កូរ៉េខាងត្បូង៖សម្តេចប៉ាបអំពាវនាវឲ្យចិនផ្តើមកិច្ចសន្ទនាប្រកបដោយលក្ខណៈស្ថាបនាជាមួយបុរីវ៉ាទីកង់
ចុះផ្សាយនៅថ្ងៃ៖
ស្តាប់ - ០៥:៣៧
ថ្ងៃអាទិត្យ ទី១៧ សីហានេះ ជាថ្ងៃទី៤ នៃដំណើរទស្សនកិច្ចរបស់ប្រមុខសង្ឃកាតូលិកសម្តេចប៉ាបហ្រ្វង់ស័រនៅក្នុងទឹកដីកូរ៉េខាងត្បូង។ ថ្ងៃនេះ ព្រះអង្គបានយាងចេញពីទីក្រុងសេអ៊ូលទៅកាន់ទីក្រុងហេមីស្ថិតប៉ែកនីរតីប្រទេស។ នៅទីនោះ សម្តេចប៉ាបបានជួបសន្ទនាជាមួយគណៈសង្ឃកាតូលិកប្រមាណជា ៧០អង្គមកពីប្រទេសអាស៊ីចំនួន ៣៥ប្រទេសនៅក្នុងតំបន់ និងត្រូវចូលរួមនៅក្នុងពិធីបិទទិវាយុវជនអាស៊ីលើកទី៦។ គឺនៅក្នុងជំនួបជាមួយគណៈសង្ឃកាតូលិកមកពីបណ្តាប្រទេសអាស៊ី សម្តេចប៉ាបបានអំពាវនាវឲ្យវិហារកាតូលិកប្រកាន់យកនូវកាយវិការសន្តោសប្រណី និងប្រកបដោយលក្ខណៈស្ថាបនា ព្រមទំាងបានឆ្លៀតបញ្ចូនសារទៅកាន់បណ្តាប្រទេសដែលនៅមិនទាន់មានទំនាក់ទំនងផ្លូវទូតជាមួយបុរីវ៉ាទីកង់ ពិសេសគឺប្រទេសចិន។
សម្តេចប៉ាបមិនបានមានព្រះបន្ទូលសំដៅតែប្រទេសចិនមួយប៉ុណ្ណោះទេ តែបានសំដៅបណ្តាប្រទេសទំាងឡាយណាដែលនៅមិនទាន់មានទំនាក់ទំនងផ្លូវទូតជាមួយបុរីវ៉ាទីកង់នៅឡើយ។ ប្រទេសទំាងនោះរួមមាន ចិន កូរ៉េខាងជើង អាហ្វហ្កានីស្ថាន អារ៉ាប៊ីសាអូឌីត ប៊ូតង់ ព្រុយណេ ឡាវ វៀតណាម អូម៉ង់ ឬមួយក៏ប្រទេសមីយ៉ាន់ម៉ាជាដើម។ សម្តេចប៉ាបបានទទួលស្គាល់ថា អាស៊ី ជាទ្វីបមួយដែលមានសាសនាចម្រុះ និងវប្បធម៌ចម្រុះ តែព្រះអង្គចង់ឃើញគ្រិស្តសាសនាក្លាយជាសាសនាមួយដែលមិនត្រូវបានគេរំលោភបំពាន រារំាងនោះទេ។ ទន្ទឹមគ្នានេះ ព្រះអង្គក៏បានអំពាវនាវឲ្យអ្នកកាន់គ្រិស្តសាសនាទំាងអស់ប្រកាន់យកនូវឥរិយាបទសន្តោសប្រណី និងប្រកបដោយលក្ខណៈស្ថាបនា។ គឺជាមួយនឹងកាយវិការបើកចំហនេះហើយដែលសម្តេចប៉ាបបានឆ្លៀតអំពាវនាវដល់ប្រទេសអាស៊ីណាដែលនៅមិនទាន់មានទំនាក់ទំនងការទូតជាមួយបុរីវ៉ាទីកង់ ឲ្យផ្តើមបើកកិច្ចចរចាដើម្បីផលប្រយោជន៍រួមទំាងអស់គ្នា។
នៅត្រង់ចំណុចនេះ សម្តេចប៉ាបចង់មានបន្ទូលសំដៅប្រទេសចិនដែលគ្មានទំនាក់ទំនងផ្លូវទូតជាមួយបុរីវ៉ាទីកង់តំាងពីឆ្នំា ១៩៤៩ មកម្ល៉េះ ពោលតំាងពីការឡើងកាន់អំណាចរបស់គណបក្សកុម្មុយនិស្តចិនមក។ ការនិយាយយ៉ាងដូចនេះមិនមែនមានន័យថា ចិនមិនមានវិហារកាតូលិក ឬអ្នកកាន់គ្រិស្តសាសនានោះទេ តែសហគមន៍សាសនាមួយនេះត្រូវបានបែងចែកជាពីរ នៅម្ខាង គឺវិហារកាតូលិកផ្លូវការរបស់រដ្ឋដែលគេហៅថា « សមាគមស្នេហាមាតុភូមិ » ស្មោះត្រង់នឹងបក្សកុម្មុយនិស្ត និងនៅម្ខាងទៀត ជាវិហារកាតូលិកលួចលាក់ដែលស្មោះត្រង់នឹងបុរីវ៉ាទីកង់។ អ្នកនំាពាក្យបុរីវ៉ាទីកង់បានថ្លែងថា ចិនមិនគួរណាបារម្ភខ្លាចបុរីវ៉ាទីកង់លូកដៃចូលជ្រៀតជ្រែកកិច្ចការផ្ទៃក្នុងរបស់ខ្លួនទេ ព្រោះវាជារឿងសាសនាសុទ្ធសាធ គ្មានជាប់ពាក់ព័ន្ធនឹងរឿងនយោបាយទេ។
តៃវ៉ាន ជារឿងដែលធ្វើឲ្យបុរីវ៉ាទីកង់ និងប៉េកំាងបន្តមើលមុខគ្នាមិនចំ
គួរជម្រាបជូនថា នេះមិនមែនជាលើកទី១ទេដែលបុរីវ៉ាកង់បានប្រើនយោបាយការទូតទន់ភ្លន់ជាមួយចិន។ អស់ជាច្រើនឆ្នំាកន្លងមកហើយដែលបុរីវ៉ាទីកង់បានអំពាវនាវឲ្យមានកិច្ចចរចាជាមួយរដ្ឋអំណាចចិនដើម្បីបិទបញ្ចប់អធិកររវាងគ្នា តែចិននៅបន្តប្រកាន់ជំហរដាច់ខាតរបស់ខ្លួន។ មានប្រធានរឿងសំខាន់តែពីរគត់ដែលបានធ្វើឲ្យបុរីវាទីកង់ និងប៉េកំាងបន្តមើលមុខគ្នាមិនចំរហូតមកដលសព្វថ្ងៃ។ ទី១ គឺទាក់ទងនឹងការជ្រើសរើសគណៈសង្ឃកាតូលិកចិនដែលរដ្ឋអំណាចចិន និងបុរីវ៉ាទីកង់បន្តប្រទាញប្រទង់គ្នាដើម្បីសម្រេច។ បុរីវ៉ាទីកង់អះអាងថា នេះជាតួនាទីរបស់ខ្លួនក្នុងការជ្រើសរើស តែចិនបានបញ្ជាក់ថា ត្រូវតែមានការយល់ព្រមពីខ្លួនជាមុនសិន។ ចំណែកប្រធានរឿងចម្រូងចម្រាសទី២ គឺទាក់ទងនឹងរឿងដែលបុរីវ៉ាទីកង់បានទទួលស្គាល់កោះតៃវ៉ាន់ជាផ្លូវការ។
គឺរឿងតៃវ៉ាន់នេះហើយដែលបានធ្វើឲ្យចិនក្តៅក្រហាយជាងគេ ព្រោះថា ក្រោមភ្នែកច្រមុះរបស់ទីក្រុងប៉េកំាង តៃវ៉ាន់មិនមែនជាប្រទេសឯករាជ្យមួយទេ តែជាខេត្តឧទ្ទាមមួយរបស់ខ្លួនដែលចិនមិនញញើតនឹងវាយប្រហារ ប្រសិនបើតៃវ៉ាន់ហ៊ានប្រកាសឯករាជ្យនោះ។ គួរជម្រាបជូនថា កុំថាឡើយបុរីវ៉ាទីកង់ សូម្បីប្រទេសណាក៏ដោយដែលមានទំនាក់ទំនងជាមួយតៃវ៉ាន់ ឬមួយក៏ហ៊ានល្អូកល្អឺនជាមួយតៃវ៉ាន់ ក៏ចិនមិនសប្បាយចិត្តដែរ។
កិច្ចសន្ទនារវាងបុរីវ៉ាទីកង់ និងវៀតណាមកំពុងមានដំណើរវិជ្ជមាន
ក្រៅពីការព្យាយាមបោះដៃជាថ្មីទៅរកប្រទេសចិន សាររបស់សម្តេចប៉ាបក៏បានផ្តោតទៅរកប្រទេសកុម្មុយនិស្តនៅអាស៊ីផ្សេងដែរ ដូចយ៉ាងកូរ៉េខាងជើង និងវៀតណាម។ នាដំណើរទស្សនកិច្ចរបស់សម្តេចប៉ាបក្នុងទឹកដីកូរ៉េខាងត្បូង វិហារកាតូលិកនៅកូរ៉េខាងត្បូងក៏បានអញ្ជើញសមាជិករបស់សមាគមកាតូលិកកូរ៉េខាងជើងដែលស្ថិតក្រោមការគ្រប់គ្រងរបស់រដ្ឋឲ្យចូលរួមដែរ តែត្រូវបានរដ្ឋអំណាចព្យុងយ៉ាងបដិសេធ។ ការឆ្លើយបដិសេធមកពីកូរ៉េខាងជើងចង់សម្តែងការមិនសប្បាយចិត្តរបស់ខ្លួននឹងសមយុទ្ធរវាងទាហានកូរ៉េខាងត្បូង និងអាមេរិក។ នៅកូរ៉េខាងជើង សិទ្ធិសេរីភាពសាសានាត្រូវបានធានាដោយច្បាប់រដ្ឋធម្មនុញ្ញ តែការអនុវត្តន៍ជាក់ស្តែង មិនត្រូវបានអនុញ្ញាតទេ។
ដោយឡែកជាមួយប្រទេសវៀតណាមវិញ កិច្ចសន្ទនារវាងបុរីវ៉ាទីកង់ និងក្រុងហាណូយកំពុងមានដំណើរទៅមុខជានិច្ច ហើយបើគ្មានអ្វីចូលមករារំាងទេ ការភ្ជាប់ទំនាក់ទំនងការទូតរវាងបុរីវ៉ាទីកង់ និងវៀតណាមនឹងផ្តើមមាននៅប៉ុន្មានឆ្នំាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ