តើអ្វីជាកម្មវត្ថុចំបងនៃដំណើរទស្សនកិច្ចរបស់ប្រធានាធិបតីបារាំងនៅឥណ្ឌា ?
លោក ប្រធានាធិបតីបារាំង ហ្វ្រង់ស័រ ហូឡង់ បានផ្តើមបំពេញទស្សនកិច្ចផ្លូវរដ្ឋ ជាលើកទីពីរ នៅប្រទេសឥណ្ឌា ចាប់ពីថ្ងៃអាទិត្យទី ២៤ ដល់ថ្ងៃអង្គារទី ២៦មករា ២០១៦។ ជាទស្សនកិច្ចប្រកបដោយនិមិត្តរូបបំផុត និងប្រកបដោយអត្ថន័យនៃការពង្រឹងភាពជាដៃគូយុទ្ធសាស្ត្របារាំង-ឥណ្ឌា។ សម្រាប់លោកប្រធានាធិបតីបារាំង ទស្សនកិច្ចនេះជាឱកាសនៃការបង្ហើយកិច្ចព្រមព្រៀងលក់យន្តហោះចម្បាំង និងរឹតចំណងសេដ្ឋកិច្ច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៥៧
ក្នុងមួយអាណត្តិនេះ ប្រធានាធិបតីបារាំងអញ្ជើញទៅបំពេញទស្សនកិច្ចផ្លូវរដ្ឋនៅប្រទេសឥណ្ឌាដល់ទៅពីរលើក។ ហើយនៅលើកនេះ បើតាមប្រភពស្និទ្ធនឹងវិមានប្រធានាធិបតី គឺជាទស្សនកិច្ចដែលប្រកបដោយនិមិត្តរូបបំផុត។
ទស្សនកិច្ចជាប្រយោជន៍យោធា
លោក ហ្វ្រង់ស័រ ហូឡង់ ត្រូវអញ្ជើញទៅបើកសម្ពោធកម្មវិធីបញ្ចុះសិលា សាងសង់ទីស្នាក់ការ សម្ព័ន្ធព្រះអាទិត្យអន្តរជាតិ ដែលជាសមិទ្ធិដំបូង ប្រសូតចេញពីកិច្ចព្រមព្រៀងស្តីពីអាកាសធាតុ COP២១ ចុះហត្ថលេខានៅទីក្រុងប៉ារីស កាលពីខែធ្នូ ២០១៥។ សម្ព័ន្ធព្រះអាទិត្យ៤៥ប្រទេសនេះ នឹងអនុញ្ញាតឱ្យឥណ្ឌាអាចវិនិយោគថាមពលស្អាតបាន។ ឥណ្ឌាដែលជាប់ឈ្មោះជាអ្នកបញ្ចេញផ្សែងពុលខ្លាំងជាងគេ និងមិនសូវអើពើសោះនឹងការប្រយុទ្ធប្រឆាំងនឹងការប្រែប្រួលអាកាសធាតុនោះ បានក្រលាស់ចិត្តដើរតួជាអ្នកស្វែងរកយុត្តិធម៌ឱ្យអាកាសធាតុ។
ចំណុចសំខាន់មួយទៀត គឺនៅថ្ងៃទី២៦មករាRepublic day ថ្ងៃបុណ្យរដ្ឋធម្មនុញ្ញឥណ្ឌា ដែលបារាំងបានទទួលការអញ្ជើញជាភ្ញៀវកិត្តិយស។ ជាលើកទីមួយ កងទ័ពថ្មើរជើងបារាំង បានចូលរួមដង្ហែក្បួនព្យុះហយាត្រ ក្បែរកងទ័ពឥណ្ឌា។ តើនេះមិនមែនជាសញ្ញានៃការពង្រឹងពង្រីកកិច្ចសហប្រតិបត្តិការ ក្នុងវិស័យយោធាទេឬ ?!
កិច្ចព្រមព្រៀងលក់យន្តហោះចម្បាំង ៣៦គ្រឿង គឺជាប្រធានបទដ៏សំខាន់បំផុត ដែលមិនអាចប្រកែកបាន និងដែល លោក ហ្វ្រង់ស័រ ហូឡង់ សង្ឃឹមថានឹងអាចឈានដល់ការចុះហត្ថលេខា។
គម្រោង តម្លៃរាប់ពាន់លានអឺរ៉ូ បានចាប់ផ្តើម តាំងពីនាយករដ្ឋមន្ត្រីឥណ្ឌាលោក ណារិនដ្រា ម៉ូឌី អញ្ជើញមកបំពេញទស្សកិច្ចនៅក្រុងប៉ារីស កាលពីខែមេសា ២០១៥ ពិតជាមិនអាចត្រូវមើលរំលងបានជាដាច់ខាត ក្នុងដំណើរទស្សនកិច្ចរដ្ឋ។ នៅក្នុងបទសម្ភាសន៍ទៅកាន់ភ្នាក់ងារសារព័ត៌មានឥណ្ឌា មុនពេលចាកចេញទៅឥណ្ឌាបន្តិច លោកហ្វ្រង់ស័រ ហូឡង់ បានបង្ហើបឱ្យដឹងថា “រកឃើញកិច្ចព្រមព្រៀង ស្តីពីទិដ្ឋភាពបច្ចេកទេស ត្រូវការប្រើពេលវេលាយូរបន្តិចហើយ ប៉ុន្តែយើងកំពុងស្ថិតនៅទិសដៅល្អ”។ នៅពេលអញ្ជើញទៅក្រុង ភ្លាម លោកហូឡង់បានអះអាងបន្ថែមទៀត ថា បានឆ្លងរួចមួយដំណាក់ទៀតហើយ ! គ្រប់គ្នាសង្ឃឹមនឹងអាចឈានដល់ការចុះហត្ថលេខាទិញលក់នៅលើនេះ។ រដ្ឋាភិបាលទាំងពីរកំពុងពិភាក្សាគ្នា នៅពេលនេះតែម្តង។
ឆន្ទៈពង្រឹងកិច្ចសហប្រតិបត្តិការសេដ្ឋកិច្ច
ក្នុងពេលដែលលោកប្រធានាធិបតីបារាំងកំពុងបំពេញទស្សនកិច្ចផ្លូវរដ្ឋ មានជំនួបតាមបែបពិធីការការទូត ថ្នាក់ដឹកនាំរដ្ឋាភិបាល នយោបាយ ក៏មានថ្នាក់ដឹកនាំក្រុមហ៊ុនបារាំងធំៗគ្រាក់ៗ ជាង៥០នាក់ បានអមដំណើរជាមួយដែរ។ ទស្សនកិច្ចរដ្ឋ គឺជាឱកាស និងមធ្យោបាយដ៏ប្រពៃសម្រាប់ភាពរលូននៃទំនាក់ទំនងសេដ្ឋកិច្ចរវាងប្រទេសទាំងពីរ។ គ្រាន់តែទៅដល់ឥណ្ឌាភ្លាម លោកហូឡង់ បានអញ្ជើញចូលរួមក្នុងវេទិកាសេដ្ឋកិច្ច CEO Forum ដើម្បីឱ្យប្រយោជន៍ដល់ក្រុមហ៊ុនបារាំង។
ចូរកុំភ្លេចមួយថា សេដ្ឋកិច្ចឥណ្ឌាមានសុខភាពល្អ និងភាពទាក់ទាញណាស់ ! ឥណ្ឌាអាចនឹងវ៉ារចិនបាននាអនាគតដ៏ខ្លីខាងមុខ ក្លាយជាប្រទេសមានប្រជាជនច្រើនជាងគេលើពិភពលោក (១៣០០លាននាក់)។ ខាងផ្នែកសន្ទុះសេដ្ឋកិច្ចវិញ ឥណ្ឌាមានកំណើនប្រចាំឆ្នាំ៧% បូកនឹងកំណើនពលរដ្ឋលឿនទៀត ពិតជាអាចទាក់ទាញទំនុកចិត្តអ្នកវិនិយោគបានណាស់។
រដ្ឋាភិបាលឥណ្ឌាបានវាយតម្លៃសេចក្តីត្រូវការវិនិយោគ ក្នុងវិស័យហេដ្ឋារចនាសម្ព័ន្ធ ថាមានដល់ទៅ ៦៨០ពាន់លានអឺរ៉ូ ក្នុងរយៈពេល២០ឆ្នាំខាងមុខ។ ថាមពល ដឹកជញ្ជូន អភិវឌ្ឍន៍ក្រុង-ជនបទ សុទ្ធសឹងជាវិស័យដែលក្រុមហ៊ុនបារាំងមានជំនាញខ្លាំងទាំងអស់។
គំរូស្ថាបត្យកម្មបារាំង
ជាក់ស្តែង នៅក្នុងថ្ងៃទីមួយនេះ លោកហ្វ្រង់ស័រហូឡង់បានផ្តើមទស្សនកិច្ចនៅខេត្តChandigarh ជើងភ្នំហេមនព្វានHimalaya។ ខេត្តដែលសាងសង់និងគូសប្លង់នគរូបនីយកម្មក្រុងដោយស្ថាបត្យករបារាំង នាទសវត្សរ៍ឆ្នាំ៥០ ក្រោយឥណ្ឌាបានទទួលឯករាជ្យ។ ជាក្រុងដែលមានសំណង់ទាបៗ មិនលើសពី៥ជាន់ និងកាលណោះ សង់ឡើងសម្រាប់ពលរដ្ឋ ១៥០០០០នាក់ តែទោះបីមានកំណើនប្រជាជនលើស១០ដងហើយ ក៏នៅតែគ្មានការកកស្ទះ ឬភាពចង្អៀតចង្អល់ទេ ព្រមទាំងអាចធ្វើទំនើបកម្មបានយ៉ាងស្រួលទៀត។
លោកប្រធានាធិបតីបារាំង អមដំណើរដោយប្រតិភូជាប្រធានក្រុមហ៊ុន អញ្ជើញទៅគោរពវិញញ្ញាណក្ខន្ធស្ថាបត្យករបារាំង-ស្វ៊ីស លោក Le Corbusier ពិតជាមានបង្កប់អត្ថន័យណាស់សម្រាប់នៃចំណងទំនាក់ទំនងបារាំង-ឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ