បាញ់រះតាមព្រំដែននៅតំបន់កាហ្សមៀររវាងឥណ្ឌា និងប៉ាគីស្ថាន ស្លាប់ ៨នាក់
ជាថ្មីម្តងទៀត តាមបណ្តាយព្រំដែនរវាងឥណ្ឌា និង ប៉ាគីស្ថាននៅតំបន់កាហ្សមៀរ បានក្លាយជាទីលានប្រយុទ្ធបាញ់តបតដាក់គ្នា។ ប្រភពព័ត៌មានពីក្រុង ស្រីណាកា បានឲ្យដឹងថា មានអ្នកស្លាប់ទាំងអស់ ៨នាក់ ដោយសារការបាញ់គ្រាប់កាំភ្លើងត្បាល់ ទៅវិញទៅមក រវាងកងទ័ពព្រំដែនឥណ្ឌា និងកងទ័ពប៉ាគីស្ថាន ដែលភាគច្រើន អ្នករងគ្រោះ គឺសុទ្ធសឹងជាប្រជាជនស្លូតត្រង់។
ចុះផ្សាយនៅថ្ងៃ៖
ស្តាប់ - ០១:៥៤
ស្នូរគ្រាប់កាំភ្លើង បានផ្ទុះឡើងសារជាថ្មី នៅតំបន់កាហ្សមៀរ តាមបណ្តោយព្រំដែនរវាងឥណ្ឌា និងប៉ាគីស្ថាន ចាប់តាំងពីថ្ងៃសុក្រ ទី ១៤ សីហា។ នៅថ្ងៃអាទិត្យទី ១៦ សីហានេះ តាមប្រភពព័ត៌មាន ពីក្រុងស្រីណាកា តំបន់កាហ្សមៀរ បានឲ្យដឹងថា យ៉ាងហោចណាស់ មានអ្នកស្លាប់ ចំនួន ៨នាក់ ដោយសារតែគ្រាប់កាំភ្លើងត្បាល់ របស់ទាហានទាំងសងខាង។
អ្នកនាំពាក្យឥណ្ឌា ប្រចាំការនៅមូលដ្ឋាន បានបញ្ជាក់ថា មានប្រជាជនស្លូតត្រង់ឥណ្ឌា ៥នាក់ បានស្លាប់ ដោយក្នុងនោះ មានក្មេងអាយុ១២ឆ្នាំម្នាក់ផងដែរ ត្រូវស្លាប់ដោយសារតែគ្រាប់កាំភ្លើងត្បាល់ បាញ់ចេញពីខាងប៉ាគីស្ថាន។ ក្រៅពីអ្នកស្លាប់ នៅមានអ្នករបួស ចំនួន៩នាក់ផ្សេងទៀត។ ចំណែកមន្ត្រី ប៉ាគីស្ថានវិញ បានរាយការណ៍ថា ខាងគេ មានប្រជាជនស្លាប់២នាក់ និងរបួស៥នាក់ ដោយសារគ្រាប់កាំភ្លើងត្បាល់ បាញ់ចេញពីខាងឥណ្ឌា។ ហេតុការណ៍បាញ់តបតគ្នានេះ បានកើតឡើង នៅស្រុក ប៉ូនឆ៍ ជាប់នឹងខ្សែបន្ទាត់ព្រំដែន បែងចែករវាងតំបន់កាហ្សមៀរឥណ្ឌា និងតំបន់កាហ្សមៀរប៉ាគីស្ថាន។
ដោយឡែក កាលពីថ្ងៃសៅរ៍ ទី១៥ សីហា គ្រាប់កាំភ្លើងត្បាល់មួយគ្រាប់ របស់កងទ័ពព្រំដែន ប៉ាគីស្ថាន បានផ្លោងធ្លាក់ ក្នុងភូមិឥណ្ឌា មួយ ទៅប៉ះនឹងរថយន្តក្រុងមួយ បណ្តាលឲ្យស្លាប់អ្នកដំណើរ៣នាក់ និង២០នាក់ផ្សេងទៀតរងរបួស។ សំឡេងគ្រាប់កាំភ្លើង រប៉េសរប៉ោះ ត្រូវបានគេឮយូរៗម្តង ក្នុងរវាងយប់ថ្ងៃសៅរ៍ ឈានចូលថ្ងៃអាទិត្យ។
សូមបញ្ជាក់ថា គ្រាប់កាំភ្លើង បានចាប់ផ្តើមបាញ់ចេញ ពីខាងប៉ាគីស្ថាន ចាប់តាំងពីថ្ងៃសុក្រ ទី ១៤ សីហា ជាថ្ងៃបុណ្យឯករាជ្យជាតិប៉ាគីស្ថាន។ ចំណែកឥណ្ឌា បុណ្យឯករាជ្យជាតិឥណ្ឌា គឺប្រារព្ធធ្វើឡើង នៅថ្ងៃបន្ទាប់ គឺថ្ងៃសៅរ៍ទី ១៥សីហា។
ចាប់តាំងពីបានឯករាជ្យ ប្រទេសទាំងពីរ បានឈ្លោះគ្នា ដណ្តើមគ្នាកាន់កាប់តំបន់កាហ្សមៀរ មិនចេះចប់មិនចេះហើយ។ ប្រទូស្តរាយយោធាទ្រង់ទ្រាយធំ រវាងសត្រូវទាំងពីរ បានកើតឡើង ចំនួន៣លើក រួចមកហើយ។ ដោយឡែក តាមការគ្រោងទុក ប្រទេសទាំងពីរ មានគម្រោងជួបពិភាក្សាគ្នា នៅថ្ងៃទី ២៣-២៤ សីហា ខាងមុខ នៅទីក្រុង ញូដេលី ដើម្បី និយាយអំពីកិច្ចការសន្តិសុខ និងការប្រយុទ្ធប្រឆាំង នឹងអំពើភេរវកម្ម។ គេមិនប្រាកដថា អ្វីៗនឹងប្រព្រឹត្តិទៅ ដោយរលូននោះទេ បើសិនជាការបាញ់បោះតាមព្រំដែន នៅតែបន្តមាន យ៉ាងដូច្នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ