អូស្រ្តាលី៖ក្រុមហ៊ុន Crown កំពុងព្រួយបារម្ភលើការចាប់ខ្លួនបុគ្គលិកចំនួន ១៨នាក់ពីអាជ្ញាធរចិន
នៅក្នុងប្រទេសអូស្រ្តាលី លោក James Packer ថៅកែក្រុមហ៊ុនកាស៊ីណូ Crown បានសម្តែងក្តីបារម្ភនាថ្ងៃអង្គារ ទី១៨ តុលាលើជោគវាសនារបស់បុគ្គលិកក្រុមហ៊ុនចំនួន ១៨នាក់ដែលកំពុងជាប់ឃុំឃាំងក្នុងប្រទេសចិន។ បុគ្គលិកក្រុមហ៊ុនទាំង ១៨នាក់ដែលមាន ៣នាក់ជាជនជាតិអូស្រ្តាលីបានជាប់ចោទពីបទបានឃោសនាបង្ខំពួកអ្នកមានចិនឲ្យយកលុយទៅលេងល្បែងនៅក្នុងកាស៊ីណូបរទេស។
ចុះផ្សាយនៅថ្ងៃ៖
ស្តាប់ - ០២:១៤
រហូតមកដល់ពេលនេះ ព័ត៌មានទាក់ទងនឹងការចាប់ខ្លួន និងទីកន្លែងឃុំខ្លួនបុគ្គលិកទាំង ១៨នាក់របស់ក្រុមហ៊ុនកាស៊ីណូអូស្រ្តាលី Crown Resorts Limited កំពុងបន្តស្រពិចស្រពិល។ តែទោះជាយ៉ាងនេះក្តី មហាសេដ្ឋីថៅកែជនជាតិអូស្រ្តាលីលោក James Packer បានថ្លែងឲ្យដឹងពីក្តីបារម្ភយ៉ាងខ្លាំងរបស់លោកចំពោះវាសនាបុគ្គលិកទាំង ១៨នាក់ដែលកំពុងជាប់ឃុំឃាំងក្នុងទឹកដីចិន។ លោក Packer បានបន្ថែមថានៅក្នុងកាលៈទេសៈដ៏លំបាកនេះ ក្រុមហ៊ុននឹងប្រឹងប្រែងធ្វើអ្វីៗគ្រប់យ៉ាងទាំងអស់ដែលអាចធ្វើទៅបានដើម្បីចូលរួមជួយចែករំលែកក្តីបារម្ភ និងផ្តល់ការគាំទ្រចំពោះក្រុមគ្រួសាររបស់បុគ្គលិកទាំង ១៨នាក់នោះ។
ប្រតិកម្មរបស់លោក Packer ថ្ងៃនេះបានធ្វើឡើង បន្ទាប់ពីក្រុមប្រឹក្សារដ្ឋបាលរបស់ក្រុមហ៊ុនបានរៀបចំ Videoconference ជាបន្ទាន់មួយនាយប់ថ្ងៃចន្ទ ទី១៧ តុលា។ ខណៈនេះ មានប្រភពព័ត៌មានពីរខុសគ្នាដែលបញ្ជាក់ពីមូលហេតុនៃការចាប់ខ្លួនបុគ្គលិកក្រុមហ៊ុន Crown ទាំង ១៨នាក់។ វិទ្យុ ទូរទស្សន៍ជាតិអូស្រ្តាលី ABC បានលើកឡើងថា ការចាប់ខ្លួនបានធ្វើឡើងនៅក្នុងក្របខ័ណ្ឌនៃការស៊ើបអង្កេតពាក់ព័ន្ធនឹងវិធានការរបស់ក្រុមហ៊ុនដែលឃោសនាបង្ខំពួកអ្នកមានចិនឲ្យយកលុយទៅលេងល្បែងនៅក្នុងកាស៊ីណូបរទេស។
ចំណែកកាសែតប្រចាំថ្ងៃអូស្រ្តាលីឈ្មោះ Sydney Morning Herald បានអះអាងដោយផ្អែកលើប្រភពច្បាស់ការណ៍មួយដែលថា ការឃាត់ខ្លួនបុគ្គលិកទាំង ១៨នាក់របស់ក្រុមហ៊ុន Crown បានជាប់ពាក់ព័ន្ធផ្ទាល់នឹងឆន្ទៈរបស់ក្រុមហ៊ុនដែលមានបំណងចង់យកត្រឡប់វិញនូវទឹកលុយជាង ១៥លានដុល្លារដែលមហាសេដ្ឋីចិនម្នាក់បានឈ្នះនៅក្នុងកាស៊ីណូមួយរបស់ក្រុមហ៊ុន Crown ក្នុងទីក្រុង Melbourne ប្រទេសអូស្រ្តាលី។ យ៉ាងណាក៏ដោយ រឿងអាស្រូវមួយនេះនៅមិនទាន់មានការបញ្ជាក់ជាផ្លូវការពីរដ្ឋអំណាចចិនទេ។
ចំណែកនៅខាងអូស្រា្តលីវិញ លោកស្រីប្រមុខការទូត Julie Bishop គ្រាន់បានបញ្ជាក់ថា ក្នុងចំណោមបុគ្គលិកឃុំខ្លួនទាំង ១៨នាក់នៅក្នុងទីក្រុងសៀងហៃនោះ មាន ៣នាក់ជាជនជាតិអូស្រ្តាលី និងដែលពេលនេះ កុងស៊ុលឡាអូស្រ្តាលីក្នុងប្រទេសចិនកំពុងធ្វើការជាមួយអាជ្ញាធរចិនដើម្បីអាចចូលជួបពួកគេទាំង ៣នាក់នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ