ចិនធ្វើសមយុទ្ធព្រមានតៃវ៉ាន់មួយថ្ងៃមុនលោកស្រីប្រធានាធិបតីចូលកាន់តំណែង
ក្នុងខណៈដែលតៃវ៉ាន់កំពុងត្រៀមទទួលមេដឹកនាំប្រទេសថ្មីចូលកាន់តំណែង ជាផ្លូវការ កងទ័ពចិនបានបើកធ្វើសមយុទ្ធយោធាមួយ នៅតាមបណ្តោយឆ្នេរ ក្នុងទម្រង់ជាប្រតិបត្តិការវាយលុក លើកោះមួយ។ នេះបើតាមការផ្សព្វផ្សាយរបស់ប្រព័ន្ធឃោសនារដ្ឋ ដែលបង្កប់ដោយអត្ថន័យព្រមានដល់សកម្មជនទាមទារឯករាជ្យតៃវ៉ាន់ និងដល់លោកស្រីប្រធានាធិបតីតៃវ៉ាន់ថ្មី។ លោកស្រី ត្សៃអ៊ីងវេន ដែលល្បីខាងមាននយោបាយប្រឆាំងក្រុងប៉េកាំង ត្រូវចូលកាន់តំណែងប្រធានាធិបតីតៃវ៉ាន់ជាផ្លូវការនៅថ្ងៃសុក្រទី ២០ឧសភា ខានស្អែកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ដៃកាន់កាំភ្លើង ទាហានចិនរុលទៅមុខឡើងតាមឆ្នេរ ជំនួយដោយទ័ពរថក្រោះ និងឧទ្ធម្ភាគចក្រយោធា បាញ់រះបើកផ្លូវសំដៅកូនភ្នំ តាមមាត់សមុទ្ទ ... ទាំងនេះគឺជារូបភាពនិងសកម្មភាពយោធាចិនធ្វើសមយុទ្ធ ដែលមានចាក់បញ្ចាំងក្នុងកញ្ចក់ទូរទស្សន៍ជាតិ កាលពីយប់ថ្ងៃអង្គារម្សិលមិញ។
សមយុទ្ធនេះ បានរៀបចំធ្វើនៅខេត្តហ្វូជាន ទល់មុខតៃវ៉ាន់ ចម្ងាយពីគ្នាប្រមាណតែ១៦០គីឡូម៉ែត្រតែប៉ុណ្ណោះ។ យោងតាមកាសែតChina Daily គិតចាប់ពីដើមខែឧសភាមក ក្រសួងការពារជាតិចិនបានរៀបចំធ្វើសមយុទ្ធបែបនេះបីលើកហើយ នៅតាមបណ្តោយឆ្នេរភាគអាគ្នេយ៍ប្រទេស ជិតបង្កើយនឹងកោះតៃវ៉ាន់ ដើម្បីព្រមាន និងគំរាមច្បាស់ៗដល់ ដល់សកម្មជនណាដែលចង់បានតៃវ៉ាន់ឯករាជ្យ និយាយឱ្យចំគឺគំរាមលោកស្រីប្រធានាធិបតីតៃវ៉ាន់ថ្មី ដែលត្រូវឡើងកាន់តំណែងជាផ្លូវការ នៅថ្ងៃសុក្រនេះ។
លោកស្រី ត្សៃអ៊ីន វេន អ្នកឯករាជ្យនិយម មិនដែលបានថ្លែងឬបញ្ចេញមតិជាសាធារណៈ ទាមទារឯករាជ្យឱ្យតៃវ៉ាន់ទេ ប៉ុន្តែបានអំពាវនាវឱ្យប៉េកាំងរក្សាស្ថានភាពទំនាក់ទំនងចិន-តៃវ៉ាន់នៅដដែល ដោយគ្មានគិតពីនបំបែកពីគ្នាជាផ្លូវការ និងក៏គ្មានដែរការបង្រួបបង្រួមចិនតែមួយ។ ក្នុងសម័យបោះឆ្នោតប្រធានាធិបតី កាលពីខែមករា លោកស្រី ត្សៃអ៊ីង វេន បានឈ្នះឆ្នោតយ៉ាងត្រចះត្រចង់លើបក្ស គួមីនតាំង- បក្សកាន់អំណាចដែលបានសាកល្បងអស់រយៈពេល៨ឆ្នាំ ខិតចូលជិតចិន តែមិនបានសម្រេច។
តៃវ៉ាន់ បានផ្តាច់ខ្លួនចេញពីចិនដីគោក តាំងពីចាញ់សង្គ្រាមស៊ីវិលឆ្នាំ១៩៤៩។ ប៉ុន្តែប៉េកាំង នៅតែចាត់ទុកតៃវ៉ាន់ជាចំណែកមួយរបស់ចិន និងមិនរអានឹងប្រើកម្លាំងយោធាវាយយកទេ ប្រសិនបើកោះនេះហ៊ានងើបទាមទារឯករាជ្យ។
ប៉ុន្តែនៅព្រឹកថ្ងៃពុធនេះ ក្រសួងការពារជាតិ បានចេញសារមួយបដិសេធថា សមយុទ្ធនេះជាលំហាត់ប្រចាំឆ្នាំរបស់យោធាចិន គ្មានកម្មវត្ថុពិសេស ឬក្នុងអត្ថន័យប្រឆាំងនឹងលោកស្រី ត្សៃអ៊ីង វេនឡើយ។ គេមិនត្រូវចេះតែបកស្រាយព្រលាត់ខុសពីការពិតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ