ក្រោយប្រជាមតិ គណបក្សប្រឆាំងថៃរបស់ត្រកូលស៊ីណាវ៉ាត់ចូលពួនកៀនជញ្ជាំង ?!
ចុះផ្សាយនៅថ្ងៃ៖
ស្តាប់ - ០៤:២៣
លោកស្រីយីងឡាក់ អតីតប្រមុខរដ្ឋាភិបាលថៃ ដែលត្រូវដួលរំលំដោយរដ្ឋប្រហារកាលពីឆ្នាំ២០១៤ បានថ្ងូចថ្ងូរ នៅថ្ងៃចន្ទនេះ ថាថៃ កំពុងដើរថយក្រោយ តាមរយៈការបោះឆ្នោតប្រជាមតិទទួលយករដ្ឋធម្មនុញ្ញថ្មី។ ប៉ុន្តែនេះជាសេចក្តីសម្រេចចិត្តរបស់ពលរដ្ឋ ឯចំណែកបក្ស ដែលដឹកនាំ លោកស្រី ក្នុងនាមជាបក្សប្រឆាំងនៅពេលបោះឆ្នោតជាតិ នាពេលខាងមុខ កំពុងស្ថិតក្នុងជំហរទន់ខ្សោយបំផុត។
សករាជដែលត្រកូលស៊ីណាវ៉ាត់ មានអំណាច ប្រមូលជោគជ័យក្នុងការបោះឆ្នោតជាតិ ជារៀងរហូត តាំងពីឆ្នាំ២០០១ មក ទំនងជាឈានចូលដល់អវសាន្តបណ្តើរៗហើយ។ ទៅថ្ងៃអនាគត និងក្នុងរយៈពេលយូរតទៅមុខទៀត ក្រុមយោធាថៃ នឹងបន្តជាដឹកមុខនយោបាយរហូត បើទោះបីជាមានការបោះឆ្នោតក៏ដោយ នេះបើតាមរដ្ឋធម្មនុញ្ញថ្មី។
កូនអុកពេលនេះស្ថិតនៅក្នុងដៃរបបសឹក ! ជាមួយនឹងលទ្ធផលប្រជាមតិ គាំទ្ររដ្ឋធម្មនុញ្ញថ្មីដល់ទៅជាង៦០% រដ្ឋាភិបាលសឹក មានអំណាចពេញដៃ ក្នុងការកំណត់កម្មវិធី និងប្រព័ន្ធនយោបាយ ទប់មិនឱ្យត្រកូលស៊ីណាវ៉ាត់ បានឡើងកាន់អំណាចដឹកនាំប្រទេសទេ ទោះបីឈ្នះឆ្នោតជាតិក៏ដោយ ព្រោះមានព្រឹទ្ធសភា ប្រសូតចេញពីការតែងតាំងរបស់ពួកយោធា ជាអ្នកចាំរារាំង។
“ខ្ញុំសោកសៅណាស់ ដែលប្រទេសថៃដើរត្រឡប់ក្រោយ ទៅប្រកាន់យករដ្ឋធម្មនុញ្ញគ្មានប្រជាធិបតេយ្យ » ប៉ុន្តែ “ខ្ញុំគោរពការសម្រេចចិត្តរបស់ប្រជាជន »។ នេះជាប្រសាសន៍ចុះចាញ់របស់លោកស្រី យីងឡាក់ ស៊ីណាវ៉ាត់ ដោយមិនហ៊ានទាំងរិះគន់បរិហារការលួចបន្លំសន្លឹកឆ្នោតអ្វីទាំងអស់ ឬអំពាវនាវហៅសកម្មជន អាវក្រហមធ្វើបាតុកម្មទេ។
មានប្រជាពលរដ្ឋថៃមិនដល់៤០%ផងបានច្រានចោលរដ្ឋធម្មនុញ្ញថ្មី។ ហើយជាងនេះទៅទៀត នៅតំបន់ភាគឦសាន ដែលមានប្រពៃណីគាំទ្រភ្លូកទឹកភ្លូកដីត្រកូលស៊ីណាវ៉ាត់នោះ បែរជាសម្តែងមតិប្រឆាំងនឹងរដ្ឋធម្មនុញ្ញថ្មី ត្រឹមតែ៥១%ប៉ុណ្ណោះ។ លទ្ធផលបែបនេះអាចចាត់ទុកជាការវាយសំពងយ៉ាងដំណំលើគ្រួសារមហាសេដ្ឋីស៊ីណាវ៉ាត់។
ត្រកូលស៊ីណាវ៉ាត់ តាំងពីលោកថាក់ស៊ីន ដល់លោកស្រី យីងឡាក់ ធ្លាប់តែឈ្នះយ៉ាងត្រចះត្រចង់លើរាល់គ្រប់ការបោះឆ្នោត ប៉ុន្តែតាំងពីរដ្ឋប្រហារឆ្នាំ២០១៤មក បក្សពួកនេះ មូរមុខ សំងំធ្វើចាញ់ រង់ចាំការបោះឆ្នោតជាតិ ដែលរបបសឹកសន្យារៀបចំធ្វើនៅឆ្នាំ២០១៧។
មើលទៅហាក់ដូចជាមានការស្រុះស្រួលគ្នា ជុំវិញទស្សនៈមួយគឺកុំបំពុលស្ថានការណ៍ប្រទេសជាតិ។ គោលដៅចំបងគឺបណ្តោយឱ្យរបបសឹកនាំមុខសិននៅពេលនេះ ដើម្បីធ្វើយ៉ាងណាឱ្យខាងតែមានការរៀបចំបោះឆ្នោតថ្មីលេចជារូបរាងប្រាកដ។ ទោះរបបសឹកអនុម័តរដ្ឋធម្មនុញ្ញថ្មីក៏មិនអី ព្រោះនេះគ្រាន់តែជារដ្ឋធម្មនុញ្ញទី២០ប៉ុណ្ណោះ គិតចាប់ពីឆ្នាំ១៩៣២មក។
អ្នកវិភាគនយោបាយក្រុងបាងកកជាច្រើន យល់ថា ប្រជាពលរដ្ឋថៃ សុខចិត្តព្រមទទួលរដ្ឋធម្មនុញ្ញថ្មី ដោយមានក្តីសង្ឃឹមកប់ក្នុងចិត្តថានឹងមានការបោះឆ្នោតថ្មី នៅឆ្នាំ ក្រោយ ឬយ៉ាងយូរនៅដើមឆ្នាំ២០១៨។ នៅថ្ងៃអង្គារទី ៩ សីហា ក្រោយឈ្នះឆ្នោតប្រជាមតិភ្លាម លោកប្រាយុទ្ធចាន់អូចា កាន់តែមានទឹកមាត់ បានចេញមុខធ្វើសុន្ទរកថាធានាបញ្ជាក់ជាថ្មី ទៀត ថានឹងមានរដ្ឋាភិបាលថ្មីប្រសូតចេញការបោះឆ្នោត ដែលនឹងប្រព្រឹត្តទៅឆ្នាំ២០១៧ ដូចធ្លាប់បានសន្យា។
សូមបញ្ជាក់ថា ក្រៅវិបត្តិនយោបាយនេះ ក្នុងសតិអារម្មណ៍ពលរដ្ឋថៃ មានលាក់ក្តីកង្វល់មួយទៀត គឺការស្នងរាជ បន្តពីស្តេចភូមិបុល ព្រះជន្ម៨៨វស្សា ដែលជរាមានរោគាខ្លាំង និងក៏ជាប្រភពនៃអស្ថិរភាពជាតិមួយដែរ។ ពួកយោធាចេញមុខធ្វើរដ្ឋប្រហារទម្លាក់លោកស្រី យីងឡាក់ បន្ទាប់មកធ្វើប្រជាមតិកែប្រែរដ្ឋធម្មនុញ្ញ ក្រោមផ្លាកតែមួយគឺដើម្បីបុព្វហេតុការពាររាជវង្ស ! ដូច្នេះចង់ឬមិនចង់ប្រជាពលរដ្ឋថៃដែលធ្លាប់គោរពស្តេចដូចព្រះ ត្រូវតែគាំទ្រពួកយោធា ជួយប្រទេសជាតិឆ្លងកាត់អន្តរកាលព្យុះភ្លៀងនេះសិន។
មួយចំណែកទៀត សំឡេងឆ្នោតលើកនេះ ក៏ជាការសម្តែងឱ្យឃើញអំពីការនឿយណាយ ខកចិត្ត នឹងរដ្ឋាភិបាលស៊ីវិល នារយៈពេលប៉ុន្មានឆ្នាំចុងក្រោយនេះ ដែលឃើញមានតែប្រទាញប្រទង់គ្នាខ្លាំង យកថ្នល់ជាស្ពានតវ៉ា រវាងម្ខាងជាក្រុមអាវក្រហម ជាអ្នកជនបទ ជាសកម្មជនរបស់អតីតនាយករដ្ឋមន្ត្រី ថាក់ស៊ីន ស៊ីណាវ៉ាត់ និងម្ខាងជាអ្នកក្រុង អភិជន អភិរក្ស សម្គាល់ដោយអាវលឿង។ ទីប្រឹក្សាក្រុមអាវក្រហមម្នាក់ ក៏បានទទួលស្គាល់ថា បច្ចុប្បន្ននេះ មនុស្សម្នា ហាក់ដូចជាមានទំនុកចិត្តលើយោធាជាងលើអ្នកនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ