ក្រុមឧទ្ទាមនិងកងទ័ពភូមាប្រយុទ្ធគ្នា មុនកិច្ចចរចាសន្តិភាពមួយថ្ងៃ
កិច្ចពិភាក្សាសន្តិភាពភូមា ត្រូវបើកធ្វើថ្ងៃពុធ៣១សីហានេះ រវាងក្រុមឧទ្ទាម និងរដ្ឋាភិបាល ដោយមានវត្តមានប្រធានអង្គការសហប្រជាជាតិ បាន់ គីមូន។ ប៉ុន្តែ ថ្ងៃអង្គារ ក្រុមឧទ្ទាមនិងកងទ័ពភូមាបានប្រយុទ្ធគ្នា នៅតំបន់ឆានភាគខាងកើត និងតំបន់កាឈីនភាគខាងជើងភូមា។
ចុះផ្សាយនៅថ្ងៃ៖
ស្តាប់ - ០១:១៣
កិច្ចពិភាក្សាសន្តិភាពរវាងរដ្ឋាភិបាលភូមា និងក្រុមឧទ្ទាមជនជាតិភាគតិច ដែលត្រូវបើកធ្វើនៅថ្ងៃពុធ៣១សីហានេះ ជួបភាពតានតឹង ដោយសារថ្ងៃអង្គារ មួយថ្ងៃមុនកិច្ចពិភាក្សា ក្រុមឧទ្ទាមនិងកងទ័ពបានប្រយុទ្ធហិង្សាដាក់គ្នា។
ក្រុមឧទ្ទាមបានចោទកងទ័ពថា បានបើកការវាយប្រហារ នៅតំបន់ឆាន ភាគខាងកើត និងតំបន់កាឈីន ភាគខាងជើងភូមា នៅព្រឹកថ្ងៃអង្គារ។ ភ្លាមៗ គេមិនបានទទួលព័ត៌មានបញ្ជាក់ពីកងទ័ព ទាក់ទិននឹងការប្រយុទ្ធនេះទេ។
តំណាងអ្នកចរចាខាងរដ្ឋាភិបាលបក្សសម្ព័ន្ធជាតិប្រជាធិបតេយ្យ បានប្រាប់ថា រដ្ឋាភិបាល មានការលំបាកក្នុងការពិភាក្សាសំណុំរឿងនេះ ជាមួយកងទ័ព។ ពេលនេះ តំណាងចរចាខាងក្រុមឧទ្ទាមមួយរូប បានសំដែងការមិនទុកចិត្តចំពោះកងទ័ព ដោយលើកឡើងថា នៅទីនេះ គេពិភាក្សាសសន្តិភាពជាមួយគ្នា តែនៅទីនោះវិញ គេវាយប្រហារគ្នា។
តាំងពីទទួលឯករាជ្យពិអង់គ្លេសក្នុងឆ្នាំ១៩៤៨មក រដ្ឋអំណាចភូមាតែងប្រឈមនឹងការបះបោរផ្តាច់ទឹកដីរបស់ជនជាតិភាគតិច។ ហិង្សាបានធ្វើអោយប្រជាជនប្រមាណ២សែន២ម៉ឺននាក់ភៀសខ្លួនពីផ្ទះសម្បែង។
ឆ្នាំ២០១៥ រដ្ឋាភិបាលស៊ីវិលអន្តរកាល និងក្រុមឧទ្ទាមចំនួន៨ បានព្រមព្រៀងគ្នាចុះកិច្ចព្រមព្រៀងសន្តិភាព។ ប៉ុន្តែ ក្រុមឧទ្ទាមធំៗផ្សេងទៀត នៅតែបដិសេធសន្តិភាព និងបានបន្តការតស៊ូប្រដាប់អាវុធ ពិសេសនៅតំបន់ឆាន និងតំបន់កាឈីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ