ស្តេចអារ៉ាប៊ីសាអូឌីតផ្តើមទស្សនកិច្ចមួយជុំទ្វីបអាស៊ីដើម្បីស្វែងរកចំណូលផ្សេង ក្រៅពីលក់ប្រេងឆៅ
ចុះផ្សាយនៅថ្ងៃ៖
ស្តាប់ - ០៦:១១
នៅថ្ងៃអាទិត្យ ទី២៦ កុម្ភៈនេះ ស្តេចអារ៉ាប៊ីសាអូឌីតសាលម៉ានផ្តើមព្រះរាជទស្សនកិច្ចមួយជុំទ្វីបអាស៊ីរយៈពេល ១ខែ។ មានប្រទេសអាស៊ីចំនួន ៤ ដែលព្រះអង្គយាងទៅទស្សនកិច្ច គឺម៉ាឡេស៊ី ឥណ្ឌូណេស៊ី ជប៉ុន និងប្រទេសចិន។ នាឱកាសព្រះរាជទស្សនកិច្ចនេះ ស្តេចសាលម៉ានសង្ឃឹមកសាងទំនាក់ទំនងជាមួយប្រទេសដៃគូទិញប្រេងអារ៉ាប៊ីសាអូឌីត និងជំនះប្រទេសអាស៊ីទាំងនេះឲ្យបង្កើនវិនិយោគនៅអារ៉ាប៊ីសាអូឌីត។ នៅក្នុងព្រះរាជទស្សនកិច្ចមួយជុំទ្វីបអាស៊ីរយៈពេល ១ខែ ស្តេចសាលម៉ានបាននាំគណៈប្រតិភូ និងប្រធានក្រុមហ៊ុន រោងចក្រសហគ្រាសសំខាន់ៗទៅជាមួយដែលសរុបមានគ្នា ១ ៥០០នាក់។
គោលដៅនៃព្រះរាជទស្សនកិច្ចរបស់ស្តេចអារ៉ាប៊ីសាអូឌីតសាលម៉ានមួយជុំទ្វីបអាស៊ីរយៈពេល ១ខែពេលនេះ គឺដើម្បីលើកស្ទួយវិស័យសេដ្ឋកិច្ចដោយពឹងលើចំណូលផ្សេង ក្រៅពីលក់ប្រេងឆៅ។ ជម្រើសមិនចង់ឲ្យដង្ហើមសេដ្ឋកិច្ចពឹងផ្អែកតែលើចំណូលបានមកពីការលក់ប្រេងឆៅមិនមែនជាជម្រើសចៃដន្យទេ ព្រោះក្នុងរយៈពេលប៉ុន្មានឆ្នាំចុងក្រោយនេះ ចំណូលបានមកពីការលក់ប្រេងឆៅបានធ្លាក់ចុះយ៉ាងគំហុកដោយសារតែតម្លៃប្រេងឆៅបានធ្លាក់ថ្លៃខ្លាំងពេក។ ចំណូលធ្លាក់ចុះ តែរដ្ឋាភិបាលបន្តចំណាយដូចសព្វមួយដងដែលបានជំរុញឲ្យមានឱនភាពថវិកាយ៉ាងច្រើនសម្បើម។
គឺផ្តើមចេញពីចំណុចមួយនេះហើយបានជារដ្ឋាភិបាលអារ៉ាប៊ីសាអូឌីតផ្តើមគិតគូរ ពិចារណាស្វែងរកចំណូលផ្សេងក្រៅពីការលក់ប្រេងឆៅ។ នៅក្នុងឆ្នាំ ២០១៦ ទីក្រុងរីយ៉ាដបានដាក់ចេញនូវកម្មវិធីចម្រុះដើម្បីធ្វើកំណែទម្រង់សេដ្ឋកិច្ចក្រោមឈ្មោះថា « ចក្ខុវិស័យឆ្នាំ ២០៣០ » ហើយតួអង្គដែលបានបង្កើតឲ្យមានកំណែទម្រង់ក្រោមឈ្មោះ « ចក្ខុវិស័យឆ្នាំ ២០៣០ » នេះឡើង គឺស្តេចស្នងរាជ្យម៉ូហាម៉េត បិន សាលម៉ានដ៏មានឥទ្ធិពលមួយអង្គ។
ពិតណាស់ វិស័យថាមពលនៅបន្តជាវិស័យអាទិភាពរវាងអារ៉ាប៊ីសាអូឌីត និងប្រទេសអាស៊ីមួយចំនួន តែអ្វីដែលអារ៉ាប៊ីសាអូឌីតត្រូវការបន្ថែមនោះ គឺចង់ឲ្យធនាគារ និងក្រុមហ៊ុននៅក្នុងប្រទេសអាស៊ីទាំងនោះដាក់ទុនវិនិយោគទៅក្នុងវិស័យផ្សេងទៀត ក្រៅពីថាមពល។
ទំនាក់ទំនងសាសនា និងសេដ្ឋកិច្ចរវាងអារ៉ាប៊ីសាអូឌីតជាមួយម៉ាឡេស៊ី និងឥណ្ឌូណេស៊ី
គេអាចចែកចេញជាពីររវាងប្រទេសអាស៊ីទាំង ៤ ដែលស្តេចអារ៉ាប៊ីសាអូឌីតសាលម៉ានយាងទៅទស្សនកិច្ចពេលនេះ ទី១ គឺប្រទេសម៉ាឡេស៊ី និងឥណ្ឌូណេស៊ីដែលជាប្រទេសកាន់សាសនាអ៊ីស្លាមដ៏ធំជាងគេនៅអាស៊ី និងក៏ជាប្រទេសដែលមានទំនាក់ទំនងសេដ្ឋកិច្ច ព្រមទាំងការដោះដូរពាណិជ្ជកម្មយ៉ាងសំខាន់ជាមួយអារ៉ាប៊ីសាអូឌីត។ ចំណែកប្រទេសអាស៊ីពីរទៀត គឺជប៉ុន និងចិនបានផ្តោតខ្លាំងសឹងតែផ្តាច់មុខលើទំនាក់ទំនងសេដ្ឋកិច្ច និងការដោះដូរពាណិជ្ជកម្ម។
នៅម៉ាឡេស៊ីដែលជាប្រទេសទី១ នៃព្រះរាជទស្សនកិច្ចរបស់ស្តេចសាលម៉ានថ្ងៃនេះ ព្រះអង្គសំដៅពង្រឹងទំនាក់ទំនងជាមួយទីក្រុងគូឡាំឡាំពួនៅក្នុងវិស័យឧស្សាហកម្ម ពាណិជ្ជកម្ម វិនិយោគ និងក្នុងវិស័យធនធានមនុស្ស។ នៅក្នុងប្រទេសឥណ្ឌូណេស៊ីដែលស្តេចសាលម៉ានត្រូវយាងទៅនស្សនកិច្ចពីថ្ងៃទី១ ដល់ថ្ងៃទី៩ មីនាត្រូវបានរដ្ឋាភិបាលទីក្រុងហ្សាការតាចាត់ទុកជាទស្សនកិច្ចប្រវត្តិសាស្រ្ត។ ជាប្រវត្តិសាស្រ្តព្រោះជាលើកទី១ គិតតាំងពី ៤៦ឆ្នាំដែលមានស្តេចអារ៉ាប៊ីសាអូឌីតយាងទៅជាន់ទឹកដីឥណ្ឌូណេស៊ីដែលជាប្រទេសដែលមានអ្នកកាន់សាសនាអ៊ីស្លាមច្រើនជាងគេក្នុងលោក។
យ៉ាងណាក៏ដោយ លោកប្រធានាធិបតីឥណ្ឌូណេស៊ីវីដូដូក៏សង្ឃឹមនឹងទទួលផលវិនិយោគពីព្រះរាជទស្សនកិច្ចរបស់ស្តេចសាលម៉ានពេលនេះដែរ។
ជប៉ុន និងចិនជាប្រទេសអាស៊ីពីរដែលអារ៉ាប៊ីសាអូឌីតសង្ឃឹមច្រើនជាងគេ
លក្ខណៈពិសេសនៃទំនាក់ទំនងរវាងអារ៉ាប៊ីសាអូឌីតជាមួយជប៉ុន ក៏ដូចជាមួយចិន គឺផ្តោតសំខាន់លើវិស័យសេដ្ឋកិច្ច និងពាណិជ្ជកម្ម។ នៅក្នុងប្រទេសជប៉ុន នេះជាទស្សនកិច្ចលើកទី១ របស់ស្តេចអារ៉ាប៊ីសាអូឌីតគិតក្នុងរយៈពេល ៤៦ឆ្នាំកន្លងទៅ ហើយក៏ជាទស្សនកិច្ចដែលមានបង្កប់ទៅដោយអត្ថន័យនៃទំនាក់ទំនងល្អនៅក្នុងវិស័យសេដ្ឋកិច្ច និងពាណិជ្ជកម្មដែរ។ ចូរកុំភ្លេចថា ប្រេងចំនួន ១ភាគ៣ ដែលជប៉ុនបាននាំចូល គឺទិញពីអារ៉ាប៊ីសាអូឌីត ហើយអារ៉ាប៊ីសាអូឌីតបានទិញពីជប៉ុនវិញ នូវរថយន្ត គ្រឿងសម្ភារៈបរិក្ខារផ្សេងៗ រួមទាំងវត្ថុធាតុដែមជាច្រើនដែលសរុបជាប្រាក់មានដល់ទៅ ៦ ៩០០លានអឺរ៉ូក្នុងឆ្នាំ ២០១៥។
នៅក្នុងដំណើរទស្សនកិច្ចរបស់ស្តេចសាលម៉ាននៅជប៉ុនដែលគ្រោងធ្វើពីថ្ងៃទី១២ ដល់ថ្ងៃទី១៤ មីនា ទីក្រុងរីយ៉ាដចង់ឲ្យទីក្រុងតូក្យូដែលជាមហាអំណាចសេដ្ឋកិច្ចទី៣ ក្នុងលោកបោះទុនវិនិយោគបន្ថែមនៅក្នុងវិស័យថាមពលមិនចេះសាបសូន្យ នៅក្នុងវិស័យបច្ចេកវិទ្យាផ្សេងៗ និងនៅក្នុងកម្មវិធីអប់រំធនធានមនុស្ស។ បច្ចុប្បន្ន ក្រុមហ៊ុនជប៉ុនកំពុងបង្ហាត់បង្រៀនក្រុមយុវជនអារ៉ាប៊ីសាអូឌីតដើម្បីចូលជំនួសបុគ្គលិក និងកម្មករបរទេសដែលកំពុងធ្វើការងារនៅក្នុងទឹកដីអារ៉ាប៊ីសាអូឌីត។
ដោយឡែក ទំនាក់ទំនងជាមួយចិនដែលជាមហាអំណាចសេដ្ឋកិច្ចទី២ ក្នុងលោក ការដោះដូរពាណិជ្ជកម្មរវាងទីក្រុងរីយ៉ាដ និងប៉េកាំងជារៀងរាល់ឆ្នាំមានទឹកប្រាក់មិនតិចជាង ៦៥ ០០លានអឺរ៉ូទេ។ ចិនជាប្រទេសដែលបានទិញប្រេងពីអារ៉ាប៊ីសាអូឌីតច្រើនជាងគេក្នុងលោក ហើយថ្មីៗនេះ ចិន និងអារ៉ាប៊ីសាអូឌីតបានបើកសម្ពោធរួមគ្នានូវស្ថានីយ៍បូមប្រេងមួយដែលភាគីទាំងពីរបានចាត់ទុកជានិមិត្តិរូបនៃវត្តមានសេដ្ឋកិច្ចចិននៅតំបន់មជ្ឈិមបូព៌ា។ នៅក្នុងដំណើរទស្សនកិច្ចរបស់ស្តេចអារ៉ាប៊ីសាអូឌីតពេលនេះ ស្តេចសាលម៉ានសង្ឃឹមទទួលបានការបោះទុនវិនិយោគបន្ថែមរបស់ចិននៅអារ៉ាប៊ីសាអូឌីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ