លទ្ធផលបឋមប្រជាមតិរដ្ឋធម្មនុញ្ញថៃ៖ ប្រជាជន៦២ភាគរយគាំទ្ររដ្ឋធម្មនុញ្ញថ្មី
ចុះផ្សាយនៅថ្ងៃ៖
នៅថ្ងៃអាទិត្យនេះ ប្រជាជនថៃបាននាំគ្នាទៅបោះឆ្នោតសម្រេចលើរដ្ឋធម្មនុញ្ញថ្មី សម្រេចថា តើត្រូវយល់ស្រប រឺក៏បដិសេធ។ នេះជារដ្ឋធម្មនុញ្ញទី២០ រៀបរៀងឡើងដោយរបបសឹក។ យោងតាមលទ្ធផលបឋមចេញដោយគណៈកម្មការបោះឆ្នោត នៅរសៀលថ្ងៃអាទិត្យនេះ ប្រជាជន៦២ភាគរយ បានបោះឆ្នោតគាំទ្ររដ្ឋធម្មនុញ្ញថ្មី ៣៨ភាគរយទៀត បោះឆ្នោតទាត់ចោលរដ្ឋធម្មនុញ្ញ។
រដ្ឋធម្មនុញ្ញថ្មីដ៏ចម្រូងចម្រាស
គេមើលឃើញថា រដ្ឋធម្មនុញ្ញថ្មី មានទិសដៅបែងចែកអំណាចរវាងកងទ័ព និងអនាគតរដ្ឋាភិបាល។ ព្រោះថា យោងតាមរដ្ឋធម្មនុញ្ញថ្មីនេះ សមាជិកព្រឹទ្ធសភាថៃ លែងកើតចេញពីការបោះឆ្នោតតាមខែត្រដូចពេលមុនទៀតហើយ។ គឺរបបយោធាថៃជាអ្នកតែងតាំងសមាជិកព្រឹទ្ធសភាវិញម្តង។
មួយវិញទៀត ការបោះឆ្នោតសភា ក្នុងពេលខាងមុខ គឺត្រូវធ្វើឡើងតាមប្រព័ន្ធសាមាមាត្រ ដូចនៅអាល្លឺម៉ង់អញ្ចឹងដែរ។ ពោលគឺបក្សតូចៗអាចទទួលសម្លេងឆ្នោតនៅសភា ដើម្បីចូលរួមបង្កើតរដ្ឋាភិបាលចម្រុះ។ ករណីមានវិបត្តិនយោបាយកើតឡើង គេនឹងរើសយកមន្ត្រីម្នាក់ ដែលមិនបានកើតចេញពីការបោះឆ្នោតសោះ អោយតាត់នោះ ធ្វើជានាយករដ្ឋមន្ត្រី។
តាមរយៈប្រព័ន្ធសមាមាត្រនៃការបោះឆ្នោតជាតិ គេបានចោទថា របបសឹកថៃចង់ទប់ស្កាត់មិនអោយគ្រួសារលោកថាក់ស៊ីន ចូលមកកាន់ឆាកនយោបាយបានស្រួលទៀត។ ព្រោះតាំងពីឆ្នាំ២០០១មក បក្សលោកថាក់ស៊ីននេះចេះតែឈ្នះឆ្នោត ទទួលសម្លេងឆ្នោតផ្តាច់មុខជានិច្ច។ តែរបបសឹកបដិសេធការចោទប្រកាន់នេះ។ សូមបញ្ជាក់ដែរថា ការបោះឆ្នោតជាតិត្រូវលើកពេលទៀតហើយ គឺនឹងធ្វើនៅខែកក្កដា ឆ្នាំ២០១៧វិញ។
ដោយឡែក រដ្ឋធម្មនុញ្ញសម្រាប់ប្រជាមតិថ្ងៃនេះ ជារដ្ឋធម្មនុញ្ញ ទី២០ហើយ គិតតាំងពីឆ្នាំ១៩៣២មក ពេលក្សត្រថៃលែងដឹកនាំប្រទេសផ្ទាល់តទៅទៀត ហើយបានផ្ទេរអំណាចអោយរដ្ឋាភិបាល ដែលត្រូវកើតចេញពីការបោះឆ្នោត។ រដ្ឋធម្មនុញ្ញថ្មីមានភាពចម្រូងចម្រាស ព្រោះថា ថៃតស៊ូចង់បានប្រជាធិបតេយ្យ ដោយបានរំដោះខ្លួនចេញពីអំណាចគ្រប់គ្រងរបស់ក្សត្រ។ ប៉ុន្តែ ទីបំផុត របបសឹកបែរជាធ្វើរដ្ឋធម្មនុញ្ញ ចង់អោយក្រុមយោធា និងក្សត្រថៃ ចូលមកកាន់អំណាចដូចពីមុនទៅវិញ។
បញ្ហាតម្លាភាពនៃដំណើរការបោះឆ្នោតប្រជាមតិថ្ងៃអាទិត្យ
តម្លាភាពប្រហែលជាពិបាកមានណាស់។ គ្រាន់តែត្រឹមការចេញផ្សាយលទ្ធផលស្ទាបស្ទង់មតិ ក៏មិនអាចចុះផ្សាយ មួយសប្តាហ៍ មុនថ្ងៃបោះឆ្នោតប្រជាមតិដែរ។ ថៃមិនដែលជួបបញ្ហានេះទេ ពីមុនមក។ របបសឹកប្រហែលបារម្ភថា លទ្ធផលការស្ទាបស្ទង់មតិ អាចជះឥទ្ធិពលដល់អ្នកបោះឆ្នោត អាចអោយពួកគេប្តូរចិត្ត បោះឆ្នោតទាត់ចោលរដ្ឋធម្មនុញ្ញវិញ។
របបសឹកថៃហាមមិនអោយមានក្រុមសង្កេតការណ៍ឯករាជ្យ ហើយហាមមិនអោយប្រជាជនសង្កេតការណ៍បោះឆ្នោតប្រជាមតិថ្ងៃអាទិត្យនេះទៀត។ កន្លងមក សូម្បីតែជជែកគ្នាលើរដ្ឋធម្មនុញ្ញក៏ត្រូវកងទ័ពហាមឃាត់ដែរ។ អាជ្ញាធរបានចាប់សកម្មជនប្រឆាំងរដ្ឋធម្មនុញ្ញជាង១០នាក់ ដាក់គុក។ អ្នកដែលរិះគន់ រឺអ្នកធ្វើយុទ្ធនាការប្រឆាំងរដ្ឋធម្មនុញ្ញថ្មី មានមិនតិចដែរទេ ដែលត្រូវគេចាប់ខ្លួន កន្លងមក។ សម្រាប់ក្រុមសិទ្ធិមនុស្ស នេះជាការគំរាមលទ្ធិប្រជាធិបតេយ្យច្បាស់ណាស់។
របបសឹកអាចចង់បិទបាំងខ្លឹមសារមួយចំនួន នៃរដ្ឋធម្មនុញ្ញ មិនអោយប្រជាជនបានដឹងដែរ។ ជាក់ស្តែង ខ្លឹមសារដែលចែងថា សមាជិកព្រឹទ្ធសភានឹងលែងកើតចេញពីការបោះឆ្នោតទៀតនោះ ក៏មិនឃើញមានចែងក្នុងខិតបណ្ណបោះឆ្នោត អោយប្រជាជនបានដឹងលឺ។
ក្រុមប្រឆាំងរដ្ឋធម្មនុញ្ញរិះគន់ថា រដ្ឋធម្មនុញ្ញថ្មីនេះជារបស់ក្រុមចោរ។ ពួកគេចោទថា របបសឹកធ្វើវាឡើង គឺដើម្បីអាចត្រួតត្រានយោបាយ ត្រួតត្រាអនាគតរដ្ឋាភិបាល។ អតីតនាយករដ្ឋមន្ត្រីថាក់ស៊ីន ដែលកំពុងភៀសខ្លួននៅក្រៅប្រទេស បានចាត់ទុករដ្ឋធម្មនុញ្ញនេះថា ជាការពន្យារអំណាចយោធា វាមិនអាចជួយអោយរដ្ឋាភិបាលមានភាពឯករាជ្យទេ។
បក្សលោកថាក់ស៊ីន នៅតែមានឥទ្ធិពលក្នុងនយោបាយថៃ។ បើរដ្ឋធម្មនុញ្ញថ្មីនេះត្រូវប្រជាជនបោះឆ្នោតគាំទ្រ ថៃអាចនឹងធ្លាក់ក្នុងហិង្សា និងអស្ថិរភាពនយោបាយជាថ្មីបាន ព្រោះក្រុមអាវក្រហមតំណាងប្រជាជនតាមជនបទ គាំទ្របក្សលោកថាក់ស៊ីន អាចបះបោរឡើងបាន។
ទោះប្រជាជនថៃទាត់ចោលរដ្ឋធម្មនុញ្ញ លោកប្រាយុទ្ធ ចាន់ អូចា មិនលាតំណែងនាយករដ្ឋមន្ត្រី
លោកប្រាយុទ្ធប្រាប់ថាបើទោះជាប្រជាជនបោះឆ្នោត ទាត់ចោលរដ្ឋធម្មនុញ្ញ ក៏លោកមិនលាចុះពីតំណែងនាយករដ្ឋមន្ត្រីដែរ។ ក្រុមប្រឆាំងរដ្ឋធម្មនុញ្ញក៏បានគិតរួចហើយដែរថា ទោះជាប្រជាជនទាត់ចោលរដ្ឋធម្មនុញ្ញ ក៏របបសឹកនៅតែបន្តវត្តមាន ក្នុងឆាកនយោបាយថៃដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ