នាយករដ្ឋមន្ត្រីថៃ ចង្អុលមុខក្រុមអាវក្រហមថាពាក់ព័ន្ធនឹងភេរវកម្មនៅបាងកក
ក្រុងបាងកក ពេលនេះស្ថិតក្នុងស្ថានភាពតានតឹងជាងពេលណាៗទាំងអស់ ! ស្នូរផ្ទុះបានលាន់ឮមួយគ្រាប់ទៀត នៅព្រឹកមិញ តែសំណាងល្អគ្មានបង្កគ្រោះថ្នាក់និងជនរងគ្រោះ។ ម្សិលមិញ បាងកកបានរងការវាយប្រហារភេរវកម្មដ៏ធ្ងន់ធ្ងរមិនធ្លាប់មាន តុល្យការនៃចំនួនមនុស្សស្លាប់ បានកើនឡើងដល់ទៅ២២នាក់ និងរបួសជាង១២០នាក់។ តាមរយៈកាមេរ៉ាសុវត្ថិភាព ប៉ូលិសកំពុងតាមស្វែងរកចាប់ខ្លួនជនសង្ស័យម្នាក់។ ប៉ុន្តែនាយករដ្ឋមន្ត្រី ប្រាយុទ្ធ ចាន់អូចា បានចោទប្រកាន់ដោយត្រង់ៗថាការបំផ្ទុះគ្រាប់បែកកណ្តាលរាជធានីជាស្នាដៃរបស់ក្រុមអាវក្រហម។ ជាងមួយឆ្នាំក្រោយរដ្ឋប្រហារ និងការដឹកនាំដោយយោធា ថៃកំពុងឆ្លងកាត់វិញ្ញាសាដ៏ហិង្សាថ្មីមួយថែមទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:២២
បណ្តាជនថៃ និងពិសេសទេសចរបរទេស ស្ថិតក្នុងស្ថានភាពតក់ស្លុត និងព្រួយបារម្ភខ្លាំង ចំពោះស្ថានការណ៍ហិង្សាកណ្តាលរដ្ឋធានី នៃប្រទេសដែលធ្លាប់មានឈ្មោះ “ប្រទេសនៃភាពញញឹម”។ ភាពតានតឹងបន្តគ្របដណ្តប់ក្រុងបាងកកទៀត នៅព្រឹកមិញ ! បើតាមប៉ូលិសនៅផ្ទាល់នឹងកន្លែង គេបានឮស្នូរផ្ទុះមួយបន្ថែមទៀត ជាកូនគ្រាប់តូចមួយ ត្រូវបានគ្រប់មកពីលើស្ពានអកាស ប៉ុន្តែជាសំណាងល្អ គ្មានបង្កឱ្យមានមនុស្សស្លាប់ឬជនរងរបួសអ្វីទាំងអស់។ ប៉ូលិស ទាហាន កងកម្លាំងសន្តិសុខរាប់ពាន់នាក់ត្រូវបានដាក់ពង្រាយពេញទីក្រុងបាងកក តាំងពីព្រឹកមក។
អត្តសញ្ញាណជនសង្ស័យ
ចំណែកឯការអង្កេត កំពុងទៅមុខ ប៉ូលិសបន្តរុករក នៅកន្លែងកើតហេតុល្ងាចមិញផង ថ្ងៃមិញផង ក្រែងរកឃើញមានវត្ថុតាងអ្វីផ្សេងទៀត បន្ថែមពីលើព័ត៌មានផ្តល់ដោយកាមេរ៉ាសុវត្ថិភាព ដែលថតឃើញមានបុរសម្នាក់ គួរឱ្យសង្ស័យ ពាក់អាវយឺតពណ៌លឿង ស្ពាយសាក់កាដូ។ បើតាមរូបភាពក្នុងកាមេរ៉ា យុវជននោះបានដើរចូលទៅក្នុងបរិវេណព្រះភូមិអេរ៉ាវ៉ាន់ តែពេលចេញមកវិញ នៅប្រមាណ១៥នាទីក្រោយ ស្រាប់តែគ្មានឃើញស្ពាយកាបូបអ្វីសោះ សំឡេងផ្ទុះក៏បានលាន់ឮតាមពីក្រោយ។
លោកនាយករដ្ឋមន្ត្រីថៃ បានអះអាងថា ជនសង្ស័យនេះ ស្ថិតនៅក្នុងក្រុមប្រឆាំងនឹងរបបសឹក និងមានដើមកំណើតជាអ្នកឦសាន ប៉ុន្តែរូបភាពមិនសូវច្បាស់ ទើបត្រូវផ្ទៀងផ្ទាត់រូបភាពឡើងវិញ។ ឯការស្វែងរកចាប់ជនសង្ស័យក៏បានចាប់ផ្តើម តែមិនទាន់បានទទួលលទ្ធផលអ្វីនៅឡើយទេ។ បើតាមលោកនាយករដ្ឋមន្ត្រីដដែល ប៉ូលិសថៃពេលនេះក៏កំពុងសិក្សាអង្កេតសារតាមប្រព័ន្ធសង្គមហ្វេសប៊ូក។ សារព្រមានតាំងពីមុនការផ្ទុះគ្រាប់បែក ប្រាប់អំពីគ្រោះថ្នាក់ឆាប់ៗអាចកើតមាននៅទីក្រុងបាងកក។ សារនោះមានប្រភពមកពីក្រុមប្រឆាំងនឹងរបបសឹក ដែលមានមូលដ្ឋាននៅភាគខាងជើងប្រទេស ខ្លះជាអ្នកឦសានផង។
ក្រុមអាវក្រហមជាប់ចោទ
មេប៉ូលិស យោធា-រដ្ឋមន្ត្រីការពារជាតិថៃ សុទ្ធតែបានបង្ហាញការប្រុងប្រយ័ត្នខ្លាំង និងមិនប្រហែលផ្តល់អាទិភាពលើដានណាមួយទេ ហើយក៏មិនធ្វើការចោទប្រកាន់លើក្រុម ឬជនណា ថាជាអ្នករៀបចំផែនការបំផ្ទុះកណ្តាលក្រុងដែរ ! គឺមានតែលោកនាយករដ្ឋមន្ត្រី ប្រាយុទ្ធ ចាន់អូចាម្នាក់ ដែលហាក់ដូចជាខ្វះភាពប្រុងប្រយ័ត្នជាងគេ មានប្រសាសន៍ផាំងផាំង សន្និដ្ឋានលឿន និងជ្រុលបន្តិច ទៅចោទប្រកាន់លើក្រុមអាវក្រហម ថាជាអ្នកនៅពីក្រោយអំពើហិង្សាម្សិលមិញ។ នេះមិនមែនជាលើកទីមួយទេ ដែលលោកប្រយុទ្ធចាន់អូចា ចោទក្រុមអាវក្រហមនោះ ការបោកគ្រាប់បែកលើកមុន ក៏ប្រមុខរដ្ឋាភិបាលសឹកថៃចោទក្រុមអាវក្រហមដែរ តែរហូតមកទល់នឹងម៉ោងនេះនៅតែមិនទាន់រកឃើញភស្តុតាងអ្វីបញ្ជាក់សោះ។
ចំពោះករណីថ្ងៃនេះ តាមរយៈរូបភាពមិនច្បាស់ ពាក្យចចាមអារាម ថាជនសង្ស័យជាអ្នកមកពីឦសាន ដូច្នេះទើបចោទថាក្រុមអាវក្រហមតែម្តង ... ប៉ុន្តែរហូតមកទល់នឹងពេលនេះ ពុំទាន់មានព័ត៌មានផ្លូវការអ្វីបញ្ជាក់បន្ថែមលម្អិតឡើយ។ គេមិនដឹងថាជនក្នុងវីដេអូសុវត្ថិភាព ជាជនសង្ស័យ ជនជាប់គ្រោះទេ។
គំនុំនិងការសងសឹកគ្នា ?
រលកហិង្សាបំផ្ទុះគ្រាប់បែកនេះ អាចមានប្រភពនិងដើមហេតុច្រើនយ៉ាង និងចំណេញដល់ការបំប៉ោងព័ត៌មានគ្រប់បែប ៖ អាចជាការសងសឹកគ្នាក្នុងរង្វង់កងសន្តិសុខយោធាក្រុមតែមួយ ជាគំនុំគំគួនរបស់ពួកអាវក្រហមដូចអ្វីដែលលោកនាយករដ្ឋមន្ត្រីចោទ ... ព្រោះថា លោកប្រាយុទ្ធចាន់អូចា ដែលតាំងខ្លួនជាអ្នកការពាររាជានិយម ប្រយុទ្ធប្រឆាំងនឹងត្រកូលថាក់ស៊ីន ប្រឆាំងអំពើពុករលួយ ប្រឆាំងនឹងនយោបាយគ្រួសារនិយម តែខ្លួនលោកផ្ទាល់ក៏កំពុងតែរៀបចំតែងតាំងប្អូនប្រុសបង្កើតខ្លួនឱ្យកាន់តួនាទីដ៏សំខាន់ជាប្រមុខយោធា។ ស្ថានភាពបែបនេះ គឺពិតជាធ្វើឱ្យពលរដ្ឋថៃពិបាកអនុគ្រោះ និងទទួលយកណាស់។
នៅមានដានពីរសំខាន់ទៀត គឺពួកអ៊ីស្លាមអ៊ុយហ្គួ ដែលអាជ្ញាធរថៃទើបបញ្ជូនត្រលប់ទៅចិនវិញកាលពីចុងខែកក្កដា និងអ៊ីស្លាមចង់ផ្តាច់ទឹកដីនៅភាគខាងត្បូង បើទោះបីជាប្រមុខយោធាថៃ បានសន្និដ្ឋានឃើញវិធី និងប្រភេទផ្សំជាតិផ្ទុះ មិនដូចទង្វើនិងទម្លាប់វាយប្រហារតែក្នុងភាគខាងត្បូងបំផុតនៃប្រទេសក៏ដោយ ក៏គ្មានអ្វីត្រូវមើលរំលងសោះឡើយ។
ផលប៉ះពាល់ចំពោះសេដ្ឋកិច្ច ទេសចរណ៍ និងសេរីភាព
អាជ្ញាធរថៃ បានអះអាងតាំងពីម្សិលមិញភ្លាមម្ល៉េះថា ភេរវកម្មនេះ គឺសំដៅលើទេសចរបរទេស និងសេដ្ឋកិច្ចទេសចរណ៍ប្រទេស" ! ថៃជាប្រទេសធំ មានទេសចរណ៍ខ្លាំង មានកន្លែងដើរកំសាន្តនិងទស្សនាច្រើន តែហេតុការណ៍ថ្ងៃនេះ និងថ្ងៃម្សិលមិញ ពិតជាជះផលអាក្រក់ ដោយខានមិនបានលើវិស័យទេចរណ៍នេះ ! យ៉ាងហោចណាស់ ក៏បានធ្វើឱ្យអ្នកចង់ធ្វើដំណើរទៅថៃ ទុចជើងពិចារណាម្តងហើយម្តងទៀត មុនសម្រេចចិត្តទៅប្រទេសថៃដែរ។ ទេសចរណ៍ថៃ តំណាងឱ្យ១០%នៃសេដ្ឋកិច្ចជាតិ និងជាវិស័យតែមួយគត់ដែលហាក់ដូចជាមានសុខភាពល្អជាងគេ គិតចាប់តាំងពីថៃមានរដ្ឋប្រហារ និងដឹកនាំដោយយោធាមក។ រដ្ឋាភិបាលសង្ឃឹមខ្លាំងថានឹងអាចទាក់ទាញទេសចរណ៍ឱ្យបានច្រើនបំផុត នៅឆ្នាំ២០១៥នេះ ព្រោះឆ្នាំកន្លងទៅថៃក្រហេតក្រពះម្តងហើយ ដោយសារបាតុកម្មតាមដងផ្លូវ។
របាយការណ៍ចេញផ្សាយនៅមុនភេរវកម្មមួយថ្ងៃបង្ហាញថា សេដ្ឋកិច្ចជាតិថៃត្រដរងើបយ៉ាងត្រដាបត្រដួសបំផុត ព្រោះតម្រូវការក្នុងស្រុកទាប និងការនាំចេញអូសជើង។ នៅថ្ងៃនេះ ក្រោយភេរវកម្មភ្លាម ទីផ្សារភាគហ៊ុនថៃបានបាត់តម្លៃអស់២% លុយបាត បានដាំក្បាលចុះស្ទើរដល់បាត ធ្លាក់ថ្លៃមិនធ្លាប់មានគិតតាំងពី៦ឆ្នាំមក។
ក្រៅពីសេដ្ឋកិច្ចនិងទេសចរណ៍ ភេរវកម្មនេះនឹងអាចជំរុញរដ្ឋាភិបាលសឹក ឱ្យរឹតបន្តឹងបន្ថែមទៀតសិទ្ធិនិងសេរីភាពសាធារណៈ ដែលរួមតូចស្រាប់ ក្រោមលេសដើម្បីការពារសន្តិសុខជាតិ និងជាលេសសម្រាប់រក្សាអំណាចយោធាបានកាន់តែណែននិងយូរក្នុងដៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ