ថៃចាប់ទូកនេសាទខុសច្បាប់ ព្រោះខ្លាចអឺរ៉ុបដាក់ទណ្ឌកម្ម
អស់រយៈពេលជាច្រើនខែមកហើយ ដែលរឿងអាស្រូវទូកនេសាទខុសច្បាប់ថៃ ត្រូវបានគេលាតត្រដាងពីគ្រប់មជ្ឈដ្ឋាន។ ទូកនេសាទ ទាំងនោះភាគច្រើន ប្រើកម្មករបរទេស ដែលត្រូវគេជួញដូរ លក់ពីទូកមួយ ទៅទូកមួយ ហើយត្រូវបានម្ចាស់ទូក វាយធ្វើបាប ឲ្យធ្វើការក្នុងលក្ខខណ្ឌដូចជាទាសករ។ បន្ទាន់ពីសហភាពអឺរ៉ុប បានព្រមានថា នឹងបិទទីផ្សារ លែងឲ្យថៃនាំផលិតផលសមុទ្រចូល បើសិនអាជ្ញាធរថៃ មិនព្រមចាត់វិធានការបញ្ឈប់អំពើទាំងនោះ ពេលនេះរដ្ឋាភិបាលថៃ បានចេញវិធានការ ហាមទូកដែលគ្មានលិខិតអនុញ្ញាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ចាប់តាំងពីថ្ងៃ ពុធទី ១ កក្កដា អាជ្ញាធរថៃ បានចេញសេចក្តីបញ្ជាក់ថា ទូកនេសាទទាំងអស់ ត្រូវតែមានលិខិតអនុញ្ញាត ទើបអាចចេញទូក ទៅនេសាទបាន។ ទូកណាដែលគ្មានលិខិតអនុញ្ញាត ហើយហ៊ានចេញនេសាទ នឹងត្រូវផាកពិន័យ្យជាប្រាក់ចំនួន ២៦០០អឺរ៉ូ ហើយម្ចាស់ទូក នឹងត្រូវជាប់គុកមួយឆ្នាំ។
គិតមកត្រឹមពេលនេះ ថៃបានធ្វើស្ថិតិ កត់ត្រាទូកនេសាទទាំងអស់ចំនួន ២ម៉ឺន១ពាន់ទូក ក្នុងចំណោមនោះ មានទូកចំនួន៧ពាន់ ដែលពុំមានកាន់លិខិតអនុញ្ញាត ត្រឹមត្រូវ។ ប្រធានសមាគមទូកនេសាទថៃ បានថ្លែងបន្ទោសថា មានទូកនេសាទប្រហែល ៥ពាន់គ្រឿង ដែលមិនបានទទួលលិខិតអនុញ្ញាត ដោយសារតែរដ្ឋថៃ បានដាក់លក្ខខណ្ឌខ្ពស់ពេក ព្រមទាំងមានសំណុំបែបបទរដ្ឋបាល ត្រូវបំពេញ យ៉ាងស្មុគស្មាញ ទៀតផង។
គួររំលឹកផងដែរថា ការដែលសុខៗ អាជ្ញាធរថៃមករិតបន្តឹង ការអនុវត្តន៍ច្បាប់ទៅលើទូកនេសាទបែបនេះ ក៏ដោយសារតែថៃខ្លាចការដាក់ទណ្ឌកម្មពីសំណាក់សហភាពអឺរ៉ុប។ តាមពិតទៅ អស់រយៈពេលជាច្រើនឆ្នាំមកហើយ ដែលអាជ្ញាធរថៃ ឱបដៃមើល ហើយមានទាំងមន្ត្រីខ្លះ ឃុបឃិតជាមួយឈ្មួញទុច្ចរិក ជួញដូរមនុស្សយកទៅលក់ នៅតាមទូកនេសាទ យ៉ាងកាក់កបទៀតផង។ កម្មករដែលភាគច្រើន ជាជនជាតិភូមា និងជនជាតិខ្មែរ សុទ្ធសឹងជាទុរគតជន ហើយធ្លាក់ខ្លួនក្លាយជាទាសករ តាមទូកនេសាទ ដោយមានករណីស្លាប់រាប់មិនអស់។
សហភាពអឺរ៉ុបបានចេញកាតលឿង ពិន័យ្យថៃ ថាបើរហូតដល់ខែតុលាឆ្នាំនេះ ថៃនៅតែមិនចាត់វិធានការ រៀបចំទូកនេសាទខ្លួនឲ្យមានលក្ខណៈត្រឹមត្រូវតាមច្បាប់ សហភាពអឺរ៉ុបនឹងបិទ លែងឲ្យថៃនាំផលិតផលសមុទ្រចូលទីផ្សារអឺរ៉ុប។ ផលិតផល ដែលមានភាគច្រើន ជាបង្គារ និងត្រីតុង គិតជាទឹកប្រាក់សម្រាប់ឆ្នាំ២០១៤ ស្មើរនឹង ៦៤២លានអឺរ៉ូ។
ទោះបីជាទីផ្សារអឺរ៉ុប មានត្រឹមតែ៥% នៃការនាំចេញផលិតផលសមុទ្ររបស់ថៃក៏ដោយ ក៏ការដាក់ទណ្ឌកម្មទៅលើថៃ អាចជះឥទ្ធិពល អាក្រក់ទៅលើមុខមាត់ និងទីផ្សារនាំចេញរបស់ថៃទាំងមូល ព្រោះថាប្រទេសដ៏ទៃ អាចនឹងនាំគ្នាដាក់សម្ពាធទៅលើថៃ ដូចដែលអឺរ៉ុបធ្វើ។ ថៃដែលឃោសនាប្រាប់ទេសចរណ៍ថា ខ្លួនជាដែនដីសុវណ្ណភូមិ រឺដែនដីនៃស្នាមញញឹម តែធាតុពិត ថៃជាដែនដីទឹកភ្នែករបស់កម្មករនេសាទខ្មែរ និងភូមា ទៅវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ