមឧទ្ទាមផ្តាច់ទឹកដី នៅតំបន់កាស្មៀរ ដែលឥណ្ឌាចាត់ទុកថាជាការជ្រៀតជ្រែកចូលក្នុងកិច្ចការផ្ទៃក្នុងរបស់ឥណ្ឌា។ ប៉ាគីស្ថានបានបញ្ចេញប្រតិកម្មតបមកវិញ ដោយចាត់ទុកសេចក្តីសម្រេចលុបចោលជំនួបនេះថាជាការជំហានថយក្រោយមួយ នៅក្នុងកិច្ចខិតខំប្រឹងប្រែងស្តារទំនាក់ទំនងឥណ្ឌា-ប៉ាគីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ជំនួបរវាងរដ្ឋមន្រ្តីការបរទេសឥណ្ឌា និងប៉ាគីស្ថាន ដែលគ្រោងធ្វើនៅសប្តាហ៍ក្រោយ ហើយដែលឥណ្ឌាទើបនឹងសម្រេចលុបចោលនេះ ត្រូវបានប្រមុខដឹកនាំប្រទេសទាំងពីរឯកភាពគ្នាបើកធ្វើ នៅក្នុងពេលដែលលោកនាយករដ្ឋមន្រ្តីប៉ាគីស្ថានណាវ៉ាហ្ស ស្ហារីហ្វ (Nawaz Sharif) ទៅចូលរួមក្នុងពិធីស្បថចូលកាន់តំណែងរបស់លោកណារិនដ្រា ម៉ូឌី កាលពីខែឧសភាកន្លងទៅ។ គោលដៅនៃជំនួបនេះ គឺជជែករកដំណោះស្រាយ ដើម្បីធ្វើយ៉ាងណាស្តារទំនាក់ទំនងនឹងគ្នាឡើងវិញ។
គួរបញ្ជាក់ថា ទំនាក់ទំនងរវាងឥណ្ឌា និងប៉ាគីស្ថានត្រូវបានកាត់ផ្តាច់ ក្រោយពីក្រុមភេរវជនមកពីប៉ាគីស្ថាន បើកការវាយប្រហារទៅលើទីក្រុងប៊ុមបៃ កាលពីឆ្នាំ២០០៨ ដែលបានបណ្តាលឲ្យមនុស្ស ១៦៦នាក់ត្រូវបាត់បង់ជីវិត។
ទំនាក់ទំនងនេះហាក់ដូចជាមានពន្លឺឡើងវិញ ក្រោយពីលោកណារិនដ្រា ម៉ូឌី អញ្ជើញលោកនាយករដ្ឋមន្រ្តីប៉ាគីស្ថានឲ្យមកចូលរួមក្នុងពិធីស្បថចូលកាន់តំណែង ដែលជារឿងដ៏គួរឲ្យភ្ញាក់ផ្អើលមួយ។ ក៏ប៉ុន្តែ បញ្ហាចម្រូងចម្រាសនៅតំបន់ជម្លោះកាស្មៀរ កំពុងតែធ្វើឲ្យពន្លឺនៃការស្តារទំនាក់ទំនងរវាងមហាអំណាចនុយក្លេអ៊ែរទាំងពីរកំពុងតែត្រូវស្រអាប់ទៅវិញ។
កាលពីសប្តាហ៍មុននេះ ជម្លោះពាក្យសម្តីគ្នាបានផ្ទុះឡើងម្តងហើយ នៅពេលដែលលោកម៉ូឌី បានធ្វើដំណើរទៅបំពេញទស្សនកិច្ចជាលើកទីមួយ នៅតំបន់កាស្មៀរ ហើយបានចោទប៉ាគីស្ថានថាជាអ្នកញាក់ខ្សែពីក្រោយក្រុមឧទ្ទាមផ្តាច់ទឹកដីនៅកាស្មៀរ ដើម្បីធ្វើសង្រ្គាមដោយប្រយោលជាមួយឥណ្ឌា។
ជំនួប រវាងមន្រ្តីប៉ាគីស្ថាន និងក្រុមឧទ្ទាមផ្តាច់ទឹកដីកាស្មៀរ គឺជារឿងចម្រូងចម្រាសថ្មីមួយទៀត។ កាលពីថ្ងៃចន្ទ រដ្ឋមន្រ្តីក្រសួងការបរទេសឥណ្ឌាបានព្រមានមន្រ្តីប៉ាគីស្ថានកុំឲ្យជួបជាមួយក្រុមឧទ្ទាមផ្តាច់ទឹកដីកាស្មៀរ ដោយលើកឡើងថា ប៉ាគីស្ថានត្រូវធ្វើការជ្រើសរើសមួយ ឬមួយជួបជជែកជាមួយឥណ្ឌា ឬមួយជួបជាមួយក្រុមឧទ្ទាមផ្តាច់ទឹកដីនៅកាស្មៀរ។ ឥណ្ឌាចាត់ទុកថា ការណ៍ដែលប៉ាគីស្ថានបញ្ជូនមន្រ្តីឲ្យទៅជួបជាមួយក្រុមឧទ្ទាមផ្តាច់ទឹកដីនៅកាស្មៀរនេះ គឺជាការជ្រៀតជ្រែកចូលក្នុងកិច្ចការផ្ទៃក្នុងឥណ្ឌា ដែលមិនអាចទទួលយកបាន។
ក៏ប៉ុន្តែ ប៉ាគីស្ថានបានពន្យល់ថា ជំនួបរវាងមន្រ្តីប៉ាគីស្ថាន និងក្រុមឧទ្ទាមផ្តាច់ទឹកដីនៅកាស្មៀរ គឺជាទម្លាប់ដែលប៉ាគីស្ថានតែងតែធ្វើតាំងពីដើមមក នៅរៀងរាល់មុនពេលមានកិច្ចចរចា រវាងប៉ាគីស្ថាន និងឥណ្ឌា ហើយថា ជំនួបជាមួយក្រុមឧទ្ទាមផ្តាច់ទឹកដីនេះ គឺធ្វើឡើង ក្នុងគោលដៅធ្វើយ៉ាងណាឲ្យការជជែកចរចាជាមួយឥណ្ឌា ស្តីពីបញ្ហាកាស្មៀរអាចធ្វើឡើងប្រកបដោយផ្លែផ្កា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ