នាយករដ្ឋមន្រ្តីឥណ្ឌា៖១២ពាន់លានដុល្លារ ដើម្បីធ្វើឲ្យតំបន់កាស្មៀរឥណ្ឌារុងរឿងឡើងវិញ
នាយករដ្ឋមន្រ្តីឥណ្ឌា លោកណារិនដ្រា ម៉ូឌី បានប្រកាស កាលពីថ្ងៃសៅរ៍ ផ្តល់ជំនួយហិរញ្ញវត្ថុ ១២ពាន់លានដុល្លារ សម្រាប់កសាង និងជំរុញកំណើនសេដ្ឋកិច្ចនៅតំបន់កាស្មៀរឥណ្ឌា។ កាស្មៀឥណ្ឌា ដែលស្ថិតនៅក្នុងតំបន់ប្រទាញប្រទាញរវាងឥណ្ឌា និងប៉ាគីស្ថាន ទើបបានរងការបំផ្លាញខូចខាតដ៏ធ្ងន់ធ្ងរ ដោយទឹកជំនន់ កាលពីឆ្នាំ ទៅមិញ។
ចុះផ្សាយនៅថ្ងៃ៖
នៅទីក្រុង ស្រីណាហ្គា ក្នុងតំបន់កាស្មៀរឥណ្ឌា ប្រមុខរដ្ឋាភិបាលឥណ្ឌា បានប្រកាសផ្តល់ជំនួយសន្ធឹកសន្ធាប់ ដើម្បីកែប្រែមុខមាត់តំបន់កាស្មៀរ។ តាមលោកនាយករដ្ឋមន្រ្តីឥណ្ឌា ជំនួយហិរញ្ញវត្ថុរបស់ទីក្រុងញូវដេលីមិនត្រឹមសម្រាប់ជួយកាស្មៀរឥណ្ឌា ឲ្យងើបរួច ចាកផុតពីការលំបាក ដោយសារទឹកជំនន់តែប៉ុណ្ណោះទេ ប៉ុន្តែ វានឹងជួយ អភិវឌ្ឍ ជំរុញ សេដ្ឋកិច្ចតំបន់នេះឡើងវិញ។ មន្រ្តីរដ្ឋការនៅតំបន់កាស្មៀរឥណ្ឌា ធ្លាប់បានតវ៉ាទៅរដ្ឋាភិបាលក្រុងញូវដេលី ថា បានភ្លេច មិនអើពើ ជួយ តំបន់ការស្មៀរដ៏ក្រីក្រ ដែលរងគ្រោះធ្ងន់ធ្ងរ ដោយទឹកជំនន់។ គ្រោះទឹកជំនន់ កាលពីឆ្នាំ ២០១៤ បានសម្លាប់មនុស្ស ៣០០នាក់ និងធ្វើឲ្យខូចខាត ផ្ទះសម្បែង ដីកសិកម្ម និងហេដ្ឋារចនាសម្ព័ន្ធដែលមានតម្លៃ១៦ពាន់លានដុល្លារ។
នៅក្នុងទស្សនកិច្ចទៅកាន់តំបន់កាស្មៀរឥណ្ឌា នាយករដ្ឋមន្រ្តីឥណ្ឌា ចង់បញ្ជាក់ថា ទីក្រុងញូវដេលីមិនបានបំភ្លេច តំបន់កាស្មៀរទេ។ ដើម្បីកែប្រែ ស្តារមុខមាត់កាស្មៀរ ឲ្យងើបត្រដែតឡើងវិញ លោកនាយករដ្ឋមន្រ្តីណារិនដ្រា ម៉ូឌី បានសន្យាបង្កើតកន្លែងអប់រំដែលមានតម្លៃថោក និងមានគុណភាពសម្រាប់យុវជននៅតំបន់កាស្មៀរ។ លោកបានសន្យាផងដែរ បង្កើតការងារធ្វើ តាមរយៈ ការជំរុញ វិស័យទេសចរណ៍ និងផលិតកម្មសរសៃអំបោះ ធ្វើពីរោមកូនចៀម ដែលជាផលិតផលល្បីឈ្មោះរបស់តំបន់កាស្មៀរ។
នៅឥណ្ឌា ជាទីដែលសំបូរអ្នកកាន់សាសនាហិណ្ឌូ តំបន់កាស្មៀរ ជាទឹកដីតែមួយរបស់ឥណ្ឌា ដែលសំបូរអ្នកកាន់សាសនាអ៊ីស្លាមរស់នៅច្រើនជាងគេ។ អំពើហិង្សានៅតំបន់កាស្មៀរឥណ្ឌា ដែលបង្កឡើង ដោយ ក្រុមបះបោរអ៊ីស្លាម បានថមថយចុះច្រើន តាំងពីឆ្នាំ ១៩៩០ ឆ្នាំ ១៩៩០ ដែលក្រុមកាន់សាសនាអ៊ីស្លាម ងើបប្រឆាំងរដ្ឋអំណាចញូវដេលី និងទាមទារបំបែកទឹកដី ចេញពីឥណ្ឌា។ កាលពីថ្ងៃសុក្រ អាជ្ញាធរឥណ្ឌា ដែលបានដាក់បម្រាមគោចរ នៅតំបន់កាស្មៀរឥណ្ឌា បានឃាត់ខ្លួនក្រុមបំបែកទឹកដី ប្រមាណ ៣០០នាក់ នៅក្នុងប្រតិបត្តិការពង្រឹងសន្តិសុខ ដើម្បីរង់ចាំទទួលលោកនាយករដ្ឋមន្រ្តី ឥណ្ឌា។
នៅថ្ងៃ សៅរ៍ មេដឹកនាំក្រុមបំបែកទឹកដីនៅកាស្មៀរឥណ្ឌា ត្រូវបានប៉ូលិសឥណ្ឌា ចាប់បង្ឃាំងមិនឲ្យចេញពីផ្ទះ និងធ្វើបាតុកម្មប្រឆាំងនាយករដ្ឋមន្រ្តីឥណ្ឌា។ ផ្ទុយ គេឃើញ មានបាតុកម្មប្រឆាំង នាយករដ្ឋមន្រ្តីឥណ្ឌា តំបន់កាស្មៀរ ដែលស្ថិតនៅក្រោមការគ្រប់គ្រងរបស់ប៉ាគីស្ថាន។ រហូតមក ទីក្រុងញូវដេលីតែងតែបន្ទោស ទម្លាក់កំហុសលើអាជ្ញាធរប៉ាគីស្ថាន ថាជាអ្នកនៅពីក្រោយក្រុមអ៊ីស្លាម ដែលចង់ទាមទារបំបែកទឹកដី នៅតំបន់កាស្មៀរឥណ្ឌា។ ប៉ាគីស្ថានវិញបានឆ្លើយបកទៅវិញថា ខ្លួនគ្រាន់តែបានជួយផ្នែកការទូត ក្រុមអ៊ីស្លាមដែលរងការបង្រ្កាបពីអាជ្ញាធរឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ