តុលាការភូមាដាក់ទោសអតីតមេដឹកនាំបដិវត្តសង្ឃ ជាប់ពន្ធនាគារ៦ខែ
អតីតមេដឹកនាំធ្វើបដិវត្តសង្ឃម្នាក់ ត្រូវបានតុលាការភូមា កាត់ទោសនៅថ្ងៃអង្គារនេះ ឱ្យជាប់ពន្ធនាគារ៦ខែ ពីបទរំលោភច្បាប់អន្តោប្រវេសន៍។ ជាសាលក្រមដ៏ភ្ញាក់ផ្អើល និងគួរឱ្យហួសចិត្តបំផុតសម្រាប់ក្រុមអ្នកការពារសិទ្ធិមនុស្ស នៅប្រទេសភូមាដែលទើបមានរដ្ឋាភិបាលថ្មីជាអ្នកប្រជាធិបតេយ្យ។
ចុះផ្សាយនៅថ្ងៃ៖
Nyi Nyi Lwin ឬ ភិក្ខុ ហ្កំប៊ីរ៉ា កាលនៅជាសង្ឃ ត្រូវបានតុលាការភូមាកាត់ទោសជាផ្លូវការដាក់ពន្ធនាគារ រយៈពេល៦ខែ ចំពោះទង្វើរំលោភច្បាប់អន្តោប្រវេសន៍ បន្ទាប់ពីបានចាប់ខ្លួនអតីតសង្ឃរូបនោះ កាលពីដើមឆ្នាំ២០១៦ នៅពេល នីនីល្វីន ត្រលប់ពីប្រទេសថៃចូលស្រុកកំណើតវិញ។ លោកបានបញ្ជាក់ព័ត៌មាននេះ តាមទូរស័ព្ទមកកាន់ភ្នាក់ងារសារព័ត៌មានបារាំង AFP។ តែ ភ្នាក់ងារពុំអាចទាក់ទងបាន ដូចទម្លាប់ តុលាការក្រុងម៉ាង់ដាល័យ ដើម្បីសុំព័ត៌មានលម្អិតបន្ថែមបានឡើយ។
សំណុំរឿងកាត់ទោសនេះ បានធ្វើឱ្យគេនឹកឃើញដល់សវនាការនយោបាយ ឆ្ពិនភ្នែករបស់រដ្ឋាភិបាលសឹកភូមា ដែលតែងតែប្រើមធ្យោបាយ ស្វាលាបមាត់ពពែ ឬលើកមូលហេតុមិនសមហេតុផល មកចោទប្រកាន់។ នេះជាការរិះគន់របស់អង្គការការពារសិទ្ធិមនុស្ស Human Rights Watch ដែលអំពាវនាវឱ្យរដ្ឋាភិបាលលោកស្រី អ៊ុងសានស៊ូជី ដែលកំពុងកាន់អំណាច ធ្វើកំណែទម្រង់ប្រព័ន្ធតុលាការដ៏ចាស់គំរិល បែបរបបសឹក។
សូមបញ្ជាក់ថា ដោយមានបញ្ហាសុខភាពផ្លូវចិត្ត បន្ទាប់រងទោសទណ្ឌកម្មក្នុងពន្ធនាគារអស់ជាច្រើនឆ្នាំ នីនីល្វីន បានទៅស្នាក់ព្យាបាលខ្លួននៅប្រទេសថៃជិតខាង។ នេះបើតាមការបញ្ជាក់របស់ ល្វីនល្វីនម៉ា ជាបងស្រី ដែលមិនយល់អំពីមូលហេតុនៃការចាប់ខ្លួននិងកាត់ទោសប្អូនប្រុស។
កាលពីឆ្នាំ២០០៧ នីនីល្វីន ឬ ហ្កំប៊ីរ៉ា ដែលជាសង្ឃ បានចូលរួមធ្វើបដិវត្តសង្ឃ ប្រឆាំងនឹងការឡើងថ្លៃប្រេងឥន្ទនៈ ដែលបានអង្រួនប្រទេសភូមាទាំងមូលឱ្យធ្លាក់ក្នុងអំពើហិង្សា និងការបង្ក្រាបយ៉ាងឃោរឃៅពីសំណាក់អាជ្ញាធរសឹក។ បាតុករ សង្ឃជាច្រើនអង្គ ដែលជាអ្នកផ្តួចផ្តើមដឹកនាំធ្វើបដិវត្ត បានស្លាប់ និងចាប់ខ្លួនជាច្រើននាក់។ ហ្កំប៊ីរ៉ា ទើបត្រូវបានដោះលែងឱ្យមានសេរីភាព ជាមួយអ្នកទោសនយោបាយជាងមួយនាក់ផ្សេងទៀត កាលពីឆ្នាំ២០១២ នាឱកាសដែលរដ្ឋាភិបាលសឹកបានស្ម័គ្រចិត្តដឹកនាំប្រទេសឆ្លងអន្តរកាលទៅរកលទ្ធិប្រជាធិបតេយ្យ។
ស្ថានភាពប្រទេសភូមាក៏បានប្រែក្រឡាស់តាំងពីពេលនោះមក លោកស្រីអ៊ុងសានស៊ូជីផ្ទាល់ ដែលធ្លាប់រស់ក្នុងការឃុំឃាំងអស់រយៈពេល១៥ឆ្នាំ បានក្លាយជាអ្នកដឹកនាំប្រទេស បន្ទាប់ពីបានទទួលជោគជ័យយ៉ាងត្រចះត្រចង់ ក្នុងសម័យបោះឆ្នោតសភា ខែវិច្ឆិកា ២០១៥ និងបានធ្វើការដោះលែងអ្នកទោសនយោបាយជិតមួយរយនាក់កាលពីសប្តាហ៍មុនសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ