ថៃ៖របបសឹកហាមអង្គការក្រៅរដ្ឋាភិបាលមិនឲ្យបញ្ចេញរបាយការណ៍ស្តីពីសិទ្ធិមនុស្ស
នៅល្ងាចថ្ងៃព្រហស្បតិ៍ ទី៤ មិថុនា របបសឹកក្នុងប្រទេសថៃបានហាមមិនឲ្យអង្គការក្រៅរដ្ឋាភិបាលមួយចេញផ្សាយរបាយការណ៍ស្តីពីការរំលោភសិទ្ធិមនុស្ស។ តាមគម្រោង អង្គការក្រៅរដ្ឋាភិបាលត្រៀមនឹងចេញផ្សាយរបាយការណ៍មួយស្តីពីស្ថានភាពសិទ្ធិមនុស្សទូទៅនៅក្នុងប្រទេសថៃនារយៈពេល ១ឆ្នំានៃការកាន់អំណាចរបស់យោធា។ ទីក្រុងបាងកកបានលើកយកហេតុផលទៅពន្យល់ថា គឺដើម្បីចៀសវាងភាពច្របូកច្របល់នៅក្នុងសង្គម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
នៅក្នុងលិខិតមួយដែលប៉ូលិសថៃបានផ្ញើទៅកាន់ក្លិបអ្នកកាសែតបរទេសបានបញ្ជាក់ថា ការដែលរដ្ឋអំណាចថៃបានហាមមិនឲ្យអង្គការក្រៅរដ្ឋាភិបាលមួយចេញផ្សាយរបាយការណ៍ស្តីពីស្ថានភាពសិទ្ធិមនុស្សនៅក្នុងប្រទេសថៃ គឺក្នុងបំណងចៀសវាងកុំឲ្យជនខិលខូចខ្លះឆ្លៀតឆក់ឱកាសនោះដើម្បីបង្កភាពចលាចលក្នុងសង្គម។ សូមជម្រាបជូនថា គឺនៅយប់ថ្ងៃព្រហស្បតិ៍ ទី៤ មិថុនាដែលអង្គការនៃក្រុមមេធាវីថៃដើម្បីសិទ្ធិមនុស្សត្រូវចេញផ្សាយរបាយការណ៍មួយស្តីពីស្ថានភាពសិទ្ធិមនុស្សនៅក្នុងប្រទេសថៃនៃការកាន់អំណាចរបស់របបសឹកនារយៈពេល ១ឆ្នំាកន្លងទៅ។ ពេញមួយឆ្នំានៃការកាន់អំណាច របបសឹកបានប្រើគ្រប់មធ្យោបាយដើម្បីបំបិទមាត់ពួកប្រឆំាង ហើយអ្នកដែលព្យាយាមធ្វើបាតុកម្មត្រូវបានចាប់ខ្លួនភ្លាមៗ។
អ្នកនំាពាក្យរបស់របបសឹកបានលើកយកហេតុផលទៅពន្យល់ថា រដ្ឋាភិបាលមិនបារម្ភពីរបាយការណ៍របស់អង្គការក្រៅរដ្ឋាភិបាលនោះទេ តែចម្លើយបដិសេធរបស់រដ្ឋអំណាចមកពីអង្គការក្រៅរដ្ឋាភិបាលនោះមិនបានសុំការអនុញ្ញាតឲ្យបានត្រឹមត្រូវ។ គួររម្លឹកជូនថា នេះមិនមែនជាលើកទី១ ទេដែលរបបសឹកបានរារំាងមិនឲ្យអង្គការនៃក្រុមមេធាវីថៃដើម្បីសិទ្ធិមនុស្សចេញផ្សាយរបាយការណ៍ស្តីពីសិទ្ធិមនុស្សក្នុងប្រទេសថៃ។ កាលពីរបបសឹកកាន់អំណាចបាន ១០០ថ្ងៃ អង្គការមួយនេះក៏គ្រោងនឹងចេញផ្សាយរបាយការណ៍ដូចគ្នានេះម្តងហើយ តែត្រូវបានខកខានទៅវិញដោយសារតែទទួលគំនាបខ្លំាងពេកពីរដ្ឋអំណាច។
យោងតាមអង្គការក្រៅរដ្ឋាភិបាលក្នុងស្រុកមួយឈ្មោះ ilaw ឲ្យដឹងថា ពេញមួយឆ្នំានៃការកាន់អំណាចរបស់យោធា មានមនុស្ស ៧៥១នាក់ដែលភាគច្រើនជាពួកប្រឆំាងត្រូវបានរបបសឹកកោះហៅឲ្យចូលជួប និងមាន ១៦៦នាក់ត្រូវបានឃុំខ្លួនរយៈពេលខ្លី ឬវែងពីបទបានសម្តែងមតិនៅកន្លែងសាធារណៈ។ នៅប៉ុន្មានសប្តាហ៍ក្រោយរដ្ឋប្រហារយោធាក្នុងថ្ងៃទី២២ ឧសភា ឆ្នំា ២០១៤ មានមនុស្សជាច្រើន ក្នុងនោះមានមន្រ្តីបក្សប្រឆំាង សកម្មជនប្រឆំាង និងអ្នកប្រាជ្ញត្រូវបានរបបសឹកកោះហៅទៅណែនំាឲ្យកែប្រែឥរិយាបទ។
ក្រៅពីនោះ ចំណាត់ការតាមផ្លូវតុលាការពីបទប្រមាជព្រះមហាក្សត្រ ឬក្រុមគ្រួសាររាជវង្សក៏ត្រូវបានគុណទ្វេដងដែរក្នុងរយៈពេលនៃការកាន់អំណាចរបស់របបសឹក ១ឆ្នំាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ