សមុទ្រចិនខាងត្បូង៖អឺរ៉ុប និងអាមេរិកអំពាវនាវឲ្យចិនគោរពតាមសេចក្តីសម្រេចរបស់តុលាការក្រុងឡាអេ
សហភាពអឺរ៉ុប និងសហរដ្ឋអាមេរិកបានអំពាវនាវឲ្យចិនគោរពតាមសេចក្តីសម្រេចរបស់តុលាការអចិន្រ្តៃយ៍នៃអាជ្ញាកណ្តាលក្រុងឡាអេទាក់ទងនឹងជម្លោះនៅសមុទ្រចិនខាងត្បូង។ ការអំពាវនាវនេះបានធ្វើឡើងនៅថ្ងៃអង្គារ ទី១២ កក្កដា បន្ទាប់ពីតុលាការក្រុងឡាអេបានសម្រេចឲ្យហ្វីលីពីនឈ្នះចិននៅក្នុងបណ្តឹងដែលហ្វីលីពីនក្នុងជំនាន់លោកប្រធានាធិបតីអាគីណូបានប្តឹងចិនកាលពីឆ្នាំ ២០១៣។
ចុះផ្សាយនៅថ្ងៃ៖ កែប្រែថ្ងៃទី៖
ការអំពាវនាវរបស់អឺរ៉ុបឲ្យចិនគោរពតាមសេចក្តីសម្រេចរបស់តុលាការអចិន្រ្តៃយ៍នៃអាជ្ញាកណ្តាលក្រុងឡាអេត្រូវបានធ្វើឡើងដោយលោកដូណាល់ ទូស្ក ប្រធានក្រុមប្រឹក្សាអឺរ៉ុបនៅក្នុងជំនួបកំពូលចិន អឺរ៉ុបរៀបចំក្នុងទីក្រុងប៉េកាំង។ លោកទូស្កបានស្នើចិនដែលជាមហាអំណាចសេដ្ឋកិច្ចទី២ ក្នុងលោកឲ្យចូលរួមជួយការពារសណ្តាប់ធ្នាប់អន្តរជាតិដោយផ្អែកលើមូលដ្ឋានច្បាប់។ ច្បាប់ និងបទបញ្ជាអន្តរជាតិដែលលោកទូស្កយល់ថា បាននាំផលចំណេញដល់មនុស្សលោកគ្រប់គ្នា។ ដោយមិនចោទចិនត្រង់ៗទាក់ទងនឹងការវាតទីរបស់ចិននៅក្នុងសមុទ្រចិនខាងត្បូង លោកប្រធានក្រុមប្រឹក្សាអឺរ៉ុបរូបនេះដដែលបានយល់ឃើញថា អឺរ៉ុប និងចិនមានផលប្រយោជន៍ និងមានកាតព្វកិច្ចរួមគ្នាក្នុងការការពារ និងការគោរពច្បាប់អន្តរជាតិ។
ជាការឆ្លើយតបវិញ លោកនាយករដ្ឋមន្រ្តីចិនលី ខឺជាំងដែលបានទទួលជួបលោកដូណាល់ ទូស្តបានប្រើភាសាទូតដោយគូសបញ្ជាក់ថា ជំនួបរវាងលោក និងលោកទូស្តជាសក្ខីកម្មមួយដែលបញ្ជាក់យ៉ាងច្បាស់ពីដៃគូយ៉ាងសំខាន់របស់មហាអំណាចទាំងពីរក្នុងការការពារសន្តិភាព និងការអភិវឌ្ឍន៍ពិភពលោក។ តែទន្ទឹមគ្នានេះ និងដើម្បីសំដែងការមិនសប្បាយចិត្តរបស់ខ្លួនចំពោះប្រតិកម្មរបស់អឺរ៉ុបទាក់ទងនឹងសេចក្តីសម្រេចរបស់តុលាការក្រុងឡាអេដែលឲ្យហ្វីលីពីនឈ្នះចិន រដ្ឋាភិបាលក្រុងប៉េកាំងបានសម្រេចលប់ចោលកម្មវិធីសន្និសីទកាសែតរួមគ្នាជាមួយថ្នាក់ដឹកនាំអឺរ៉ុប។
ក្រៅពីប្រតិកម្មរបស់អឺរ៉ុប អាមេរិកតាមរយៈក្រសួងការបរទេសក៏បានជំរុញឲ្យចិនគោរពតាមសេចក្តីសម្រេចរបស់តុលាការអចិន្រ្តៃយ៍នៃអាជ្ញាកណ្តាលក្រុងឡាអេដែរ។ ក្រសួងការបរទេសអាមេរិកយល់ឃើញថា សេចក្តីសម្រេចរបស់តុលាការក្រុងឡាអេជាការរួមវិភាគទានយ៉ាងសំខាន់នៅក្នុងដំណោះស្រាយជម្លោះសមុទ្រចិនខាងត្បូងដែលចិនកំពុងតទល់នឹងប្រទេសអាស៊ីមួយចំនួនក្នុងតំបន់ រួមមានហ្វីលីពីន វៀតណាម ម៉ាឡេស៊ី និងព្រុយណេ។ គួរបញ្ជាក់ជូនថា បណ្តឹងដែលហ្វីលីពីនប្តឹងចិនក្នុងឆ្នាំ ២០១៣ ជាបណ្តឹងក្នុងជំនាន់លោកប្រធានាធិបតីហ្វីលីពីនអាគីណូ។ លោកអាគីណូដែលមិនញញើតនឹងប្រឈមមុខដាក់ចិនដោយអាងអាមេរិកនៅពីក្រោយ។
តែនៅក្នុងជំនាន់លោកប្រធានាធិបតីថ្មីសព្វថ្ងៃ លោកឌុយទែរតេបានប្រើនយោបាយសម្របសម្រួលដោយស្នើឲ្យមានការចរចាផ្ទាល់ជាមួយចិន ព្រមទាំងស្ម័គ្រចិត្តចែកប្រយោជន៍ជាមួយចិននៅសមុទ្រចិនខាងត្បូងទៀត។ អ៊ីចឹងបានជានៅក្រោយការសម្រេចរបស់តុលាការក្រុងឡាអេដែលឲ្យចិនចាញ់ រដ្ឋាភិបាលរបស់លោកឌុយទែរតេមិនបានបញ្ចេញប្រតិកម្មត្រេកត្រអាលខ្លាំងដែលជាការចំអកឡកឡឺយនាំឲ្យចិនក្តៅក្រហាយកាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ