បារាំងសង្ឃឹមថាអាចលក់យន្តហោះRafale ឲ្យម៉ាឡេស៊ី និងឥណ្ឌា ក្នុងពេលឆាប់ៗ
ហាងឆេងយន្តហោះ Rafale របស់បារាំង មិនដែលត្រូវប៉ាន់ ដូចឆ្នាំនេះទេ។ បន្ទាប់ពីបានលក់ទៅឲ្យអេហ្ស៊ីប និងកាតា បារាំងកំពុងតែចរចា ជាមួយ ម៉ូយពីរផ្សេងទៀត ដែលចង់ទិញយន្តហោះចម្បាំង Rafale របស់បារាំង គឺ ម៉ាឡេស៊ីចង់បាន ១៨គ្រឿង ហើយឥណ្ឌាចង់បាន៣៦គ្រឿង។ ទោះបីជាមិនទាន់មានការចុះហត្ថលេខាទិញលក់ ជាស្ថាពរ ក៏ក្រសួងការពារជាតិបារាំង បានសម្តែងសុទិដ្ឋិនិយមយ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
តាមប្រភពព័ត៌មានពីក្រសួងការពារជាតិបារាំង គម្រោងការលក់យន្តហោះចម្បាំងRafale របស់ក្រុមហ៊ុនDassaultបារាំង ទៅឲ្យម៉ាឡេស៊ី និងឥណ្ឌា កំពុងតែ ខិតទៅជិតដល់គោលដៅចុងក្រោយហើយ។ លោករដ្ឋមន្ត្រីការពារជាតិបារាំង Jean-Yves le Drian ទើបតែបានត្រឡប់មកពីក្រុងកូឡាឡំពួរ កាលពីថ្ងៃពុធ ទី២ កញ្ញា ដើម្បីយកសំណើកិច្ចសន្យាលក់យន្តហោះ Rafale ១៨គ្រឿងទៅឲ្យម៉ាឡេស៊ី។
សូមបញ្ជាក់ថា ម៉ាឡេស៊ី មានបំណង ធ្វើទំនើបកម្មសមត្ថភាពយោធាផ្លូវអាកាសរបស់ខ្លួន ដែលបច្ចុប្បន្ន គេមានតែយន្តហោះប្រភេទ MiG-29 របស់រុស្ស៊ីតែប៉ុណ្ណោះ។ ក្រៅពីយន្តហោះ Rafale របស់បារាំង ម៉ាឡេស៊ី កំពុងពិនិត្យលើសំណើរបស់យន្តហោះផ្សេងទៀត ដូចជា យន្តហោះA/F-18 របស់ក្រុមហ៊ុនអាមេរិក Boeing យន្តហោះ Gripen របស់ក្រុមហ៊ុន ស៊ុយអ៊ែដ និងយន្តហោះ Eurofighter Typhoon របស់ក្រុមហ៊ុនចំរុះ Airbus។
ទោះបីជាយ៉ាងណា ប្រភពពីក្រសួងការពារជាតិបារាំង បានសម្តែងសុទិដ្ឋិនិយមថា យន្តហោះ Rafale បារាំង មានប្រៀបជាងយន្តហោះដ៏ទៃ ដោយសារតែម៉ាឡេស៊ី បានសម្តែងពីចំណាប់អារម្មណ៍ច្រើនជាងគេ ហើយព្យាយាមចរចា បើទោះបីជាយន្តហោះបារាំង មានតម្លៃថ្លៃជាងគេ បន្តិចក៏ដោយ។ តាមប្រភពដដែលបានឲ្យដឹងថា ម៉ាឡេស៊ីកំពុងតែពិចារណា លើទំហំថវិកាដែលត្រូវចំណាយ ក្នុងការទិញយន្តហោះ Rafale។
ដោយឡែក ឥណ្ឌា ដែលមានបំណងចង់ទិញយន្តហោះ Rafale ចំនួន ៣៦គ្រឿង ក៏បានធ្វើឲ្យបារាំង មានទឹកមាត់លេបដែរ ដោយនៅថ្ងៃនេះ គណកម្មាធិការផ្គត់ផ្គង់ភស្តុភាររបស់ឥណ្ឌា បានផ្តល់ភ្លើងខៀវ ដើម្បីបន្តកិច្ចចរចា ជាមួយបារាំង តទៅទៀត។
ទោះបីជាយ៉ាងណា នេះគ្រាន់តែជាការសង្ឃឹមតែប៉ុណ្ណោះ កិច្ចសន្យាស្ថាពរ នៅមិនទាន់ចុះហត្ថលេខានៅឡើយទេ។ មានឧបសគ្គជាច្រើន ដែលអាចរារាំងការទិញលក់នេះ។ សម្រាប់ម៉ាឡេស៊ី អ្វីដែលអាចចោទជាបញ្ហា គឺក្នុងពេលនេះ ម៉ាឡេស៊ី កំពុងជួបវិបត្តិហិរញ្ញាវត្ថុក្នុងស្រុក ដោយសារប្រេងធ្លាក់ថ្លៃ ហើយតម្លៃវត្ថុធាតុដើមមួយចំនួន ក៏ធ្លាក់ចុះផងដែរ ដែលធ្វើឲ្យម៉ាឡេស៊ីមានការខាតបង់ច្រើន។ នេះនៅមិនរាប់ ពីវិបត្តិនយោបាយ ដែលទាក់ទិនទៅនឹង រូបលោក នាយករដ្ឋមន្ត្រីម៉ាឡេស៊ីផង។ ចំណែក ឥណ្ឌាវិញ ភាគីគេនៅតែចង់ទាមទារ ទៅតាមសំណើចាស់ ពោល គឺគេទិញ១២៦ គ្រឿង ប៉ុន្តែ១០៨គ្រឿង ត្រូវយកទៅផលិតនៅក្នុងប្រទេសគេ។ ក្រសួងការពារជាតិបារាំង មិនគួរណា ឆាប់អរជ្រុលពេកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ