ថៃ៖របបសឹកព្យាយាមស្តាមុខមាត់ប្រទេសលើឆាកអន្តរជាតិ ដោយសន្យាកំចាត់បណ្តាញជួញដូរមនុស្ស
នៅរសៀលថ្ងៃសុក្រ ទី៥ មិថុនា លោកឧត្តមសេនីយ នាយករដ្ឋមន្រ្តីថៃប្រាយុទ្ធ ចាន់អូចាបានសន្យាកំចាត់បណ្តាញរត់ពន្ធមនុស្សឲ្យដល់ឫសគល់ ព្រមទំាងធ្វើការបោសសំអាតមន្រ្តីឃុបឃិតគ្រប់ជាន់ថ្នាក់។ ការសន្យារបស់លោកប្រមុខរដ្ឋាភិបាលថៃពេលនេះបានធ្វើឡើង ចំពេលដែលថៃកំពុងទទួលរងការរិះគន់ ទិតៀនយ៉ាងខ្លំាងពីរឿងជួញដូរមនុស្ស និងចំពេលដែលអាមេរិកកំពុងត្រៀមផ្សព្វផ្សាយរបាយការណ៍ពិភពលោកប្រចំាឆ្នំាស្តីពីចំណាត់ថ្នាក់ប្រទេសល្បីឈ្មោះខាងប្រយុទ្ធប្រឆំាងនឹងការជួញដូរមនុស្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
គឺនៅក្នុងឱកាសទិវាជាតិប្រយុទ្ធប្រឆំាងនឹងការជួញដូរមនុស្សដែលលោកប្រាយុទ្ធ ចាន់អូចាបានថ្លែងច្បាស់ៗតាមទូរទស្សន៍ក្នុងស្រុកថា ប្រទេសថៃគ្មានកន្លែងសម្រាប់អ្នករត់ពន្ធមនុស្សទេ ទោះបីជាអ្នកជួញដូរមនុស្សនោះ ជាអ្នកមានឥទ្ធិពលក្នុងសង្គម ឬមួយក៏ជាថ្នាក់ដឹកនំាក្នុងរដ្ឋាភិបាលក៏ដោយ។ តែទន្ទឹមគ្នានេះ លោកចាន់អូចាក៏បានប្រកាសទទួលស្គាល់ថា រឿងជួញដូរមនុស្សពិតជាមាននៅក្នុងទឹកដីថៃតំាងពីយូរមកហើយ។ គួររម្លឹកជូនថា នេះជាលើកទី១ បង្អស់ដែលថៃបានបង្កើតឲ្យមាន « ទិវាជាតិប្រយុទ្ធប្រឆំាងនឹងការជួញដូរមនុស្ស » នេះឡើង។
អ្វីជាការកត់សម្គាល់ ការប្តេជ្ញាចិត្តរបស់រដ្ឋាភិបាលថៃក្នុងការកំចាត់បណ្តាញជួញដូរមនុស្សបានធ្វើឡើង ប៉ុន្មានថ្ងៃមុននឹងក្រសួងការបរទេសអាមេរិកផ្សព្វផ្សាយរបាយការណ៍ពិភពលោកប្រចំាឆ្នំា ២០១៥ ស្តីពីចំណាត់ថ្នាក់ប្រទេសល្បីឈ្មោះខាងប្រយុទ្ធប្រឆំាងនឹងការជួញដូរមនុស្ស។ គេនៅមិនទាន់ដឹងថា តើថៃនឹងស្ថិតចំណាត់ថ្នាក់ទីប៉ុន្មានទេនៅក្នុងឆ្នំា ២០១៥ នេះ អ្វីដែលគេបានដឹងនៅក្នុងរបាយការណ៍កាលពីខែមិថុនា ឆ្នំា ២០១៤ អាមេរិកបានទម្លាក់ចំណាត់ថ្នាក់ថៃទាបដល់បាតជាប្រទេសរំលោភបំពានលើកម្លំាងពលកម្មរបស់កម្មករដែលធ្វើការនៅក្នុងវិស័យនេសាទ។
ក្នុងរយៈពេលប៉ុន្មានសប្តាហ៍កន្លងទៅ ពោលតំាងពីមានផ្ទុះរឿងអាស្រូវជនអន្តោប្រវេសន៍ខុសច្បាប់នៅតំបន់ប៉ែកខាងត្បូងជាប់ព្រំដែនជាមួយនឹងប្រទេសម៉ាឡេស៊ីមក ថៃព្យាយាមធ្វើជាសិស្សល្អដោយបានផ្តើមរឹតបន្តឹងនយោបាយអន្តោប្រវេសន៍តាមរយៈការកំចាត់បណ្តាញក្រុមនំាមនុស្សឆ្លងកាត់ទឹកដីរបស់ខ្លួន។ ក្រៅពីបើកប្រតិបត្តិការចាប់ខ្លួនជនសង្ស័យជួញដូរមនុស្ស រដ្ឋអំណាចក៏បានបោសសំអាតមន្រ្តីជាន់ខ្ពស់យោធាដែលឃុបឃិតដែរ។ ថ្មីៗនេះ មានឧត្តមសេនីយម្នាក់ ព្រមទំាងមន្រ្តីសង្ស័យចំនួន ៥១នាក់បានជាប់ចោទពីបទចាប់មនុស្សធ្វើជាថ្នូរ ឬមួយក៏អនុវត្តន៍ទាសភាពរហូតដល់ធ្វើឲ្យស្លាប់ទាសករ។
គោលដៅរបស់ក្រុងបាងកកនៅក្នុងយុទ្ធនាការប្រឆំាងនឹងរឿងជួញដូរមនុស្ស គឺដើម្បីស្តាឡើងវិញនូវមុខមាត់ និងលើកដំកើនរូបភាពប្រទេសថៃនៅលើឆាកអន្តរជាតិ។ ក្រៅពីទទួលគំនាបរបស់អាមេរិក ថៃក៏បានទទួលគំនាបពីសហភាពអឺរ៉ុបដែលទុកពេលឲ្យថៃចំនួន ៦ខែ ពោលរហូតដល់ខែកញ្ញាខាងមុខសម្រាប់បំបាត់ការនេសាទខុសច្បាប់ដោយចាប់បង្ខំឲ្យកម្មករធ្វើការហួសកម្លំាង។ លោកប្រាយុទ្ធ ចាន់អូចាយល់យ៉ាងច្បាស់ថា ការបន្តឱបដៃទុកឲ្យថៃក្លាយជាទឹកដីសម្រាប់អ្នកជួញដូរមនុស្សនឹងធ្វើឲ្យថៃខាតបង់សេដ្ឋកិច្ច និងបាត់បង់ជំនឿទុកចិត្តពីក្រុមអ្នកវិនិយោគបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ