អ្នកជំនាញថាយន្តហោះ AirAsia ទំនងជាបានចុះចតលើទឹកមុននឹងត្រូវលិចទៅបាតសមុទ្រ
នៅក្នុងពេលដែលសាកសពអ្នកដំណើរ និងបំណែកយន្តហោះ AirAsia ត្រូវបានគេរកឃើញ និងស្រង់ចេញពីសមុទ្រជាបន្តបន្ទាប់ ហើយការស្វែងរកប្រអប់ខ្មៅកំពុងបន្តធ្វើ អ្នកជំនាញខាងអាកាសចរណ៍មួយចំនួនបានលើកឡើងថា អ្នកបើកបរយន្តហោះដែលបាត់នេះទំនងជាបានចុះចតដោយជោគជ័យលើផ្ទៃទឹក មុននឹងត្រូវលិចទៅក្នុងបាតសមុទ្រ។
ចុះផ្សាយនៅថ្ងៃ៖
ស្តាប់ - ០២:០៧
សេចក្តីសន្និដ្ឋានបឋមថា យន្តហោះ Airbus A320 របស់ក្រុមហ៊ុន AirAsia អាចចុះចតប្រកបដោយជោគជ័យលើផ្ទៃទឹកសមុទ្រ ត្រូវបានអ្នកជំនាញខាងអាកាសចរណ៍ធ្វើឡើង ដោយយោងទៅលើចំណុចសំខាន់ពីរ។
ទីមួយ គេសង្កេតឃើញថា យន្តហោះនេះមិនបានបញ្ជូនសញ្ញាអាសន្នសម្រាប់កំណត់ទីតាំងប្រអប់ខ្មៅ។ ជាទូទៅ ឧបករណ៍បញ្ជូនសញ្ញាអាសន្ន ដែលគេឲ្យឈ្មោះថា Emergency Locator Transmitter ត្រូវចាប់ផ្តើមមានដំណើរការភ្លាម នៅពេលណា ដែលយន្តហោះទទួលការប៉ះទង្គិចខ្លាំង ដូចជាត្រូវធ្លាក់ ទោះជានៅលើដី ឬក៏នៅលើទឹក។ ការណ៍ដែលឧបករណ៍បញ្ជូនសញ្ញាអាសន្ន (ELT) របស់យន្តហោះ AirAisa មិនដំណើរការ មានន័យថា យន្តហោះនេះមិនបានធ្លាក់ ឬទទួលការប៉ះទង្គិចខ្លាំងណាមួយនោះទេ។
ចំណុចទីពីរ គេសង្កេតជារួមឃើញថា នៅក្នុងចំណោមសាកសពអ្នកដំណើរទាំង ៨ ដែលគេស្រង់ចេញពីទឹក សុទ្ធតែនៅទាំងមូល ដោយគ្មានការបាក់បែក ដូចករណីផ្ទុះ ឬធ្លាក់យន្តហោះ ដែលគេធ្លាប់សង្កេតឃើញជាទូទៅនោះទេ។ ម្យ៉ាងវិញទៀត នៅក្នុងចំណោមបំណែកយន្តហោះ ដែលគេរកឃើញមុនគេ គឺរួមមានទ្វារ និងពោងសម្រាប់ជន្លៀសអ្នកដំណើរក្នុងករណីអាសន្ន។
ទាំងនេះធ្វើឲ្យគេធ្វើការសន្និដ្ឋានថា អ្នកបើកបរយន្តហោះ ដែលជាអតីតអ្នកបើកយន្តហោះចម្បាំងដែលមានបទពិសោធន៍មួយរូបនោះ ទំនងជាបានធ្វើការចុះចតយន្តហោះដោយបន្ទាន់និងប្រកបដោយជោគជ័យ នៅលើផ្ទៃទឹក។ ក៏ប៉ុន្តែ រលកសមុទ្រធំៗ ដែលបង្កឡើងដោយព្យុះ បានបោកពន្លិចយន្តហោះទៅក្នុងបាតសមុទ្រ មុនពេលដែលគេអាចជន្លៀសអ្នកដំណើរចេញទាន់។
គួរបញ្ជាក់ថា កាលពីឆ្នាំ២០០៩ យន្តហោះធុន Airbus A320 ដូចគ្នានេះក៏ធ្លាប់បានចុះចតលើទឹកប្រកបដោយជោគជ័យម្តងដែរ គឺនៅទន្លេ Hudson ក្រុងញូវយ៉ក ដោយអ្នកដំណើរទាំងអស់ត្រូវបានគេជន្លៀសចេញដោយសុវត្ថិភាព។
ទោះជាយ៉ាងណា គ្រប់អ្នកជំនាញទាំងអស់សុទ្ធតែនាំគ្នាបង្ហាញនូវភាពប្រយ័ត្នប្រយែងដោយលើកឡើងថា មានតែទិន្នន័យពីប្រអប់ខ្មៅយន្តហោះ និងការស៊ើបអង្កេតពេញលេញមួយទេ ដែលអាចឲ្យគេសន្និដ្ឋានបានពិតប្រាកដ អំពីអ្វីដែលបានកើតឡើង ចំពោះយន្តហោះ AirAsia នៅឥណ្ឌូណេស៊ីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ