នាយករដ្ឋមន្រ្តីឥណ្ឌាផ្តើមទស្សនកិច្ចនៅអឺរ៉ុប ដោយចាប់ផ្តើមជាមួយបារាំង
ពីមនុស្សដែលគេមិនស្វាគមឲ្យជាន់ទឹកដីបារាំង មកជាមេដឹកនាំឥណ្ឌា ដែលប្រទេសបារាំង លាកម្រាលព្រំក្រហមចាំទទួល។ នៅថ្ងៃ សុក្រនិងថ្ងៃសៅរ៍ ទី ១១ មេសា នាយករដ្ឋមន្រ្តីឥណ្ឌា លោក ណារិនដ្រា ម៉ូឌី នឹងចាប់ផ្តើមទស្សនកិច្ចជាលើកទីមួយ ក្នុងប្រទេសបារាំង មុននឹងចេញដំណើរទៅប្រទេសអាល្លឺម៉ង់ នៅថ្ងៃអាទិត្យ។ លោកនាយករដ្ឋមន្រ្តី នឹងប្រើទស្សនកិច្ចមួយជុំនៅ អឺរ៉ុប ដើម្បី អូសទាញក្រុមវិនិយោគបរទេស ទៅក្នុងប្រទេសឥណ្ឌា។
ចុះផ្សាយនៅថ្ងៃ៖
ស្តាប់ - ០២:៣០
នៅក្នុងទស្សនកិច្ចរយៈពេល ២ថ្ងៃ ប្រមុខដឹកនាំឥណ្ឌា គ្រោងនឹងលើកនិយាយជាមួយសមភាគីបារាំង ពីកិច្ចសហប្រតិបត្តិការរវាងប្រទេសទាំងពីរ ក្នុងវិស័យអវកាស និងកម្មវិធីនុយក្លេអ៊ែរ។
ដំណើរទស្សនកិច្ចផ្លូវរដ្ឋរបស់លោកនាយករដ្ឋមន្រ្តី ណារិនដ្រា ម៉ូឌី ជាឱកាសបើកផ្លូវ ធ្វើឲ្យលោកណារិនដ្រា ម៉ូឌីផ្ទាល់ត្រូវត្រលប់ទៅជានឹងរដ្ឋាភិបាលបារាំងឡើងវិញ។ លោកណារិនដ្រា ម៉ូឌី ធ្លាប់ត្រូវបានអាជ្ញាធរបារាំង ប្រកាសមិនស្វាគមឲ្យជាន់ទឹកដី ដោយសារតែ លោកម៉ូឌី ក្នុងនាមជា ប្រធានរដ្ឋ គូចារ៉ាត់ ធ្លាប់ចូលរួម ជំរុញ ឲ្យមានកុបកម្ម ឈ្លោះគ្នាដ៏ហិង្សា រវាងអ្នកកាន់សាសនាហិណ្ឌូ និងអ៊ីស្លាម ដែលបានសម្លាប់មនុស្ស ប្រមាណ ២ពាន់នាក់ កាលពីឆ្នាំ ២០០២។
១២ ឆ្នាំក្រោយ លោកណារិនដ្រា ម៉ូឌី បានឈ្នះឆ្នោត ក្លាយជានាយករដ្ឋមន្រ្តីឥណ្ឌា រដ្ឋាភិបាលបារាំងបើកដៃ ស្វាគមលោក យ៉ាងពេញទំហឹង នៅក្នុងទឹកដីបារាំង។ សក្តានុពលសេដ្ឋកិច្ចរបស់ឥណ្ឌា ដែលជាមហាអំណាចសេដ្ឋកិច្ចទីពីរ បន្ទាប់ ពីចិន នៅអាស៊ី ជាកត្តាមួយសំខាន់ធ្វើឲ្យរដ្ឋាភិបាលបារាំងត្រូវបិទទំព័រចាស់ និងបោះដៃរាក់ទាក់លោកណារិនដ្រា ម៉ូឌី។
ក្នុងទឹកដីបារាំង លោកនាយករដ្ឋមន្រ្តីឥណ្ឌា គ្រោងនឹងពិភាក្សា ជាមួយប្រធានាធិបតីបារាំង លោកហ្វ្រង់ស័រ ហូឡង់ពីការសហការរវាងប្រទេសទាំងពីរ ក្នុងវិស័យការពារជាតិ នុយក្លេអ៊ែរ និងឧស្សាហកម្ម ជាពិសេស កិច្ចសន្យាលក់យន្តហោះចម្បាំង របស់បារាំង Rafale ដែលឥណ្ឌា និងបារាំង បានចរចាគ្នា អស់៣ឆ្នាំមកហើយ។
គួរបញ្ជាក់ថា ឥណ្ឌាកំពុងស្វែងរកទិញយន្តហោះចម្បាំងទំនើបៗ ដើម្បីជំនួសយន្តហោះចម្បាំងចាស់ៗរបស់ខ្លួន ធុន Sukhoi របស់រុស្ស៊ី។ នៅឆ្នាំ ២០១២ ឥណ្ឌាបានបើកការចរចា ទិញយន្តហោះចម្បាំងបារាំង ធុន Rafale ចំនួន ១២៦គ្រឿង ក្នុងតម្លៃ ២០ពាន់លានអឺរ៉ូ។ ក្នុងចំណោម ១២៦គ្រឿអ ១៨គ្រឿង ត្រូវផលិតនៅបារាំង ចំណែក ១០៨គ្រឿងទៀត ត្រូវផលិតនៅឥណ្ឌា ក្រោមកិច្ចសហប្រតិបត្តិការផលិតរួមគ្នា រវាងក្រុមហ៊ុនរដ្ឋបារាំង និងក្រុមហ៊ុនរដ្ឋឥណ្ឌា។
រដ្ឋាភិបាលឥណ្ឌាត្រូវការបច្ចេកវិទ្យា និងការវិនិយោគរបស់អឺរ៉ុប ជាពិសេស បារាំង ដើម្បីពង្រឹងវិស័យឧស្សាហកម្មរបស់ខ្លួន។ ការផលិតយន្តហោះចម្បាំង មួយភាគធំ នៅក្នុងទឹកដីឥណ្ឌា នឹងធ្វើឲ្យឥណ្ឌាបានទទួលចំណេះបច្ចេកវិទ្យាអវកាសពីបារាំង និងបង្កើតការងារធ្វើ រាប់ម៉ឺនសម្រាប់ប្រជាជនឥណ្ឌា។ រហូតមក កិច្ចសន្យាហាក់ជាប់គាំង ដោយសារឥណ្ឌាវាយតម្លៃថា យន្តហោះចម្បាំងបារាំងមានតម្លៃ ថ្លៃជាងយន្តហោះរបស់ក្រុមហ៊ុនប្រកួតប្រជែងផ្សេងទៀត។
យោងតាមកាសែតក្នុងស្រុកឥណ្ឌា រដ្ឋាភិបាលឥណ្ឌាទំនងនឹងជំរុញឲ្យការចរចាកិច្ចសន្យាទិញយន្តហោះ Rafale បោះជំហានទៅមុខ ដោយឥណ្ឌា អាចពិចារណា ទិញយន្តហោះ ចម្បាំង ៤០គ្រឿង ជាជាង ១៨គ្រឿង ដើម្បីទៅបំពាក់ភ្លាមៗ កងទ័ពអាកាសឥណ្ឌា។ នៅថ្ងៃសៅរ៍ លោកនាយករដ្ឋមន្រ្តីនឹងធ្វើដំណើរទៅទីក្រុងទូលូស ភាគខាងត្បូងបារាំង ដើម្បីទស្សនា រោងចក្រផលិតយន្តហោះAirbus ដែលមានរោងចក្រដំឡើង មួយដែរ នៅប្រទេសឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ