អាមេរិក-ភូមា៖ហេតុអ្វីបានជាលោកអូបាម៉ាសម្រេចដកទ័ណ្ឌកម្មចេញពីប្រទេសភូមា?
ចុះផ្សាយនៅថ្ងៃ៖
ស្តាប់ - ០៦:២២
នៅសហរដ្ឋអាមេរិក លោកប្រធានាធិបតីបារ៉ាក់ អូបាម៉ាបានប្រកាសពីការដកទ័ណ្ឌកម្មចេញពីប្រទេសភូមា។ សេចក្តីប្រកាសរបស់លោកអូបាម៉ាបានធ្វើឡើងនៅថ្ងៃពុធ ទី១៤ កញ្ញានាឱកាសជំនួបជាមួយលោកស្រីអ៊ុង សានស៊ូជីក្នុងទីក្រុងវ៉ាស៊ីនតោន។ តែមានអង្គការសិទ្ធិមនុស្សមួយចំនួនបានយល់ឃើញថា ការដែលអាមេរិកបានសម្រេចដកទ័ណ្ឌកម្មចេញពីភូមាពេលនេះជាការសម្រេចលឿនជ្រុល ព្រោះនៅមានរឿងរ៉ាវជាច្រើនដែលរដ្ឋាភិបាលភូមានៅមិនទាន់បានដោះស្រាយរួចរាល់នៅឡើយ ពិសេសសំណុំរឿងជនជាតិភាគតិច ដូចយ៉ាងពួករ៉ូហ៊ីងយ៉ាជាដើម។
លោកអូបាម៉ាមិនបានលំអិតពីប្រភេទទ័ណ្ឌកម្មដែលនឹងត្រូវដកចេញពីភូមាទេ តែបើតាមមើលទៅ ប្រហែលជាគ្មានអ្វីក្រៅពីទ័ណ្ឌកម្មសេដ្ឋកិច្ចដែលអាមេរិកធ្លាប់បានសម្រាលនាពេលកន្លងមក និងទ័ណ្ឌកម្មដែលនៅសេសសល់។ នៅក្នុងខែឧសភាកន្លងទៅ រដ្ឋបាលអាមេរិកាំងបានបន្ធូរបន្ថយទ័ណ្ឌកម្មនៅក្នុងវិស័យធនាគារ វិស័យរ៉ែ និងវិស័យព្រៃឈើ។ តែបានបន្តរក្សាទុកបញ្ជីខ្មៅឈ្មោះមនុស្សជាង ១០០នាក់ដែលជាប់ចោទពីបទមានចំណងទាក់ទងជាមួយអតីតរបបសឹក។
រហូតមកដល់ថ្ងៃនេះ ក្រុមហ៊ុន និងក្រុមអ្នកជំនួញអាមេរិកាំងមិនអាចរកស៊ីជាមួយជនជាតិភូមាដែលស្ថិតក្នុងបញ្ជីខ្មៅ ឬមួយក៏ដាក់ទុនវិនិយោគជាមួយក្រុមហ៊ុនភូមាណាដែលគ្រប់គ្រង ឬមានភាគហ៊ុនដោយមនុស្សដែលស្ថិតក្នុងបញ្ជីខ្មៅនោះទេ។ ដូច្នេះ គម្រោងដកទ័ណ្ឌកម្មដែលទើបប្រកាសដោយលោកអូបាម៉ាអាចមានជាប់ពាក់ព័ន្ធនឹងបញ្ជីខ្មៅ រួមទាំងបញ្ហាផ្សេងទៀត។ យ៉ាងណាក៏ដោយ ការប្រកាសរបស់លោកអូបាម៉ាពិតជាដំណឹងល្អណាស់សម្រាប់ប្រទេស និងប្រជាជនភូមាដែលបានរងគំនាបទ័ណ្ឌកម្មសេដ្ឋកិច្ចអាមេរិកអស់ជាច្រើនទសវត្សកន្លងមក ពិសេសតាំងពីភូមាស្ថិតក្រោមការដឹកនាំដោយរបបយោធា។
រដ្ឋបាលអាមេរិកបានបញ្ជាក់នៅក្រោយការប្រកាសរបស់លោកអូបាម៉ាថា ក្រសួងសេដ្ឋកិច្ចអាមេរិកនឹងធ្វើការប្រកាសព័ត៌មានដូចគ្នានេះជាផ្លូវការនៅប៉ុន្មានថ្ងៃខាងមុខ។ ក្រៅពីការប្រកាសដោយផ្ទាល់មាត់ពីការដកទ័ណ្ឌកម្មចេញពីភូមា លោកអូបាម៉ាក៏បានប្រកាសឲ្យដឹងផងដែរថា ភូមានឹងទទួលបានឡើងវិញនូវតម្លៃពន្ធពិសេសរបស់អាមេរិកដូចដែលអាមេរិកបានផ្តល់ឲ្យប្រទេសក្រីក្រផ្សេងទៀត។
លោកអូបាម៉ាមានសុទិដ្ឋនិយមចំពោះអនាគតភូមា
មានហេតុផលតែមួយគត់ដែលលោកអូបាម៉ាបានសម្រេចដកទ័ណ្ឌកម្មចេញពីភូមា គឺស្ថានការណ៍នយោបាយបោះពួយទៅមុខគួរឲ្យភ្ញាក់ផ្អើលរបស់ភូមា។ គ្រាន់តែមួយប៉ប្រិចភ្នែក ភូមាបានប្តូរពីរបបផ្តាច់ការយោធាដែលបានកាន់អំណាចដុះស្លែជាងកន្លះសតវត្សមករករបបស៊ីវិលពេញលក្ខណៈ ពិសេសការឡើងកាន់អំណាចរបស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រីអ៊ុង សានស៊ូជីដែលជាបក្សប្រឆាំងតែមួយគត់នៅភូមា។ អ្វីដែលសហគមន៍អន្តរជាតិស្ញើចសរសើរខ្លាំងចំពោះភូមា គឺដំណើរការបោះឆ្នោតប្រកបដោយសន្តិវិធី តម្លាភាព និងយុត្តិធម៌ដែលបានអនុញ្ញាតឲ្យគណបក្សប្រឆាំងចូលកាន់អំណាចដោយគ្មានការបង្ហូរឈាម។
នាឱកាសជំនួបជាមួយលោកស្រីអ៊ុង សានស៊ូជីនៅក្នុងការិយាល័យរាងពងក្រពើនៅវិមានប្រធានាធិបតី លោកអូបាម៉ាបានសរសើរលោកស្រីស៊ូជីមិនដាច់មាត់ពីការតស៊ូប្រឹងប្រែងរបស់លោកស្រីទំរាំមានថ្ងៃនេះ។ លោកអូបាម៉ាបានបន្ថែមនៅចំពោះលោកស្រីអ៊ុង សានស៊ូជីថា យើងបានឈានមកដល់ចំណុចមួយដែលគ្មាននរណាម្នាក់នឹកស្មានសោះឡើយកាលពី ៥ឆ្នាំមុន និងថា យើងពិតជាមានសុទិដ្ឋនិយមខ្លាំងណាស់ចំពោះអនាគតដ៏រុងរឿងរបស់ភូមា។ តែទន្ទឹមនឹងការសាទរលោកស្រីស៊ូជី លោកអូបាម៉ាក៏បានឆ្លៀតនិយាយប្រាប់លោកស្រីស៊ូជីថា មានការងារជាច្រើនទៀតដែលភូមាត្រូវធ្វើ ហើយផ្លូវដែលភូមាត្រូវដើរនៅវែងឆ្ងាយ តែភូមាកំពុងដើរនៅលើផ្លូវល្អណាស់។
សូមជម្រាបជូនថា លោកអូបាម៉ា និងលោកស្រីអ៊ុង សានស៊ូជីជាជ័យលាភីរង្វាន់ណូបែលសន្តិភាពដូចគ្នា ហើយនេះជាលើកទី៣ ហើយអ្នកទាំងពីរបានជួបសន្ទនាផ្ទាល់។ ជំនួបលើកទី១ កាលពីឆ្នាំ ២០១២ និងជំនួបលើកទី២ កាលពីឆ្នាំ ២០១៤ លោកស្រីអ៊ុង សានស៊ូជីមានតួនាទីត្រឹមជាប្រធានបក្សប្រឆាំង តែជំនួបលើកនេះគឺក្នុងនាមលោកស្រីជាទីប្រឹក្សារដ្ឋ និងជាប្រមុខការទូត។ សម្រាប់លោកអូបាម៉ា នេះអាចជាជំនួបចុងក្រោយជាមួយលោកស្រីស៊ូជី មុននឹងលោកបញ្ចប់អាណត្តិប្រធានាធិបតីនៅប៉ុន្មានខែខាងមុខ។
Global Witness ថា លោកអូបាម៉ាបានសម្រេចចិត្តលឿនជ្រុល
ការដែលអាមេរិកបានប្រកាសដកទ័ណ្ឌកម្មចេញពីភូមាពិតជាដំណឹងល្អណាស់សម្រាប់ប្រទេស និងប្រជាជនភូមា តែមានអង្គការសិទ្ធិមនុស្សខ្លះមិនសូវជាត្រេកត្រអាលចំពោះកាយវិការរបស់លោកអូបាម៉ាទេ។ អង្គការ Global Witness បានបរិហារលើការសម្រេចចិត្តរបស់លោកអូបាម៉ា និងចាត់ទុកជាការសម្រេចចិត្តលឿនជ្រុលដោយមិនបានផ្អែកលើស្ថានការណ៍ជាក់ស្តែងរបស់ប្រទេសភូមា។ Global Witness ចង់ប្រដូចការសម្រេចចិត្តរបស់លោកអូបាម៉ាទៅនឹងការឮសូរផ្គរលាន់ ចាក់ទឹកពាងចោល។
អង្គការក្រៅរដ្ឋាភិបាលមួយនេះក៏បានទទួលស្គាល់ពីដំណើរវិវត្តន៍ទៅមុខគួរឲ្យកត់សម្គាល់របស់ភូមាដែរ តែអ្វីដែល Global Witness ចង់ឃើញ និងចង់បានឲ្យរដ្ឋាភិបាលថ្មីដោះស្រាយជាមុននោះ គឺបញ្ហាសេសសល់ និងរ៉ាំរ៉ៃមួយចំនួនដែលបានអូសបន្លាយមកដល់សព្វថ្ងៃ ពិសេសគឺរឿងជនជាតិភាគតិចរ៉ូហ៊ីងយ៉ា។ Global Witness បានយល់ឃើញថា ទ័ណ្ឌកម្មគឺជាអាវុធដ៏មានប្រសិទ្ធិភាពមួយដើម្បីបន្តដាក់គំនាបបង្ខំរដ្ឋាភិបាលភូមាឲ្យដោះស្រាយបញ្ហាដ៏ចម្រូងចម្រាស ដូចយ៉ាងរឿងជនជាតិភាគតិចរ៉ូហ៊ីងយ៉ា ឬមួយក៏ជម្លោះប្រដាប់អាវុធជាមួយក្រុមឧទ្ទាមមួយចំនួនជាដើម។
សម្រាប់ Global Witness អាមេរិកគួរតែរង់ចាំផ្លៃផ្កាពីកំណែទម្រង់របស់រដ្ឋាភិបាលភូមាសព្វថ្ងៃជាមុនសិន មុននឹងសម្រេចដកទ័ណ្ឌកម្មចេញវិញ។ សូមជម្រាបជូនថា ការលើកឡើងរបស់អង្គការ Global Winess របៀបនេះក៏មិនខុសដែរ ព្រោះបញ្ហាជនជាតិភាគតិចរ៉ូហ៊ីងយ៉ាបាន និងកំពុងបន្តក្លាយជាឆ្អឹងទទឹង ក រវាងទីក្រុងណៃពីដ៏ និងទីក្រុងវ៉ាស៊ីតោន។ តាំងពីក្រោយអំពើហិង្សាសម្លាប់រង្គាលលើពួករ៉ូហ៊ីងយ៉ាក្នុងឆ្នាំ ២០១២ មក មានភាគច្រើននៅបន្តភៀសខ្លួនរស់ក្រៅទីកន្លែងកំណើតរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ