ឡាវជ្រើសរើសប្រធានគណបក្សថ្មី ចំពេលធ្វើប្រធានផ្លាស់វេនអាស៊ាន
ក្នុងខណៈដែលប្រទេសកំពុងផ្តើមបង្ហើបទ្វារថ្មមៗ ទៅរកសហគមន៍អន្តរជាតិ ក្នុងនាមជាប្រធានផ្លាស់វេនអាស៊ាន គណបក្សកុម្មុយនិស្តឡាវ បានបើកសមាជជ្រើសរើសប្រមុខបក្សថ្មី។ អាយុ៧៨ឆ្នាំ លោក ប៊ូនហង្ស វ៉ូរ៉ាជីត បានទទួលតួនាទីអគ្គលេខាបក្ស បន្តពីប្រធានចាស់ដែលចូលនិវត្តន៍។ នេះបើតាមសារព័ត៌មានផ្លូវការឡាវចេញផ្សាយនៅថ្ងៃសុក្រទី ២២មករា ២០១៦។
ចុះផ្សាយនៅថ្ងៃ៖
ស្តាប់ - ០១:៥៥
សារព័ត៌មានរដ្ឋ បានបង្ហើបឱ្យដឹងថា សម្រាប់រយៈពេល៥ថ្ងៃ (ពីថ្ងៃទី ១៨-២២មករា) សមាជិកបក្សកុម្មុយនិស្តឡាវ ជិត៧រយនាក់បានចូលរួមបើកសមាជជារៀងរាល់៥ឆ្នាំ ដើម្បីតែងតាំងមេដឹកនាំថ្មី ក្នុងនោះមាន១១នាក់នៅក្នុងជួរគណៈកម្មាធិការកណ្តាលបក្ស ដែលជាតំណាងអំណាចកំពូលរបស់ប្រទេស។
ចំណែកតួនាទីប្រធានបក្សក៏មានផ្លាស់ប្តូរជាប្រាកដ។ លោក ប៊ូនហង្ស វ៉ូរ៉ាជីត អាយុ ៧៨ឆ្នាំ ជាអនុប្រធានបក្ស ត្រូវបានសមាជជ្រើសរើសឱ្យមកស្នងតំណែងបន្តពីលោក ជូមម៉ាលី សាយ៉ាស៊ន អាយុ៧៩ឆ្នាំ អគ្គលេខាបក្សចាស់ តាំងពីឆ្នាំ២០០៦ និងជាប្រធានាធិបតីឡាវ ដែលសម្រេចចិត្តចូលនិវត្តន៍។
បក្សកុម្មុយនិស្តឡាវ បក្សតែមួយគត់ ដែលដឹកនាំប្រទេសតាំងពីឆ្នាំ ១៩៧៥មក តែងតែរក្សាដោយសម្ងាត់ ការបែងចែងអំណាច។ តាំងពី១០ឆ្នាំមកឡាវមានកំណើនសេដ្ឋកិច្ចជាង៧% តែឡាវជាប្រទេសដ៏ក្រីក្របំផុតមួយនៅលើលោក ញាំញី ដោយអំពើពុករលួយ កាប់បំផ្លាញព្រៃឈើ និង ឯកា មិនស្វាគមន៍លោកខាងក្រៅទេ។ ប៉ុន្តែបើតាមអ្នកទទួលខុសត្រូវបស្ចឹមលោកម្នាក់សុំមិនបញ្ចេញឈ្មោះ បានធានាអះអាងថា ថ្វីបើក្រុមចាស់ៗ នៅបន្តកាន់កាប់តួនាទីសំខាន់ៗក៏ដោយ ក៏ឥទ្ធិពលរបស់ពួកគេចាប់ផ្តើមបាត់បង់ខ្លះនៅក្នុងអំណាចកណ្តាល។ អន្តរកាលនយោបាយកំពុងធ្វើដោយសន្សឹមៗ ផ្ទេរទៅឱ្យក្មេងជំនាន់ក្រោយ ដែលបានទៅសិក្សានៅរុស្ស៊ីឬនៅវៀតណាម និងមានទស្សនៈបើកចំហទៅរកបរទេសខ្លះ។
ម្យ៉ាងទៀត ឡាវពេលនេះត្រូវបង្ខំចិត្តបង្ហើបទ្វារ ព្រោះទន្ទឹមនឹងការបើកសមាជលើកទី១០ប្តូរមេដឹកនាំបក្សថ្មីនេះ ឡាវត្រូវធ្វើជាប្រធានផ្លាស់វេនអាស៊ាន។ លោក បារ៉ាក់ អូបាម៉ា នឹងក្លាយជាប្រធានាធិបតីអាមេរិកទីមួយដែលនឹងអញ្ជើញមកកាន់ក្រុងវៀនចន្ទនៅពេលខាងមុខ នាឱកាសជំនួបកំពូលអាស៊ាន។ ចំណែកលោកចនឃែរី ត្រូវអញ្ជើញទៅដល់ប្រទេសឡាវនៅចុងសប្តាហ៍ក្រោយនេះតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ