ស្លាប់យ៉ាងហោច១៨នាក់ ក្នុងភេរវកម្មបំផ្ទុះរថយន្តនៅតួកគី
នៅតួកគី ថ្ងៃអាទិត្យនេះ ភេរវកម្មបំផ្ទុះរថយន្តមួយបានកើតឡើង នៅមុខប៉ុស្តិ៍ប៉ូលិសមួយកន្លែង ក្នុងខែត្រហាក់ការី ភាគអាគ្នេយ៍ សម្លាប់មនុស្សយ៉ាងហោច១៨នាក់ ក្នុងនោះមានទាហាន១០នាក់។ មនុស្ស២៦នាក់ផ្សេងទៀត បានរងរបួសក្នុងភេរវកម្ម។ សារព័ត៌មានតួកគី បានចោទក្រុមបះបោរគួដ នៃបក្សការងារPKK ថាជាមេក្លោងភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
នៅមុខប៉ុស្តិប៉ូលិស នៅខែត្រហាក់ការី ភាគអាគ្នេយ៍តួកគី ភេរវជនអត្តឃាត បានបំផ្ទុះរថយន្តមួយគ្រឿង ដោយប្រើគ្រឿងផ្ទុះដល់ទៅ៥តោន ធ្វើអោយទាហាននិងជនស៊ីវិលច្រើននាក់ស្លាប់និងរងរបួស។ តួលេខអ្នកស្លាប់ច្រើនដូច្នេះ ដោយសារភេរវកម្មបានកើតឡើង នៅជិតកន្លែងដែលមនុស្សម្នានាំគ្នារង់ចាំជិះរថយន្តក្រុង។
ខែត្រហាក់ការី ដែលរងភេរវកម្មនេះ សំបូរសហគមន៍ប្រជាជនគួដរស់នៅ។ ខែត្រនេះ ស្ថិតនៅជិតព្រំដែនអ៊ីរ៉ាក់ និងអ៊ីរ៉ង់។ រដ្ឋាភិបាលតួកគីបានថ្កោលទោសភេរវកម្ម និងប្រកាសមិនចុះចាញ់ក្រុមភេរវជនដាច់ខាត។ យោងតាមឧបនាយករដ្ឋមន្ត្រីតួកគី ភេរវកម្មនេះសបង្ហាញពីការស្អប់ខ្ពើមរបស់ក្រុមភេរវជនទៅលើទាហានតួកគី។
សារព័ត៌មានតួកគីបានទំលាក់កំហុសទៅលើក្រុមបះបោរគួដ នៃបក្សការងារPKK ថាជាមេក្លោងភេរវកម្មនេះ។ តួកគី អាមេរិក និងសហភាពអឺរ៉ុបចាត់ទុកក្រុមបះបោរPKKថា ជាក្រុមភេរវជន។ តាំងពីឆ្នាំ១៩៨៤មក ក្រុមកួដPKK បានធ្វើសកម្មភាពប្រឆាំងរដ្ឋាភិបាលតួកគី។ ហិង្សាបានសម្លាប់មនុស្សជាង៤ម៉ឺននាក់៕
ដោយឡែក កាលពីថ្ងៃសៅរ៍ នៅជិតក្រុងអង់ការ៉ា បុរសម្នាក់និងស្ត្រីម្នាក់ដែលជាប់ សង្ស័យថា ជិតដិតនឹងក្រុមគួដPKKតួកគី បានបង្កភេរវកម្មបំផ្ទុះគ្រាប់បែកឡើង ពេលដែលប៉ូលិសមកចាប់ខ្លួនពួកគេ។ ពួកគេទាំង២នាក់បានស្លាប់ក្នុងភេរវកម្ម តែភេរវកម្មមិនបានសម្លាប់មនុស្សផ្សេងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ