តើប្រអប់ខ្មៅយន្តហោះ AirAsia អាចឲ្យគេដឹងពីព័ត៌មានអ្វីខ្លះ?
ចុះផ្សាយនៅថ្ងៃ៖
ស្តាប់ - ០៤:១២
ប្រអប់ខ្មៅយន្តហោះ AirAsia ដែលធ្លាក់ក្នុងសមុទ្រ កាលពីថ្ងៃទី២៨ធ្នូកន្លងទៅនោះ ត្រូវបានគេរកឃើញ និងស្រង់ចេញពីបាតសមុទ្រមកហើយ កាលពីថ្ងៃអង្គារ។ យោងតាមអ្នកជំនាញខាងអាកាសចរណ៍ ការរកឃើញប្រអប់ខ្មៅ គឺជាចំណុចរបត់ដ៏សំខាន់មួយ នៅក្នុងដំណើរការស៊ើបអង្កេតស្វែងរកការពិត ជុំវិញការធ្លាក់យន្តហោះ AirAsia។ តើតាមរយៈប្រអប់ខ្មៅដែលគេរកឃើញនេះ គេអាចដឹងអំពីទិន្នន័យអ្វីខ្លះ?
យន្តហោះធុន Airbus A320 របស់ក្រុមហ៊ុន AirAsia ជើងហោះហើរលេខ QZ8501 ផ្ទុកអ្នកដំណើរ ១៦២នាក់ បានធ្លាក់ កាលពីយប់ថ្ងៃអាទិត្យ ទី២៨ធ្នូ ឆ្នាំ២០១៤ នៅក្នុងពេលកំពុងហោះហើរ ពីឥណ្ឌូណេស៊ី ឆ្ពោះទៅកាន់សិង្ហបុរី។
រហូតមកទល់នឹងពេលនេះ អ្វីដែលគេអាចដឹងបាន គឺដឹងត្រឹមថា យន្តហោះនេះបានបាត់ពីរ៉ាដា នៅក្រោយពីបានហោះហើរចេញពីព្រលានយន្តហោះ Surabaya (ឥណ្ឌូណេស៊ី) បាន ៤០នាទី ហើយបាត់នៅត្រង់ទីតាំង ដែលមានអាកាសធាតុមិនល្អ។ នៅប្រមាណជា ៥នាទីមុនពេលបាត់ពីរ៉ាដា អ្នកបើកបរយន្តហោះ AirAsia បានទាក់ទងទៅអ្នកត្រួតពិនិត្យផ្លូវហោះហើរ ដើម្បីសុំហោះឡើងទៅដល់រយៈកម្ពស់ ១១គីឡូម៉ែត្រ ដើម្បីគេចចេញពីព្យុះ។ ក៏ប៉ុន្តែ ការស្នើសុំនេះមិនត្រូវបានអ្នកត្រួតពិនិត្យផ្លូវហោះហើរអនុញ្ញាតភ្លាមៗនោះទេ ដោយសារតែនៅពេលនោះ មានយន្តហោះផ្សេងទៀតកំពុងហោះហើរនៅក្នុងរយៈកម្ពស់នោះដែរ។
ប៉ុន្មាននាទីក្រោយមក អ្នកត្រួតពិនិត្យផ្លូវហោះហើរទាក់ទងទៅយន្តហោះ AirAsia សាជាថ្មីម្តងទៀត ដើម្បីអនុញ្ញាតឲ្យហោះឡើងតាមការស្នើសុំ ក៏ប៉ុន្តែ មិនមានការឆ្លើយតប ហើយបន្តិចក្រោយមក យន្តហោះ AirAsia ក៏បានបាត់ពីរ៉ាដា ដោយមិនមានការប្រកាសអាសន្នអ្វីទាំងអស់។
សាកសពអ្នកដំណើរ ព្រមទាំងបំណែកយន្តហោះ ដែលគេរកឃើញ និងស្រង់ចេញពីសមុទ្របញ្ជាក់ច្បាស់ថា យន្តហោះនេះបានធ្លាក់ចូលទៅក្នុងសមុទ្រ ក៏ប៉ុន្តែ សំណួរដែលគ្រប់គ្នាកំពុងតែចោទសួរនៅពេលនេះគឺតើមានអ្វីកើតឡើងចំពោះយន្តហោះ AirAsia ជើងហោះហើរ QZ8501 នៅយប់ថ្ងៃទី២៨ធ្នូនោះ? តើយន្តហោះនេះត្រូវធ្លាក់ដោយរបៀបណា និងដោយមកពីមូលហេតុអ្វី?
ជាការពិតថា ទិន្នន័យដែលបានពីអ្នកត្រួតពិនិត្យផ្លូវហោះហើរ ព្រមទាំងការសិក្សាលើបំណែកយន្តហោះអាចនឹងផ្តល់នូវព័ត៌មានសំខាន់ៗមួយចំនួន ក៏ប៉ុន្តែ គ្រប់អ្នកជំនាញខាងអាកាសចរណ៍ស៊ីវិលទាំងអស់សុទ្ធតែអះអាងថា មានតែប្រអប់ខ្មៅទេ ដែលជាចំណុចគន្លឹះ នៃដំណើរការស៊ើបអង្កេតលើការធ្លាក់យន្តហោះនេះ ពីព្រោះថា ប្រអប់ខ្មៅនេះអាចផ្តល់នូវព័ត៌មានគន្លឹះៗទាក់ទងនឹងការហោះហើររបស់យន្តហោះនៅមុន និងក្នុងអំឡុងពេលជួបគ្រោះថ្នាក់។
ប្រអប់ខ្មៅដែលតាមពិតមានពណ៌ទឹកក្រូច គឺស្ថិតនៅកន្ទុយយន្តហោះ ហើយត្រូវគេផលិតឡើងឲ្យអាចទ្រាំទ្រនឹងការប៉ះទង្គិច ការផ្ទុះ ឬឆេះបាន។ ប្រអប់ខ្មៅនេះមានចំនួនពីរ ហើយផ្ទុកនូវទិន្នន័យផ្សេងៗគ្នា។
ប្រអប់ខ្មៅទីមួយ ដែលអាជ្ញាធរឥណ្ឌូណេស៊ីបានស្រង់ចេញពីបាតសមុទ្រ កាលពីថ្ងៃចន្ទ គឺជាឧបករណ៍ថតទិន្នន័យទាក់ទងនឹងការហោះហើរ (Enregistreur de vol/Fligth Data Recorder)។ យោងតាមអ្នកជំនាញខាងអាកាសចរណ៍ស៊ីវិល ប្រអប់ខ្មៅនេះអាចផ្តល់នូវទិន្នន័យសំខាន់ៗយ៉ាងច្រើនទាក់ទងនឹងយន្តហោះ រាប់ចាប់តាំងពីល្បឿន រយៈកម្ពស់ អត្រានៃការហោះឡើង ឬហោះចុះ ទិសដៅហោះហើរ រហូតដល់ដំណើរការរបស់ម៉ាស៊ីន និងឧបករណ៍ផ្សេងៗទៀតរបស់យន្តហោះ នៅក្នុងពេលកំពុងជួបគ្រោះថ្នាក់។
ប្រអប់ខ្មៅទីពីរ ដែលគេស្រង់ចេញពីសមុទ្រ កាលពីថ្ងៃអង្គារ គឺជាឧបករណ៍ថតសំឡេងក្នុងបន្ទប់បើកបរ (Enregistreur phonique/Cockpit Voice Recorder)។ ប្រអប់ខ្មៅទីពីរនេះអាចថតសំឡេងបានរយៈពេល ២ម៉ោង ដូច្នេះ វាអាចឲ្យគេស្តាប់ដឹង អំពីអ្វីដែលកើតមានឡើង នៅក្នុង និងក្បែរបន្ទប់បើកបររបស់យន្តហោះ AirAsia ចាប់តាំងពីពេលហោះចេញពីឥណ្ឌូណេស៊ី រហូតដល់ពេលជួបគ្រោះថ្នាក់។ យោងតាមអ្នកជំនាញខាងអាកាសចរណ៍ ប្រអប់ខ្មៅនេះថតសំឡេងនូវគ្រប់ហេតុការណ៍ទាំងអស់ ដែលកើតមានឡើងនៅក្នុង ឬក្បែរបន្ទាប់អ្នកបើកបរ រាប់ចាប់តាំងពីការសន្ទនាគ្នារវាងអ្នកបើកបរនិងអ្នកបើកបរជំនួយ សំឡេងម៉ាស៊ីន សំឡេងសញ្ញាអាសន្នផ្តល់ដោយឧបករណ៍ក្នុងបន្ទប់បើកបរ ឬសំឡេងផ្ទុះណាមួយប្រសិនបើមាន។
ទិន្នន័យជាសំឡេង និងទិន្នន័យទាក់ទងនឹងការហោះហើររបស់យន្តហោះ ដែលបានពីប្រអប់ខ្មៅទាំងពីរនេះហើយ ដែលជាចំណុចគន្លឹះ ក្នុងការស៊ើបអង្កេត ដើម្បីស្វែងរកការពិតថា តើយន្តហោះ AirAsia ជើងហោះហើរ QZ8501 ត្រូវធ្លាក់ដោយរបៀបណា ហើយធ្លាក់ដោយមកពីមូលហេតុអ្វី។ ក៏ប៉ុន្តែ បើយោងតាមអ្នកជំនាញខាងការស៊ើបអង្កេតលើគ្រោះថ្នាក់យន្តហោះ គេមិនត្រូវដាក់ក្តីរំពឹងថា ប្រអប់ខ្មៅរបស់យន្តហោះ AirAsia នេះអាចនឹងផ្តល់នូវចម្លើយភ្លាមៗ ក្នុងរយៈពេលប៉ុន្មានថ្ងៃខាងមុខនេះទេ។ បើទោះបីជាគេរកឃើញប្រអប់ខ្មៅហើយក៏ដោយ ការស៊ើបអង្កេតលើករណីធ្លាក់យន្តហោះ AirAsia អាចនឹងត្រូវបន្តធ្វើជាច្រើនសប្តាហ៍ ឬជាច្រើនខែទៀត ទើបអាចឲ្យគេធ្វើការសន្និដ្ឋានបឋមលើករណីធ្លាក់យន្តហោះនេះ។ ចំណែកឯដំណើរការស៊ើបអង្កេតពេញលេញ អាចនឹងត្រូវចំណាយពេលយ៉ាងតិច ១ឆ្នាំ ទើបអាចចេញរបាយការណ៍ជាស្ថាពរចុងក្រោយមួយបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ