ចិន-បុរីវ៉ាទីកង់៖សង្ឃកាតូលិកចិនកំពុងបារម្ភលើជំហរទន់ភ្លន់របស់សម្តេចប៉ាបហ្រ្វង់ស័រ
ចុះផ្សាយនៅថ្ងៃ៖
ស្តាប់ - ០៧:១៤
នៅក្នុងប្រទេសចិន ក្តីសង្ឃឹមនៃការរំកិលរកគ្នាជាថ្មីរវាងបុរីវ៉ាទីកង់ និងរដ្ឋាភិបាលក្រុងប៉េកាំងបាន និងកំពុងធ្វើឲ្យក្រុមសង្ឃកាតូលិកចិនមានការព្រួយបារម្ភជាពន់ពេក។ អ្វីដែលក្រុមសង្ឃកាតូលិកចិនព្រួយបារម្ភ គឺខ្លាចតែបុរីវ៉ាទីកង់យល់ព្រមឲ្យរដ្ឋអំណាចចិនលូកដៃចាត់ចែងកិច្ចការផ្ទៃក្នុងរបស់សាសនាកាតូលិកក្នុងស្រុក។ គួរជម្រាបជូនថា ចិន និងបុរីវ៉ាទីកង់បានផ្តាច់ទំនាក់ទំនងរវាងគ្នាតាំងពីឆ្នាំ ១៩៥១ តែក្នុងរយៈពេលប៉ុន្មានឆ្នាំចុងក្រោយ ពិសេសក្នុងជំនាន់សម្តេចប៉ាបហ្រ្វង់ស័រ ព្រះអង្គតែងតែព្យាយាមសម្របសម្រួលជាមួយចិនដោយសង្ឃឹមនឹងភ្ជាប់ទំនាក់ទំនងប្រក្រតីឡើងវិញ។
មានសំណុំរឿងសំខាន់ចំនួនពីរដែលបានធ្វើឲ្យបុរីវាទីកង់ និងប៉េកំាងបន្តមើលមុខគ្នាមិនចំរហូតមកដល់សព្វថ្ងៃ ទី១ ទាក់ទងនឹងជម្រើសគណៈសង្ឃកាតូលិកចិនដែលរដ្ឋអំណាចប៉េកំាងបានសម្រេចចិត្តតែម្នាក់ឯង ដោយមិនបានពិភាក្សា ពិគ្រោះយោបល់ជាមួយរដ្ឋអំណាចនៅបុរីវ៉ាទីកង់ទេ។ បុរីវ៉ាទីកង់តែងតែបានរម្លឹកដាស់តឿនច្រើនលើក ច្រើនសារថា រឿងជម្រើស និងការតែងតាំងគណៈសង្ឃកាតូលិកជាតួនាទីរបស់ខ្លួន តែចិនបានអះអាងថា ក៏ត្រូវតែមានការយល់ព្រមពីខ្លួនជាមុនសិនដែរ។ ចំណែកសំណុំរឿងចម្រូងចម្រាសទី២ គឺទាក់ទងនឹងការដែលបុរីវ៉ាទីកង់បានទទួលស្គាល់កោះតៃវ៉ាន់ជាផ្លូវការកាលពី ៦២ឆ្នំាមុន។
គឺរឿងបុរីវ៉ាទីកង់ប្រកាសទទួលស្គាល់កោះតៃវ៉ាន់ជាផ្លូវការនោះឯងដែលបានធ្វើឲ្យចិនក្តៅស្លឹកត្រចៀកខ្លំាងរហូតដល់ផ្តាច់ទំនាក់ទំនងការទូតជាមួយបុរីវ៉ាទីកង់ក្នុងឆ្នំា ១៩៥១។ គួរជម្រាបជូនថា ក្រោមភ្នែកច្រមុះរបស់ចិន តៃវ៉ាន់គ្រាន់តែខេត្តឧទ្ទាមមួយរបស់ចិន និងដែលចិនមិនញញើតនឹងប្រើកម្លំាងវាយប្រហារទេ ប្រសិនបើតៃវ៉ាន់ហ៊ានប្រកាសឯករាជ្យនៅថ្ងៃណាមួយនោះ។ មែនទែនទៅមិនថាតែបុរីវ៉ាទីកង់ទេ សូម្បីតែប្រទេសណាក៏ដោយដែលហ៊ានល្អូកល្អឺនជាមួយតៃវ៉ាន់ក៏ចិនមិនសប្បាយចិត្តដែរ។
គឺទើបនៅ ៦ឆ្នំាក្រោយមកទេ ពោលក្នុងឆ្នំា ១៩៥៧ ដែលចិនបានសម្រេចបង្កើតឲ្យមានស្ថាប័នដាច់ដោយឡែកមួយរបស់ខ្លួនក្នុងការគ្រប់គ្រងសាសនាកាតូលិកដែលមានឈ្មោះថា « សមាគមកាតូលិកស្នេហាមាតុភូមិចិន »។ បច្ចុប្បន្ននេះ មានពលរដ្ឋចិនកាន់សាសនាកាតូលិករាប់សិបលាននាក់ តែការគ្រប់គ្រងវិហារសាសនាមួយនេះត្រូវចែកជាពីរ នៅម្ខាង គឺវិហារផ្លូវការគ្រប់គ្រងដោយរដ្ឋអំណាចចិន និងនៅម្ខាងទៀត គឺវិហារក្រៅផ្លូវការគ្រប់គ្រងដោយបុរីវ៉ាទីកង់ដែលចិនមិនបានទទួលស្គាល់ទេ។
សញ្ញានៃការរំកិលរកគ្នារវាងបុរីវ៉ាទីកង់ និងចិន
ក្នុងរយៈពេលប៉ុន្មានឆ្នាំចុងក្រោយ ពិសេសក្នុងជំនាន់សម្តេចប៉ាបហ្រ្វង់ស័រ ព្រះអង្គតែងតែព្យាយាមសម្របសម្រួលជាមួយចិនដោយសង្ឃឹមនឹងភ្ជាប់ទំនាក់ទំនងប្រក្រតីឡើងវិញ។ អ្វីដែលគ្រប់គ្នាកំពុងទន្ទឹងរង់ចាំ គឺកិច្ចព្រមព្រៀងជាប្រវត្តិសាស្រ្តរវាងចិន និងបុរីវ៉ាទីកង់ដើម្បីដោះស្រាយភាពចម្រូងចម្រាសមួយចំនួន ពិសេសការតែងតាំងគណៈសង្ឃកាតូលិកដែលជាបញ្ហាស្នូលដ៏រសើបជាងគេរវាងគូបដិបក្ខទាំងពីរ។ គេសង្កេតឃើញថាក្នុងរយៈពេលប៉ុន្មានខែចុងក្រោយនេះ ចិនបានបញ្ជូនបេសកជនរបស់ខ្លួនទៅកាន់បុរីវ៉ាទីកង់ក្នុងទីក្រុងរ៉ូម ប្រទេសអ៊ីតាលីជាច្រើនដងដើម្បីចរចាលើកិច្ចព្រមព្រៀងនោះ។ នៅដើមខែវិច្ឆិកានេះ ចិនគ្រោងនឹងបញ្ជូនគណៈប្រតិភូមួយក្រុមទៅកាន់បុរីវ៉ាទីកង់ដើម្បីចរចា និងពិនិត្យសម្រេចចុងក្រោយលើកិច្ចព្រមព្រៀងនោះ មុននឹងចុះហត្ថលេខាជាផ្លូវការ។
យោងតាមសេចក្តីព្រាងនៅក្នុងកិច្ចព្រមព្រៀង សម្តេចប៉ាបអាចនឹងទទួលស្គាល់គណៈសង្ឃកាតូលិកចំនួន ៤រូបក្នុងចំណោម ៨រូបដែលចិនបានតែងតាំង ហើយជាថ្នូរត្រឡប់វិញ ចិនអាចតែងតាំងគណៈសង្ឃចំនួនពីររូបដោយមានការយល់ព្រមពីបុរីវ៉ាទីកង់។ គេអាចនិយាយបានថា ចិន និងបុរីវ៉ាទីកង់អាចនឹងស្រុះស្រួលគ្នាលើនីតិវិធីក្នុងការតែងតាំងគណៈសង្ឃដែលចិនយល់ព្រមឲ្យសម្តេចប៉ាបជាអ្នកសម្រេចចិត្តចុងក្រោយ។ គួរជម្រាបជូនថាមកដល់ពេលនេះ ចិនបានតែងតាំងរូបគណៈសង្ឃដោយមិនបានពិគ្រោះយោបល់ជាមួយបុរីវ៉ាទីកង់ទេ ព្រោះចិនយល់ថា នេះជាកិច្ចការផ្ទៃក្នុងរបស់ចិនដែលចិនមិនត្រូវបានការទទួលមេរៀនពីនរណាម្នាក់ឡើយ។
តែយ៉ាងណាក៏ដោយ ផ្លូវដែលត្រូវដើរនៅវែងឆ្ងាយ និងពោរពេញដោយឧបសគ្គ មុននឹងអនុញ្ញាតឲ្យចិន និងប៉េកាំងអាចភ្ជាប់ទំនាក់ទំនងរវាងគ្នាឡើងវិញ បន្ទាប់ពីបានកាត់ផ្តាច់អស់រយៈពេលជាង ៦ទសវត្ស។
ការយល់ឃើញរបស់គ្រិស្តបរិស័ទចិនចំពោះការរំកិលរកគ្នារវាងបុរីវ៉ាទីកង់ និងប៉េកាំង
អ្វីដែលគ្រិស្តបរិស័ទចិនទូទៅចង់បាននោះ គឺការច្របាច់បញ្ចូលគ្នារវាងស្ថាប័នសាសនាកាតូលិកគ្រប់គ្រងដោយចិន និងស្ថាប័នសាសនាកាតូលិកគ្រប់គ្រងដោយបុរីវ៉ាទីកង់ ឬនិយាយឲ្យស្រួលយល់ មិនចាំបាច់មានស្ថាប័នសាសនាកាតូលិកគ្រប់គ្រងដោយរដ្ឋអំណាចចិនទេ។ គ្រិស្តបរិស័ទចិនភាគច្រើនបានយល់ឃើញថា រដ្ឋាភិបាលចិនមានកិច្ចការជាច្រើនដែលត្រូវធ្វើដោយមិនគួរលូកដៃចូលក្នុងរឿងសាសនាទេ។ តែប៉េកាំងមិនបានយល់ឃើញដូច្នេះទេ ហើយក៏មិនបានត្រៀមខ្លួនដើម្បីរំលាយ« សមាគមកាតូលិកស្នេហាមាតុភូមិចិន » របស់ខ្លួនដែរ។ ម្យ៉ាងទៀត ចិនមានការប្រយ័ត្នប្រយែងខ្លាំងចំពោះបុរីវ៉ាទីកង់ដោយខ្លាចយកសាសនាធ្វើឈ្នាន់ដើម្បីឃោសនារំលំរបបកុម្មុយនីស្ត។
ចំណែកនៅបុរីវ៉ាទីកង់វិញក៏នៅមិនទាន់បានគិតគូរពីការទទួលស្គាល់ « សមាគមកាតូលិកស្នេហាមាតុភូមិចិន » ដែរ។ រីឯគ្រិស្តបរស័ទចិនដែលមានទំនោររកបុរីវ៉ាទីកង់ក៏មិនចង់ផ្តាច់ខ្លួនទៅចូលក្នុង « សមាគមកាតូលិកស្នេហាមាតុភូមិចិន » ដែលពួកគេយល់ថា គណៈសង្ឃកាតូលិកនៅក្នុងសមាគមមួយនេះសុទ្ធសឹងជាអាយ៉ងរបស់រដ្ឋាភិបាលដែលគ្មានស្គាល់តម្លៃសាសនាទេ។ ក្រុមអ្នកវិភាគបានមើលឃើញថា ការប្រេះឆារវាងគ្រិស្តបរិស័ទចិន ពិសេសរវាងគណៈសង្ឃមិនមែនមានត្រឹមតែសាសនាប៉ុណ្ណោះទេ តែវាបានឆ្លងដល់ការប្រជែងគ្នាក្នុងផ្លូវនយោបាយដើម្បីអំណាច និងលុយកាក់ទៀតផង។
ជាការពិតណាស់ សម្តេចប៉ាបហ្រ្វង់ស័រជាអ្នកស្រឡាញ់សន្តិភាព និងជាអ្នកដែលបានបន្ទន់ជំហរ បោះដៃរកចិនមុនគេ។ ព្រះអង្គមានសុទិដ្ឋិនិយមនឹងភ្ជាប់ទំនាក់ទំនងការទូតជាមួយចិនឡើងវិញ ព្រមទាំងមានសុបិនយាងទៅធ្វើទស្សនកិច្ចក្នុងប្រទេសចិននៅថ្ងៃណាមួយ។ សម្តេចប៉ាបហ្រ្វង់ស័របានយល់ឃើញថា មានតែការសម្របសម្រួលទេទើបគេអាចនិយាយបញ្ចុះបញ្ចូលចិនឲ្យទទួលស្គាល់តម្លៃពិតរបស់បុរីវ៉ាទីកង់បាន។ តែកាយវិការរបៀបនេះរបស់ព្រះអង្គកំពុងទទួលរងការរិះគន់យ៉ាងខ្លាំងក្លាដោយមានការចោទប្រកាន់ថា សម្តេចប៉ាបឆោតល្ងង់ធ្វើដូចជាមិនដែលស្គាល់សារជាតិពិតរបស់របបកុម្មុយនីស្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ