ប៉ាគីស្ថានស្វាគមលោក Erdogan និងបណ្តេញគ្រូបង្រៀនតួកគីចេញពីប្រទេសខ្លួន
ប៉ាគីស្ថាននឹងបណ្តេញគ្រូបង្រៀនសញ្ជាតិតួកគីចំនួន១៣០នាក់ដែលមានទំនាក់ទំនងជាមួយលោក Gulen មេដឹកនាំសាសនាមួយរូបដែលតួកគីចោទថាជាមេក្លោងនៅពីក្រោយនៃការប៉ុនប៉ងធ្វើរដ្ឋប្រហារមិនបានសម្រេចមួយនាពេលថ្មីៗកន្លងទៅនេះ។ សេចក្តីជូនដំណឹងរបស់ប៉ាគីស្ថាននេះ ត្រូវបានធ្វើឡើងនៅខណៈពេលដែលទីក្រុងអ៊ីស្លាម៉ាបាត ស្វាគមន៍លោកប្រធានាធិបតីតួកគីនៅលើទឹកដីខ្លួននៅថ្ងៃពុធម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ក្រុមគ្រូបង្រៀនដែលសុទ្ធស៊ឹងជាបុគ្គលិកនៃបណ្តាញសាលារៀនរបស់អង្គការក្រៅរដ្ឋាភិបាលនិងក្រុមហ៊ុននានាដឹកនាំដោយលោក Gulen នឹងត្រូវចាកចេញពីប្រទេសប៉ាគីស្ថានជាមួយនឹងក្រុមគ្រួសាររបស់ពួកគេឲ្យបាននៅមុនថ្ងៃទី២០វិច្ឆិកា។ នេះជាការគូសបញ្ជាក់របស់មន្ត្រីទទួលខុសត្រូវនៅស្ថាប័នអប់រំនិងក្នុងរដ្ឋាភិបាលប៉ាគីស្ថាន។
ការសំរេចចិត្តរបស់រដ្ឋាភិបាលប៉ាគីស្ថាននេះ បានរងផលប៉ះពាល់ជាសរុបទៅដល់ជនចំនួន៤៥០នាក់និងក៏ប៉ះពាល់ដោយប្រយោលផងដែរទៅដល់កូនសិស្សសាលាចំនួនរាប់ពាន់នាក់ទៀតនៅប៉ាគីស្ថាន។ ប្រទេសមួយដែលរដ្ឋាភិបាល បានប៉ាន់ប្រមាណថា មានកុមារចំនួន២៤លាននាក់ មិនបានចុះឈ្មោះចូលរៀននៅក្នុងសាលាទេ។
ប្រធានាធិបតីតួកគីលោក Erdogan វិញនៅមុនពេលចេញដំណើរទៅកាន់ប៉ាគីស្ថានចំនួន២ថ្ងៃ បានថ្លែងបា្រប់ដល់ក្រុមអ្នកកាសែតថា”ដំណឹងបានមកពីប៉ាគីស្ថាន គឺជា«ដំណឹងដ៏គួរឲ្យរីករាយខ្លាំងណាស់»។ ពីព្រោះ អាជ្ញាធរតួកគី តែងតែចាត់ទុកបណ្តាញរបស់លោក Gulen ថា ជាអង្គការភេរវកម្ម។ លោក Gulen ដែលជាគ្រូបង្រៀនសាសនាអ៊ីស្លាមនិងមានអាយុ៧៥ឆ្នាំ សព្វថ្ងៃនេះ កំពុងនិរទេសខ្លួនរស់នៅក្នុងទឹកដីសហរដ្ឋអាមេរិក។ សព្វថ្ងៃនេះ តួកគីកំពុងទាមទារឲ្យអាមេរិកធ្វើបត្យាប័នបញ្ចូនរូបគាត់មកអោយតួកគីវិញ។
នាយករដ្ឋមន្ត្រីតួកគីវិញ បានថ្លែងអំណរគុណប៉ាគីស្ថាន ចំពោះចំណងមិត្តភាពនិងសាម្គីភាពដ៏រឹងមាំរវាងប៉ាគីស្ថាននិងតួកគីនៅក្នុងការប្រយុទ្ធប្រឆាំងទល់នឹងអំពើភេរវនិយមដែលតួកគីចោទជានិច្ចថាជាស្នាដៃរបស់បក្សព័ន្ធលោក Gulen ។ លោក Gulenដែលតែងតែបដិសេធរាល់ការចូលរួមទាំងឡាយនៅក្នុងរដ្ឋប្រហារមិនបានសម្រេចនាពេលកន្លងទៅនៅតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ