កូរ៉េខាងត្បូង៖វាសនាប្រធានាធិបតីរបស់លោកស្រីប៉ាក់ គុនហេឈានដល់ទីបញ្ចប់!
ចុះផ្សាយនៅថ្ងៃ៖
ស្តាប់ - ០៦:១១
នៅកូរ៉េខាងត្បូង ក្តីសង្ឃឹមបន្តតោងតំណែងប្រធានាធិបតីដល់ចប់អាណត្តិជាផ្លូវការរបស់លោកស្រីប៉ាក់ គុនហេមានកាន់តែតិចទៅៗ។ នៅថ្ងៃព្រហស្បតិ៍ ទី៨ ធ្នូនេះ និងដូចបានគ្រោងទុក ក្រុមអ្នកតំណាងរាស្រ្តរបស់គណបក្សប្រឆាំងបានបញ្ជូនញត្តិទម្លាក់លោកស្រីប៉ាក់ គុនហេទៅកាន់សភា។ គួរជម្រាបជូនថា អស់ជាច្រើនសប្តាហ៍មកហើយដែលលោកស្រីប៉ាក់ គុនហេបានជាប់ចោទ និងទទួលរងគំនាបពីចលនាមហាជនក្នុងរឿងអាស្រូវពុករលួយ និងការរំលោភអំណាច។
ញត្តិទម្លាក់លោកស្រីប៉ាក់ គុនហេដែលក្រុមតំណាងរាស្រ្តបក្សប្រឆាំងបានដាក់សំណើទៅកាន់សភាថ្ងៃនេះបានចោទលោកស្រីតាំងពីរឿងរ៉ាវដែលកំពុងបន្តមានយ៉ាងក្តៅគគុកបច្ចុប្បន្នរហូតដល់រឿងរ៉ាវអតីតកាល។ តែបទចោទប្រកាន់លើលោកស្រីប៉ាក់ គុនហេដែលក្រុមតំណាងរាស្រ្តបក្សប្រឆាំងបានយកទៅធ្វើជាអាទិភាពពេលនេះរួមមាន ការរំលោភបំពានច្បាប់រដ្ឋធម្មនុញ្ញ បទល្មើសព្រហ្មទ័ណ្ឌ ការរំលោភអំណាច និងអំពើពុករលួយ។ អំពើពុករលួយដែលក្រុមប្រឆាំងបានយល់ឃើញថា រូបលោកស្រីប៉ាក់ គុនហេខ្លួនឯងមិនបានធ្វើជាគំរូល្អសម្រាប់ពលរដ្ឋទេ។ ចំណែករឿងរ៉ាវអតីតកាលវិញ ក្រុមតំណាងរាស្រ្តបក្សប្រឆាំងបានលើកឡើងពីសោកនាដកម្មលិចសាឡាងកាលពីឆ្នាំ ២០១៤ ដែលបណ្តាលឲ្យមានមនុស្សស្លាប់ចំនួន ៣០៤នាក់ ភាគច្រើនជាសិស្សសាលា។
នៅក្នុងរឿងរ៉ាវសោកនាដកម្មមួយនេះត្រូវបានបណ្តាញសារព័ត៌មានក្នុងស្រុកចោទជាសំណួរ និងដែលនៅមិនទាន់មានចម្លើយនៅឡើយទេមកទល់ថ្ងៃនេះ តើលោកស្រីប៉ាក់ គុនហេកំពុងធ្វើអ្វីខ្លះក្នុងរយៈពេល ៧ម៉ោង គិតពីពេលដែលលោកស្រីបានទទួលព័ត៌មានសោកសៅមួយនេះ និងការដែលរដ្ឋាភិបាលរបស់លោកស្រីបានបើកកិច្ចប្រជុំបន្ទាន់ទី១ នាពេលនោះ។ មានព័ត៌មានលើកឡើងគួរឲ្យភ្ញាក់ផ្អើលថាក្នុងរយៈពេល ៧ម៉ោងនោះ លោកស្រីប៉ាក់ គុនហេកំពុងណាក់ជួបស្នេហា ឬមួយក៏កំពុងកាត់សក់ធ្វើមុខ ធ្វើមាត់ដែលម្តងៗប្រើពេល ១ម៉ោងកន្លះ។
នៅក្នុងញត្តិទម្លាក់លោកស្រីប៉ាក់ គុនហេពេលនេះ ក្រុមប្រឆាំងបានចោទលោកស្រីពីបទមិនបានបញ្ចេញប្រតិកម្មឲ្យទាន់សភាពការណ៍ ពោលបានរំលោភកាតព្វកិច្ចធម្មនុញ្ញជាប្រធានាធិបតីក្នុងការ ការពារជីវិតពលរដ្ឋ។
នីតិវិធីនៃការទម្លាក់លោកស្រីប៉ាក់ គុនហេអាចអូសបន្លាយរាប់ខែ
ដើម្បីអាចទម្លាក់លោកស្រីប៉ាក់ គុនហេជាស្ថាពរបាន ញត្តិរបស់ក្រុមអ្នតំណាងរាស្រ្តនឹងត្រូវទទួលបានការអនុម័តពីសភាក្នុងសម្លេង ២ភាគ៣ និងការយល់ព្រមពីតុលាការធម្មនុញ្ញ។ កន្លងមក ញត្តិទម្លាក់លោកស្រីប៉ាក់ គុនហេទទួលបានការគាំទ្រពីក្រុមអ្នកតំណាងរាស្រ្តបក្សប្រឆាំងទាំង ១៧១រូបក្នុងចំណោមអ្នកតំណាងរាស្រ្តសរុបទាំង ៣០០នាក់នៅក្នុងសភាកូរ៉េខាងត្បូង។ តែដើម្បីអាចទទួលបានសម្លេងគាំទ្រ ២ភាគ៣ បក្សប្រឆាំងត្រូវការសម្លេងគាំទ្រពីក្រុមអ្នកតំណាងរាស្រ្តនៃបក្សកាន់អំណាចរបស់លោកស្រីប៉ាក់ គុនហេចំនួន ២៩រូប។
កន្លងមក ក្រុមអ្នកតំណាងរាស្រ្តបក្សកាន់អំណាចតែងតែរារែក អាល់អែក តែខណៈនេះ មានភាគច្រើនហាក់បានសម្រេចចិត្តគាំទ្រលើញត្តិរបស់បក្សប្រឆាំង។ ប្រសិនបើញត្តិនោះត្រូវបានសភាអនុម័តនៅថ្ងៃសុក្រ ទី៩ ធ្នូមែន គេត្រូវរង់ចាំការសម្រេចចិត្តចុងក្រោយរបស់តុលាការធម្មនុញ្ញ។ បើមានភ្លើងខៀវពីតុលាការធម្មនុញ្ញទៀត តំណែងប្រធានាធិបតីរបស់លោកស្រីប៉ាក់ គុនហេនឹងត្រូវចប់ត្រឹមនេះ។ តែនីតិវិធីនៅតុលាការធម្មនុញ្ញអាចនឹងប្រើពេលយូរខែ។ ក៏ប៉ុន្តែ ក្នុងពេលរង់ចាំការសម្រេចរបស់តុលាការធម្មនុញ្ញ តំណែងលោកស្រីប៉ាក់ គុនហេនឹងត្រូវព្យួរ ហើយកិច្ចការប្រធានាធិបតីនឹងត្រូវប្រគល់ទៅឲ្យនាយករដ្ឋមន្រ្តី។
គួររម្លឹកជូនថា មានហេតុផលចំនួនពីរដែលក្រុមអ្នកតំណាងរាស្រ្តបក្សប្រឆាំងបានដាក់ញត្តិទម្លាក់លោកស្រីប៉ាក់ គុនហេពេលនេះ ទី១ មកពីមានគំនាបពលរដ្ឋកាន់តែខ្លាំងឡើងៗដែលទាមទារឲ្យលោកស្រីប៉ាក់ គុនហេចុះចេញពីតំណែង។ គំនាបពលរដ្ឋដែលបានសម្តែងឡើងតាមរយៈមហាបាតុកម្មជាប់ៗគ្នាចូលរួមដោយមនុស្សជាច្រើនលាននាក់ និងទី២ មកពីលោកស្រីប៉ាក់ គុនហេមិនព្រមលាចុះដោយខ្លួនឯង។
លោកស្រីប៉ាក់ គុនហេជាប្រធានាធិបតីទី១ ដែលមិនបានបញ្ចប់អាណត្តិពេញលេញ !
បើតាមមើលទៅ លោកស្រីប៉ាក់ គុនហេប្រហែលជាគ្មានផ្លូវផ្សេងដើម្បីគេចទៀតទេ។ បើមិនចុះចេញខ្លួនឯង ក៏ត្រូវគេទម្លាក់ដែរ ហើយសូម្បីតែលោកស្រីខ្លួនឯងក៏បានដឹងខ្លួនមុន និងធ្លាប់បាននិយាយថា លោកស្រីយល់ព្រមឲ្យមានការទម្លាក់ពីសភា។ កន្លងមក និងដើម្បីលុបលាងកំហុសឆ្គង លោកស្រីបានចេញមុខទទួលសារភាព និងសុំទោសជាសាធារណៈ តែមិនគ្រប់គ្រាន់ដើម្បីអាចស្រោចស្រង់កៅអីប្រធានាធិបតីរបស់លោកស្រីបានឡើយ។ សូមជម្រាបជូនថា មានអាយុ ៦៤ឆ្នាំ កម្រិតប្រជាប្រិយភាពរបស់លោកស្រីប៉ាក់ គុនហេបានធ្លាក់ចុះរហូតដល់ក្រោម ១០% ដែលជាកម្រិតមួយទាបដល់បាត និងជាកម្រិតមួយដែលគ្មានប្រធានាធិបតីកូរ៉េខាងត្បូងមុនៗណាម្នាក់ធ្លាប់ទទួលបានទេ។
កំណត់សម្គាល់មួយទៀត ប្រសិនបើសភាបោះឆ្នោតគាំទ្រញត្តិ ហើយមានការយល់ព្រមពីតុលាការធម្មនុញ្ញទៀត លោកស្រីប៉ាក់ គុនហេដែលបានជាប់ឆ្នោតតាមបែបប្រជាធិបតេយ្យនឹងក្លាយជាប្រធានាធិបតីកូរ៉េខាងត្បូងទី១ ដែលមិនបានបញ្ចប់អាណត្តិ ៥ឆ្នាំពេញលេញរបស់ខ្លួន។ ជាទូទៅនៅកូរ៉េខាងត្បូង ទោះបីជាមានរឿងអាស្រូវបែកធ្លាយប៉ុណ្ណាក៏ដោយ ក៏គេមិនធ្លាប់ឃើញមានប្រមុខរដ្ឋណាម្នាក់លាចុះពីតំណែង ឬមួយក៏ត្រូវសភាបោះឆ្នោតទម្លាក់ទេ។ តែបើមានសម្រាប់លោកស្រីប៉ាក់ គុនហេ ការរៀបចំបោះឆ្នោតប្រធានាធិបតីថ្មីនឹងត្រូវរៀបចំយ៉ាងយូរបំផុតក្នុងរយៈពេល ៦០ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ