លោកស្រីស៊ូជីចាប់ផ្តើមថ្លែងសន្ទរកថាពីបញ្ហាជនជាតិរ៉ូហ៊ីងយ៉ា
ប្រមុខការទូតភូមា អ៊ុងសាន ស៊ូជី បានលើកឡើង នៅថ្ងៃចន្ទ៥សីហានេះ នូវបញ្ហាប្រជាជនកាន់សាសនាអ៊ីស្លាម រ៉ូហ៊ីងយ៉ា។ លោកស្រីស៊ូជី បានតែងតាំងអតីតប្រធានអង្គការសហប្រជាជាតិ កូហ្វ៊ី អាណាន់ អោយដឹកនាំគណៈកម្មការទទួលបន្ទុកស្វែងរកដំណោះស្រាយបញ្ហាជនជាតិរ៉ូហ៊ីងយ៉ា។ ក្រុមអ្នកជាតិនិយមភូមាបានប្រកាសត្រៀមធ្វើបាតុកម្ម ថ្ងៃអង្គារ៦សីហានេះ ប្រឆាំងនឹងទស្សនកិច្ចលោកអាណាន់ នៅរដ្ឋរ៉ាក់ឃីន ភាគខាងលិច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
ថ្ងៃចន្ទនេះ ក្នុងកិច្ចប្រជុំគណៈកម្មការទទួលបន្ទុករកដំណោះស្រាយបញ្ហាជនជាតិរ៉ូហ៊ីងយ៉ា លោកស្រីស៊ូជីបានចាប់ផ្តើមលើកនិយាយដោយចំហ ពីរឿងជនជាតិរ៉ូហ៊ីងយ៉ា តែក៏មិនហ៊ានប្រើពាក្យចំរហូតថា រ៉ូហ៊ីងយ៉ាដែរ ព្រោះវាជាបញ្ហាតានតឹងនៅភូមា។
លោកស្រីស៊ូជីបានលើកឡើងពីសិទ្ធិមនុស្ស សិទ្ធិជនជាតិរ៉ូហ៊ីងយ៉ា តាមបែបប្រយោលថា ប្រជាជនគ្រប់រូបត្រូវការសេរីភាព។ លោកស្រីស៊ូជីចង់សំដៅន័យចំពោះជនជាតិរ៉ូហ៊ីងយ៉ា ប្រមាណ១សែននាក់ ដែលកំពុងភៀសខ្លួន តាមជំរំភាគខាងលិចប្រទេស ក្រោយមានហិង្សាសហគមន៍ឆ្នាំ២០១២។
លោកស្រីស៊ូជីលើកឡើងទៀតថា លោកកូហ្វ៊ី អាណាន់ ដែលជាអតីតប្រធានអង្គការសហប្រជាជាតិនឹងជួយភូមាអោយបិទដំបៅរបួស។ លោកកូហ្វ៊ី អាណាន់ ត្រូវបានតែងតាំង អោយដឹកនាំគណៈកម្មការរកដំណោះស្រាយជួយជនជាតិរ៉ូហ៊ីងយ៉ា នៅតំបន់អារ៉ាខាន់ ភាគខាងលិច។ លោកបានមកដល់ភូមា ថ្ងៃ៣កញ្ញាកន្លងទៅ។ ថ្ងៃអង្គារនេះ លោកអាណាន់ ត្រូវធ្វើដំណើរទៅដល់រដ្ឋរ៉ាក់ឃីន។ ដូចលោកស្រីស៊ូជីដែរ លោកអាណាន់មិនហ៊ានពោលពាក្យថា រ៉ូហ៊ីងយ៉ា ទេ។
ជារឿយៗ គេតែងរិះគន់លោកស្រីស៊ូជី ថាធ្វើមិនដឹងលឺរឿងអ្នកកាន់សាសនាអ៊ីស្លាម រ៉ូហ៊ីងយ៉ា ដែលរងការរើសអើង ធ្វើបាប ពីសំណាក់ក្រុមពុទ្ធសាសនិកជ្រុលនិយមក្នុងស្រុក។ អ៊ុងសាន ស៊ូជីមិនហ៊ានលើកឡើងពីជនជាតិរ៉ូហ៊ីងយ៉ា ក៏ដោយសារខ្លាចប្រជាជនមិនបោះឆ្នោតអោយបក្សលោកស្រី ឡើងកាន់អំណាច។ តែពេលនេះ បក្សលោកស្រីបានឡើងកាន់កាប់ភូមាហើយ ដូច្នេះ លោកស្រីក៏អាចលើកឡើងពីបញ្ហាជនជាតិរ៉ូហ៊ីងយ៉ាបានខ្លះដែរ។
ជនជាតិរ៉ូហ៊ីងយ៉ា រស់នៅភូមារាប់ទសវត្សហើយ។ ប្រជាជនភូមា ចាត់ទុកពួកគេថា ជាជនភៀសខ្លួនបង់ក្លាដែសខុសច្បាប់។ ដោយសារគ្មានឯកសារអត្តសញ្ញាណ គ្មានសញ្ជាតិភូមា ប្រជាជនរ៉ូហ៊ីងយ៉ាមិនបានទទួលការព្យាបាល ការអប់រំសិក្សា រឺការងារធ្វើទេ។ កាលពីចុងខែសីហាមុននេះ ប្រធាន អង្គការសហប្រជាជាតិបាន់ គីមូន បានសុំអោយរដ្ឋាភិបាលភូមាផ្តល់សញ្ជាតិភូមាដល់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ