ទីក្រុងប៉េកាំងការពារប្រេងឥន្ធនៈនិងឧស្ម័នចេញពីតំបន់ឈូងសមុទ្រពែរ្ស
ចុះផ្សាយនៅថ្ងៃ៖
ស្តាប់ - ០៤:០៧
នាឱកាសបំពេញទស្សនកិច្ចនៅក្នុងប្រទេសអារ៉ាប់ចំនួនបីប្រទេសនៃតំបន់ឈូង សមុទ្រពែរ្ស នាយករដ្ឋមន្ត្រីចិនលោក Wen Jiabao បានធ្វើយុត្តិកម្មបញ្ជាក់បង្ហាញឲ្យឃើញពីទំនាក់ទំនង “ប្រក្រតី” រវាងប្រទេសចិននិងប្រទេសអ៊ីរ៉ង់។
ការពង្រឹងដាក់ទណ្ឌកម្មនិងសម្ពាធទៅលើប្រទេសអ៊ីរ៉ង់ដោយប្រទេសលោកខាងលិច ហើយនិងការគំរាមបិទច្រកសមុទ្រ Ormuz ដោយទីក្រុងតេហេរ៉ង់ បានធ្វើឲ្យគេចាប់អារម្មណ៍យ៉ាងខ្លាំងទៅលើដំណើរទស្សនកិច្ចរបស់លោកនាយករដ្ឋមន្ត្រីចិន Wen Jiabao ចំនួន៦ថ្ងៃនៅក្នុងប្រទេសអារ៉ាប់ចំនួនបីប្រទេសនៃតំបន់ឈូងសមុទ្រពែរ្ស។ ហើយនៅពេលទន្ទឹមគ្នានេះ សហរដ្ឋអាមេរិកក៏កំពុងខិតខំជំរុញឲ្យប្រទេសអាស៊ីសំខាន់ៗជាច្រើនដែលជាអតិថិជនទិញប្រេងកាតពីប្រទេសអ៊ីរ៉ង់ ឲ្យងាកទៅរកទិញប្រេងកាតនៅប្រទេសដទៃទៀត ដើម្បីជួយបង្កើននិងពង្រឹងសម្ពាធដាក់ទៅលើរបបគ្រប់គ្រងអ៊ីរ៉ង់បច្ចុប្បន្ន។
នៅទីក្រុងដូហា រដ្ឋធានីនៃប្រទេសកាតារដែលលោកនាយករដ្ឋមន្ត្រីចិន Wen Jiabao បានអញ្ជើញទៅដល់នៅថ្ងៃពុធទី១៨មករា ក្រោយពីបានបំពេញទស្សនកិច្ចនៅប្រទេសអារ៉ាប៊ីសាអ៊ូឌីត និងប្រទេសអារ៉ាប់រួម លោកនាយករដ្ឋមន្ត្រីចិនបានថ្លែងប្រាប់ឲ្យដឹងថា “ប្រទេសចិនចង់ឲ្យមានការបើកចំហនិងមានដំណើរចេញចូលនៅតាមច្រកសមុទ្រ Ormuz ទីក្រុងប៉េកាំងប្រឆាំងទល់នឹងរាល់ទង្វើរបស់ក្រុមអ្នកជ្រុលនិយម។ ច្រកសមុទ្រ Ormuz គឺជាផ្លូវសមុទ្រយុទ្ធសាស្ត្រមួយដ៏សំខាន់”។
ទន្ទឹមនឹងការទាមទារឲ្យមានការរិះរកដំណោះស្រាយឲ្យបញ្ហានុយក្លេអ៊ែរអ៊ីរ៉ង់ដោយសន្តិវិធី ប្រទេសចិនបានថ្លែងប្រាប់ថា “គេនៅរក្សាទំនាក់ទំនងពាណិជ្ជកម្ម “ប្រក្រតី” ជាមួយទីក្រុងតេហេរ៉ង់ ហើយទីក្រុងប៉េកាំងបញ្ជាក់ទៀតថា គេត្រូវតែរក្សានិងដាក់ទំនាក់ទំនងនេះឲ្យឋិតនៅក្រោមកិច្ចការពារ”។ ប្រទេសអ៊ីរ៉ង់ជាអ្នកផ្តល់ប្រេងកាតប្រមាណ១០%នៃតម្រូវការរបស់ប្រទេសចិន ឋិតនៅពីក្រោយប្រទេសអង់ហ្គោឡា និងប្រទេសអារ៉ាប៊ីសាអ៊ូឌីត។
គួរកត់សម្គាល់ថា បញ្ហាអ៊ីរ៉ង់នេះបានត្រូវទីក្រុងប៉េកាំងលើកយកមកពិនិត្យមើលនៅមុនពេលលោកនាយករដ្ឋមន្ត្រីចិន Wen Jiabao ចេញដំណើរទៅបំពេញទស្សនកិច្ចនៅប្រទេសនៃតំបន់ឈូងសមុទ្រពែរ្ស ដោយលោកនាយករដ្ឋមន្ត្រីចិនបានទទួលជួបពិភាក្សាជាមួយលោករដ្ឋមន្ត្រីក្រសួងហិរញ្ញវត្ថុអាមេរិក Timothy Geithner នៅថ្ងៃទី១១មករា នៅក្នុងក្របខណ្ឌនៃការវាយលុកអាមេរិកាំង ជំរុញឲ្យប្រទេសចិនធ្វើសហការជាមួយសហរដ្ឋអាមេរិក ដើម្បីដាក់ទណ្ឌកម្មទៅលើប្រទេសអ៊ីរ៉ង់។ ក៏ប៉ុន្តែ ទីក្រុងប៉េកាំងបានបដិសេធប្រឆាំងពុំយល់ស្របតាមសហរដ្ឋអាមេរិកឡើយ។
ក្រោយពីទស្សនកិច្ចរបស់លោករដ្ឋមន្ត្រីក្រសួងហិរញ្ញវត្ថុអាមេរិក Timothy Geithner ក្រុមហ៊ុនចិនដ៏សំខាន់មួយឈ្មោះ Zhuhai Zhenrong បានត្រូវឋិតនៅក្រោមទណ្ឌកម្មរបស់ស.រ.អា. ដោយហេតុតែក្រុមហ៊ុនចិននេះមានទំនាក់ទំនងពាណិជ្ជកម្មជាមួយទីក្រុងតេហេរ៉ង់។ ទាំងនេះបានត្រូវអ្នកនាំពាក្យនៃក្រសួងការបរទេសចិនថ្លែងតវ៉ាថា “ជាការពុំសមរម្យ ខុសផ្ទុយពីសេចក្តីសម្រេចចិត្តរបស់ក្រុមប្រឹក្សាសន្តិសុខនៃអង្គការសហប្រជាជាតិ”។
គួរបញ្ជាក់ថា ដំណើរទស្សនកិច្ចរបស់លោកនាយករដ្ឋមន្ត្រីចិន Wen Jiabao ចំនួន៦ថ្ងៃនៅក្នុងប្រទេសអារ៉ាប់ចំនួនបីប្រទេសនៃតំបន់ឈូងពែរ្ស គឺជាយុទ្ធសាស្ត្ររបស់ចិនដើម្បីស្វែងរកប្រទេសផលិតប្រេងកាតដទៃទៀតសម្រាប់ផ្គត់ផ្គង់តម្រូវការប្រេងឥន្ធនៈនិងឧស្ម័នរបស់ប្រទេសចិន ហើយវាក៏ជាការឆ្លើយដោយ “មិនចំពោះ”មួយដែររបស់ទីក្រុងប៉េកាំងតបតទៅនឹងសំណើរបស់ស.រ.អា.។
ម្យ៉ាងទៀត ទីក្រុងប៉េកាំងក៏ចង់ខិតខំពង្រឹងពង្រីកទំនាក់ទំនងរបស់ខ្លួនជាមួយប្រទេសអារ៉ាប់នៃតំបន់ឈូងសមុទ្រពែរ្ស។ ហេតុដូច្នេះហើយ បានជាលោកនាយករដ្ឋមន្ត្រីចិន Wen Jiabao បានថ្លែងជំរុញឲ្យពន្លឿនកិច្ចចរចាដើម្បីសម្រេចឲ្យបាននូវកិច្ចព្រមព្រៀងដោះដូរពាណិជ្ជកម្មសេរីជាមួយប្រទេសនៃក្រុមប្រឹក្សាសហប្រតិបត្តិការនៃឈូងសមុទ្រពែរ្ស។
សូមបញ្ជាក់ថា បច្ចុប្បន្ននេះនៅប្រទេសឌូបៃគេឃើញមានប្រជាជនចិនប្រមាណ២០០ ០០០នាក់រស់នៅ។ ហើយនៅថ្ងៃអង្គារកន្លងទៅនេះ លោកនាយករដ្ឋមន្ត្រីចិន Wen Jiabao បានថ្លែងថា “ការបើកឲ្យមានមាគ៌ាសូត្រថ្មីមួយ Nouvelle Route de la Soie គឺពិតជាការពង្រឹងពង្រីកមាគ៌ាសហប្រតិបត្តិការរវាងប្រជាជនចិននិងប្រជាជនអារ៉ាប់ ហើយវាក៏ជាមាគ៌ាពោរពេញទៅដោយការទុកចិត្តគ្នាទៅវិញទៅមកក្នុងវិស័យនយោបាយ ពាណិជ្ជកម្មហើយនិងសាមគ្គីធម៌ដើម្បីជួយគ្នាទៅវិញទៅមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ