បន្ទាប់ពីដំណើរទស្សនកិច្ចរបស់នាយករដ្ឋមន្ត្រីឥណ្ឌា នៅប៉ាគីស្ថាន និងអាហ្វហ្កានីស្ថាន ភាពតានតឹងហាក់ប៉ោងឡើងវិញខ្លាំង។ ពួកភេរវជនអ៊ីស្លាមជ្រុលនិយម បានវាយប្រហារលើមូលដ្ឋានទ័ពអាកាសឥណ្ឌា នៅរដ្ឋPendjab ជិតតំបន់កាស្មៀ។ ស្ថានកុងស៊ុលឥណ្ឌានៅអាហ្វហ្កានីស្ថាន ក៏បានក្លាយជាចំណុចវាយប្រហារភេវកម្មទៀត នៅថ្ងៃបន្ទាប់។ តើដំណើរការសន្តិភាពជាមួយប៉ាគីស្ថាន ដែលទើបរហើបមុខបន្តិចកាលពីសប្តាហ៍មុន នឹងក្លាយទៅយ៉ាងណា ?
ឥណ្ឌាបានផ្តើមឆ្នាំថ្មី ឆ្នាំ២០១៦ ជាមួយនឹងអំពើហិង្សា កាត់អាយុនៃភាពល្អូកល្អើន ឱ្យខ្លីបំផុត ! កាលពីមួយសប្តាហ៍មុននេះសោះ លោកនយាករដ្ឋមន្ត្រីឥណ្ឌា ណារិនដ្រា ម៉ូឌី បានអញ្ជើញទៅបំពេញទស្សនកិច្ច ដ៏ភ្ញាក់ផ្អើល និងជាប្រវត្តិសាស្ត្រ មិនធ្លាប់មានតាំងពីជាង១០ឆ្នាំមក នៅប៉ាគីស្ថាន ជួបពិភាក្សាជាមួយសមភាគី ណាវ៉ា ស្ហារីហ្វ ក្នុងថ្ងៃណូអែលតែម្តង ដើម្បីផ្តល់សន្ទុះដល់ដំណើរការចរចាសន្តិភាពឥណ្ឌា-ប៉ាគីស្ថាន ដែលជាប់គាំងតាំងពីយូរមកហើយ ឱ្យមានពន្លឺឡើងវិញ។
ប៉ុន្តែពួកជ្រុលនិយមអ៊ីស្លាម បានចូលមកស្រាស់ផ្លូវបាន ! នៅថ្ងៃទី ២មករា២០១៦ សកម្មជនអ៊ីស្លាមជ្រុលនិយមប៉ាគីស្ថាន នៃចលនាJaish-e-Mohammad (បើតាមការសង្ស័យរបស់ឥណ្ឌា) បានចូលវាយលុកលើមូលដ្ឋានទ័ពអាកាសឥណ្ឌា នៅជាប់ព្រំដែនប៉ាគីស្ថាន មិនឆ្ងាយប៉ុន្មានពីតំបន់ជាប់ជម្លោះកាស្មៀ។ ក្រោយការវាយលុករបស់ពួកភេរវជនកម្មង់ដូ នៅថ្ងៃសៅរ៍ មានភេរវជនពីរនាក់ផ្សេងទៀត បន្តសំងំលាក់ខ្លួនក្នុងលេនដ្ឋាន។ ការប្រយុទ្ធគ្នាមានរយៈពេលជាង៦០ម៉ោង យោធាឥណ្ឌា៧នាក់បានស្លាប់ ភេរវជនទាំង៥នាក់ត្រូវកម្ចាត់អស់នៅល្ងាចថ្ងៃទី ៤ មករា។
ថ្វីបើការវាយប្រហារនេះ ត្រូវបានប្រកាសទទួលស្គាល់ជាស្នាដៃរបស់ក្រុមប្រឹក្សារួមរួមជីហាត ចលនាអ៊ីស្លាមជ្រុលនិយមគាំទ្រប៉ាគីស្ថាននៅកាស្មៀមែន តែគ្រប់ចក្ខុកំពុងផ្តោតខ្លាំងទៅលើភ្នាក់ងារសម្ងាត់ប៉ាគីស្ថាន។ លោកនាយករដ្ឋមន្ត្រីឥណ្ឌា ម៉ូឌី បានទាមទារនៅថ្ងៃអង្គារនេះ ឱ្យប៉ាគីស្ថាន ចាត់វិធានការដាច់ណាត់និងបន្ទាន់ភ្លាម លើពួកភេរវជន។
នេះជាលើកទី៥ហើយ ក្នុងរយៈពេល២ឆ្នាំដែលមានការវាយប្រហារយ៉ាងដូច្នេះ។ ច្បាស់ជាមានអ្វីមិនធម្មតាកើតឡើងនៅតាមព្រំដែនជាមួយប៉ាគីស្ថានហើយ ! ប៉ុន្តែចំណោទសំខាន់ខ្លាំង គឺតើឥណ្ឌាគិតយ៉ាងណាចំពោះប៉ាគីស្ថាន បើក្នុងពេលដែលការវាយប្រហារនៅភាគខាងជើងប្រទេសមិនទាំងទាន់ចប់ផង ស្រាប់តែមានការវាយប្រហារតំណាងផលប្រយោជន៍ឥណ្ឌាមួយទៀត នៅអាហ្វហ្កានីស្ថាននោះ ?!
នៅល្ងាចថ្ងៃអាទិត្យទី ៣ មករា មានភេរវកម្មអត្តឃាត បំផ្ទុះគ្រាប់បែកមួយក្រុម នៅមុខសណ្ឋាគារ និងមួយក្រុមទៀតសំរុកចូលទៅក្នុងអាគារដែលមានស្ថានកុងស៊ុលឥណ្ឌាតាំងនៅ។ ភេរវជនបានបាញ់រះទៅលើបុគ្គលិកទូត និងកងរក្សាសន្តិសុខ ដោយប្រើអាវុធធុនធ្ងន់និងគ្រាប់បែកដៃ។ ពុំទាន់មានក្រុមណាចេញមុខទទួលស្គាល់សកម្មភាពវាយប្រហារស្ថានកុងស៊ុលឥណ្ឌាទេ ប៉ុន្តែវាកើតឡើងក្រោយដំណើរទស្សនកិច្ច របស់លោកម៉ូឌី នៅអាហ្វហ្កានីស្ថានដូចគ្នា។ ពួកជ្រុលនិយមអាចមិនពេញនឹងយុទ្ធសាស្ត្ររបស់នាយករដ្ឋមន្ត្រីឥណ្ឌាថ្លែងនៅចំពោះមុខសភាអាហ្វហ្កានីស្ថាន ថ្ងៃទី ២៥ធ្នូដោយចង់ឈ្មុសឈ្មុលទៅរកការបើកកិច្ចសហប្រតិបត្តិការជាមួយប៉ាគីស្ថាន និងអ៊ីរ៉ង់ ដើម្បីស្ថិរភាពអាហ្វហ្កានីស្ថាន។
ការវាយប្រហារភេរវកម្មនេះ មិនមែនជាសកម្មភាពចម្លែកគួរឱ្យភ្ញាក់ផ្អើលទេ ! ភ្នាក់ងារស៊ើបការឥណ្ឌា បានព្យាករថានឹងអាចមានភេរវកម្មឆាប់ៗ ព្រោះជារៀងរាល់លើក ដែលកិច្ចខិតខំប្រឹងប្រែងស្តារសន្តិភាពគឺតែកើតមានការវាយប្រហារភេរវកម្ម មកខ្ទាស់ភ្លាម។ ដូច្នេះឥណ្ឌាគួរតែប្រឈមយកឈ្នះឱ្យបានការប៉ុនប៉ងបំផ្លាញដំណើរការចរចាសន្តិភាព។ រដ្ឋាភិបាលញូវដេលី ត្រូវបន្តកិច្ចខិតខំប្រឹងប្រែងសាងស្ពានសន្តិភាពជាមួយរដ្ឋាភិបាលប៉ាគីស្ថាន ដែលមាននយោបាយស៊ីចង្វាក់គ្នាស្អប់ខ្ពើមកម្ចាត់ឱ្យអស់រាល់ការសាបព្រោះអំពើហិង្សាភេរវកម្ម ទាំងនៅលើទឹកដីឥណ្ឌា និងលើទឹកដីអាហ្វហ្កានីស្ថាន។ ព្រោះសូមរំលឹកថា ឥណ្ឌានិងប៉ាគីស្ថាន តាំងពីបានឯករាជ្យមក ធ្លាប់ធ្វើមានជម្លោះបង្ហូរឈាមគ្នាដល់បួនលើក ហើយក្រៅអំពីវិបត្តិនៅកាស្មៀ ភេរវកម្មនៅបុមបេកាលពីឆ្នាំ២០០៨ នៅតែបន្តបំពុលទំនាក់ទំនងប្រទេសទាំងពីររហូតមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ