ពលរដ្ឋភូមា ធ្វើបាតុកម្មប្រឆាំងនឹងទស្សនកិច្ចរបស់លោកកូហ្វី អាណាន់
ព្រះសង្ឃ និងពុទ្ធសាសនិក ជាតិនិយមជ្រុលភូមាជាច្រើនរយនាក់ បាននាំគ្នាធ្វើបាតុកម្ម នៅថ្ងៃអង្គារនេះ នៅភាគខាងលិចប្រទេសភូមា ដើម្បីប្រឆាំងនឹងដំណើរទស្សនកិច្ចរបស់ លោក កូហ្វី អាណាន់ អតីតអគ្គលេខាធិការអង្គការសហប្រជាជាតិ ដែលលោកស្រី អ៊ុង សានស៊ូជី ពឹងពាក់ឱ្យមកជួយដោះស្រាយវិបត្តិជនជាតិភាគតិចរ៉ូហ៊ីងយ៉ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
“មិនត្រូវការទេគណៈកម្មការដឹកនាំដោយកូហ្វីអាណាន់” ! មិនត្រូវការទេ អន្តរាគមន៍បរទេស ក្នុងកិច្ចការផ្ទៃក្នុងរដ្ឋរ៉ាឃីន” ! នេះជាសារដែលមានសរសេរលើបដា និងដែលក្រុមបាតុករនាំគ្នាលើកគ្រវី ស្រែកប្រឆាំង នៅព្រលានយន្តហោះ Sittwe រដ្ឋរ៉ាឃីន ភាគខាងលិចប្រទេសភូមា ពេលលោក កូហ្វី អាណាន់ មកដល់ភ្លាម។
លោកកូហ្វី អាណាន់ ក្នុងនាមជាប្រធានគណៈកម្មការដោះស្រាយវិបត្តិជនជាតិភាគតិចរ៉ូហ៊ីយ៉ា បន្ទាប់ពីបានជួបពិភាក្សាជាមួយលោកស្រី អ៊ុង សានស៊ូជី នៅថ្ងៃចន្ទម្សិលមិញ ត្រូវអញ្ជើញទៅជំរំជនភៀសខ្លួនរបស់ពួករ៉ូហ៊ីងយ៉ា ដោយផ្ទាល់នៅថ្ងៃអង្គារនេះ និងដោយគ្មានអ្នកកាសែត ឬអ្នកថតតាមឡើយ។
ប៉ុន្តែទស្សនកិច្ចនេះ ជាក្តីសង្ឃឹមរបស់ជនភៀសខ្លួនរ៉ូហ៊ីងយ៉ា ដែលតាំងពីមានផ្ទុះអំពើហិង្សាពីសំណាក់ពលរដ្ឋភូមាអ្នកកាន់ពុទ្ធសាសនា នៅឆ្នាំ២០១២មក មិនអាចត្រលប់នៅភូមិឋានវិញបាន ហើយបង្ខំចិត្តរស់នៅក្នុងជំរំរខេករខាក និងគ្មានសិទ្ធិចេញដើរហើរខាងក្រៅដោយគ្មានការអនុញ្ញាតឡើយ។
ជនជាតិរ៉ូហ៊ីងយ៉ា ដែលមានចំនួនសរុបប្រមាណជិតមួយលាននាក់ ភាគច្រើនរស់នៅក្នុងរដ្ឋរ៉ាឃីន បើទោះបីជាបានមករស់នៅរាប់តំណរ និងជាច្រើនទសវត្សរ៍ក៏ដោយ ក៏ត្រូវបានភូមាចាត់ទុកជាជនអន្តោប្រវេសន៍ខុសច្បាប់បង់ក្លាដែសរហូតមក គ្មានទាំងទឹកដី គ្មានទាំងសញ្ជាតិ។
ក្រៅអំពីបាតុកម្មរបស់ពលរដ្ឋភូមាអ្នកប្រកាន់តឹង តំណាងបក្សនយោបាយដ៏មានអំណាចប្រចាំតំបន់ ក៏បានបដិសេធមិនទទួលជួបលោកកូហ្វីអាណាន់ដែរ។ សម្រាប់ក្រុមពុទ្ធសាសនិកជនបែបជ្រុលនិយមភូមា ដ៏មានឥទ្ធិពលនៅក្នុងប្រទេស ការរស់ឡើងវិញនៃជនជាតិភាគតិចអ៊ីស្លាមរ៉ូហ៊ីងយ៉ា ជាការគំរាមកំហែងអត្តសញ្ញាណជាតិ។
លោកស្រី អ៊ុងសានស៊ូជី ជ័យលាភីរង្វាន់ណូបែលសន្តិភាព ដែលទើបក្លាយជាសមាជិករដ្ឋាភិបាលដឹកនាំប្រទេស ធ្លាប់រងការរិះគន់យ៉ាងខ្លាំងពីអន្តរជាតិ ចំពោះភាពស្ងាត់ស្ងៀមនឹងជោគវាសនារបស់រ៉ូហ៊ីងយ៉ានេះ។ លោកស្រី ទើបបានអះអាងជាសាធារណៈ តែដោយប្រយោល ជាលើកទីមួយ នាជំនួបជាមួយលោកកូហ្វី អាណាន់ ម្សិលមិញ ថាមិនអាចធ្វើមិនដឹងទៀតបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ