ថាមពលនុយក្លេអ៊ែរសំខាន់យ៉ាងណាសម្រាប់ជប៉ុន ?
បើទោះជាមតិសាធារណៈភាគច្រើនប្រឆាំង បាតុករបានប្រមូលផ្តុំគ្នានៅមុខមជ្ឈមណ្ឌលនុយក្លេអ៊ែរ និងមុខគេហដ្ឋាននាយករដ្ឋមន្ត្រីក៏ដោយ ក៏មិនមែនជាឧបសគ្គអ្វីសម្រាប់ជប៉ុនដែរ ! នៅថ្ងៃអង្គារនេះ មជ្ឈមណ្ឌលអគ្គីសនីដើរដោយថាមពលនុយក្លេអ៊ែរ បានផ្តើមដំណើរការឡើងវិញ ជាលើកដំបូង បន្ទាប់ពីត្រូវបានបញ្ឈប់ទាំងស្រុងអស់រយៈពេលជិតពីរឆ្នាំ។ មជ្ឈមណ្ឌលនុយក្លេអ៊ែរ សិនដៃ ដែលស្ថិតនៅឆ្ងាយជាងគេបំផុតពីទីក្រុងតូក្យូ បានឆ្លងកាត់វិញ្ញាសាសុវត្ថិភាព កំរិតគ្រោះថ្នាក់ដូចមហន្តរាយហ្វូគូស្ហ៊ីម៉ា អស់ជាច្រើនថ្ងៃ។ សម្រាប់រដ្ឋាភិបាលជប៉ុន សុវត្ថិភាពនុយក្លេអ៊ែរដែលជាអាទិភាពចំបងត្រូវបានធានាហើយ ដូច្នេះត្រូវតែផ្តល់សន្ទុះថ្មីដល់ឧស្សាហកម្មនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:១២
ជប៉ុនប្រឆាំងនុយក្លេអ៊ែរ តែត្រូវការខ្លាំងថាមពលនុយក្លេអ៊ែរ
ជប៉ុនជាប្រទេសប្រឆាំងនឹងនុយក្លេអ៊ែរ ! ឆន្ទៈនេះត្រូវបានបង្ហាញជាថ្មី នាឱកាសប្រារព្ធខួប៧០ឆ្នាំនៃការទម្លាក់គ្រាប់បែកនុយក្លេអ៊ែរអាមេរិកលើកោះអ៊ីរ៉ូស្ហ៊ីម៉ា និងណាហ្កាហ្សាគី។ ជប៉ុនបានសន្យាធ្វើគ្រប់យ៉ាង ដើម្បីកុំឱ្យពិភពលោកស្គាល់គ្រោះមហន្តរាយនុយក្លេអ៊ែរដូចជប៉ុន កាលពី៧០ឆ្នាំមុន និងដើម្បីឱ្យពិភពលោកគ្មានអាវុធនុយក្លេអ៊ែរ។ តែដោយជប៉ុនជាប្រទេសខ្សត់ខ្សោយ ខ្វះធនធានធម្មជាតិខ្លាំងសម្រាប់ផលិតថាមពល ជប៉ុនត្រូវការខ្លាំងថាមពលនុយក្លេអ៊ែរ។ ដូច្នេះជប៉ុនត្រូវការអភិវឌ្ឍន៍និងការពារថាមពលបានមកនុយក្លេអ៊ែរ ឬហៅនុយក្លេអ៊ែរស៊ីវិល។
ម្យ៉ាងវិញទៀត ការផ្តល់សន្ទុះថ្មីដល់ឧស្សាហកម្មនុយក្លេអ៊ែរ ជាប្រការដ៏ចាំបាច់បំផុតសម្រាប់ជប៉ុន ! សម្រាប់រដ្ឋាភិបាលលោកស៊ីនហ្សូអាបេ ដាក់ដំណើរការមជ្ឈមណ្ឌលអគ្គីសនី ដើរដោយនុយក្លេអ៊ែរឡើងវិញនេះ គឺដើម្បីកាត់បន្ថយចំណាយដ៏មហាសាលរបស់ជប៉ុន ទិញធនធានធម្មជាតិ ពីបរទេស ក្នុងបរិមាណច្រើន សម្រាប់យកមកបំប៉នសេចក្តីត្រូវការផ្នែកថាមពលរបស់ប្រទេស។ ក្នុងរយៈពេលពីរឆ្នាំ ដែលគ្មានថាមពលនុយក្លេអ៊ែរនេះ ជប៉ុនបានចំណាយទិញប្រេង-ឧស្ម័នក៏ច្រើន ឯតម្លៃអគ្គិសនីក៏ឡើងថ្លៃខ្លាំងទៀត ! បើតាមអ្នកឆ្លើយឆ្លងព័ត៌មានរបស់វិទ្យុបារាំងប្រចាំទីក្រុងតូក្យូ តម្លៃភ្លើងបានឡើងប្រមាណ៣០%ចំពោះតម្លៃលក់រាយតាមផ្ទះ និងឡើងដល់ទៅ៣៥%នៅតាមរោងចក្រ ដែលធ្វើ ឱ្យក្រុមហ៊ុនខ្លះសុខចិត្តប្តូរទីតាំងទៅប្រទេសផ្សេងដែលមានថាមពលថោកជាងជប៉ុន។ ចំណាយផ្នែកថាមពលនេះបានបន្ទុចបង្អាក់ខ្លាំងកំណើតសេដ្ឋកិច្ចជាតិ។
ចំណុចសំខាន់មួយទៀត ដែលអាចចាត់ទុកជាមោទនភាពជប៉ុនផងនោះ គឺជប៉ុនអាចនឹងក្លាយទៅជាអ្នកជំនាញផ្នែកបច្ចេកវិទ្យានុយក្លេអ៊ែរ។ បន្ទាប់ពីរងគ្រោះមហន្តរាយនៅហ្វូគូស្ហ៊ីម៉ាមក ជប៉ុនបានកំណត់បទដ្ឋានសុវត្ថិភាពនុយក្លេអ៊ែរ យ៉ាងតឹងតែងបំផុតជាងគេ នៅពិភពលោក ! អាជ្ញាធរឯករាជ្យថ្មី ទទួលបន្ទុកត្រួតពិនិត្យសុវត្ថិភាពនុយក្លេអ៊ែរ បានអះអាងថា ជប៉ុនគ្មានថ្ងៃស្គាល់គ្រោះមហន្តរាយនុយក្លេអ៊ែរដូចហ្វូគូស្ហ៊ីម៉ាទេ។ មជ្ឈមណ្ឌលនុយក្លេអ៊ែរ សិនដៃ ដែលមានទីតាំងនៅក្នុងតំបន់ភ្នំភ្លើង ទើបអាចចាប់ដំណើរការជាថ្មីនៅថ្ងៃនេះ ក៏ព្រោះតែត្រូវឆ្លងកាត់វិញ្ញាសាសុវត្ថិភាពគ្រប់បែបទាំងអស់។
គ្មានថាមពលនុយក្លេអ៊ែរ ជប៉ុនចំណាយធំ និង ខាតបង់ច្រើន
ក្នុងរយៈពេលពីរឆ្នាំកន្លងមកនេះ ពីឆ្នាំ២០១៣-ដល់ថ្ងៃម្សិលមិញ ជប៉ុនផ្អាកមជ្ឈមណ្ឌលនុយក្លេអ៊ែរទាំងស្រុងនោះ តែជប៉ុនមិនខ្វះថាមពលសម្រាប់បំប៉នសេដ្ឋកិច្ចនិងជីវភាពរស់នៅប្រចាំថ្ងៃរបស់ពលរដ្ឋទេ។ ជប៉ុនបានងាកទៅទាញថាមពលអគ្គីសនី ពីមជ្ឈមណ្ឌលដើរដោយធ្យូងថ្ម ដែលបំពុលបរិស្ថានយ៉ាងខ្លាំង មកបម្រើសេចក្តីត្រូវការដល់(៩១,១%) និងមជ្ឈមណ្ឌលដើរដោយកម្តៅ ៨,៥% និងថាមពលមិនចេះរីងស្ងួត (ថាមពលព្រះអាទិត្យ ខ្យល់ ...)០,៣៥%។
ដើម្បីឆ្លើយតបទៅនឹងសេចក្តីត្រូវការជាក់ស្តែង មជ្ឈមណ្ឌលដើរដោយឧស្ម័ន ធ្យូងថ្ម និងប្រេង ដែលជប៉ុនត្រូវនាំចូលពីបរទេស បង្កើនផលិតផលរបស់ខ្លួន។ ក្នុងមួយឆ្នាំ អ្នកឯកទេសបានវាយតម្លៃថា ជប៉ុនបានចំណាយបន្ថែម ដល់ទៅ ២៦,៧ពាន់លានអឺរ៉ូ សម្រាប់ទិញប្រេង។ ការខាតបង់នេះ មិនរាប់បញ្ចូលអំពីឱនភាពសេដ្ឋកិច្ចដែលបណ្តាលមកពីសកម្មភាពឧស្សាហកម្មថយល្បឿន ពុំសូវមានប្រាក់ចំណូល ប្រាក់ចំណេញ ពន្ធដារក៏ធ្លាក់ចុះផង។
ប្រសិនបើជប៉ុនគ្មានថាមពលនុយក្លេអ៊ែរសោះ ក្នុងរវាងពីឆ្នាំ១៩៦៥ដល់ឆ្នាំ២០១០ ម្ល៉េះសមជប៉ុនត្រូវចំណាយចោលទិញប្រេងអស់ ២៤៥ពាន់លានអឺរូ និងបើបន្តអត់នុយក្លេអ៊ែរទៀត មាននុយក្លេអ៊ែរតែមួយភាគ ជប៉ុននឹងខាតអស់ជិត១៦៥ពាន់លាន ពីពេលនេះដល់ឆ្នាំ២០២០។
ដើម្បីថាមពល ជប៉ុននឹងដាក់ដំណើរការមជ្ឈមណ្ឌលនុយក្លេអ៊ែរទាំងអស់ ឡើងវិញ ?
រដ្ឋាភិបាលជប៉ុន មានគម្រោងទាញយកថាមពលនុយក្លេអ៊ែរមកបំរើសេចក្តីត្រូវការឱ្យបានប្រមាណពី ២០ទៅ ២២% ដូចអ្វីដែលជប៉ុនធា្លប់មានមុនគ្រោះមហន្តរាយនុយក្លេអ៊ែរហ្វូគូស្ហ៊ីម៉ា ដើម្បីអាចសម្រេចកម្មវត្ថុកាត់បន្ថយការបញ្ចេញឧស្ម័នផ្ទះកញ្ចក់ ឱ្យបាន២៦% នៅឆ្នាំ២០៣០។ ជប៉ុនបានធ្វើសន្យារួចហើយ នៅចំពោះមុខសហគមន៍អន្តរជាតិ។
ប៉ុន្តែគេមិនទាន់អាចដឹងដោយច្បាស់លាស់អំពីចំនួនមជ្ឈមណ្ឌលនុយក្លេអ៊ែរដែលជប៉ុនចង់ឱ្យដំណើរការឡើងវិញនោះទេ។ ជាសរុប និងដោយមិនរាប់អំពីម៉ាស៊ីនប្រតិករនុយក្លេអ៊ែរទាំង៦ នៅហ្វូគូស្ហ៊ីម៉ា ដៃឈី ជប៉ុនមានមជ្ឈមណ្ឌលអគ្គីសនីនុយក្លេអ៊ែរ ៤៨ ក្នុងនោះមាន៥ យ៉ាងតិច នឹងត្រូវរំលាយចោល។
បើផ្អែកតាមផ្នែកបច្ចេកទេស (គិតពីអាយុ ពីទីតាំង ...) មានម៉ាស៊ីនប្រតិករនុយក្លេអ៊ែរ ប្រមាណជាង៣០នឹងអាចដាក់ឱ្យដំណើរការឡើងវិញបាន។ តែត្រូវរង់ចាំសេចក្តីសម្រេចពីអាជ្ញាធរខេត្ត អាជ្ញាធរនយោបាយសិនទើបអាចបើកបាន។
ទន្ទឹមគ្នានេះ ក្រោយមហន្តរាយនៅហ្វូគីស្ហ៊ីម៉ា ជប៉ុនក៏បានចាប់ផ្តើមគិតគូរ ស្វែងរកថាមពលមិនចេះរីកស្ងួតដែរ។ ថ្វីបើក្រុមហ៊ុនអគ្គីសនី មិនខ្វល់ខ្វាយនឹងថាមពលព្រះអាទិត្យក្តី ក៏ជប៉ុនមិនធ្វេសប្រហែសនឹងអភិវឌ្ឍន៍ថាមពលគ្មានផ្សែង មិនចេះរីកស្ងួត ឱ្យមានសក្តានុពល ដល់៥៦%នៃតម្រូវការផ្នែកអគ្គីសនី ចាប់ពីឆ្នាំ២០៣០ទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ