ប៉ាគីស្ថានធ្វើជំរឿនប្រជាជន ក្រោយមានភាពយឺតយ៉ាវ១០ឆ្នាំ
អាជ្ញាធរប៉ាគីស្ថានរៀបចំធ្វើជំរឿនប្រជាជនទូទាំងប្រទេស ជាកិច្ចការដែលជួបភាពយឺតយ៉ាវ១០ឆ្នាំមកហើយ។ ជំរឿននេះនឹងធ្វើចាប់ពីថ្ងៃពុធខានស្អែកនេះទៅ។ យោងតាមអង្គការសហប្រជាជាតិ ប៉ាគីស្ថានស្ថិតក្នុងលំដាប់ទី៦ នៃប្រទេសមានប្រជាជនច្រើន ជាងគេ ក្នុងពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
ការរៀបចំធ្វើជំរឿនប្រជាជននៅប៉ាគីស្ថាន មានភាពយឺតយ៉ាវ ដល់ទៅ១០ឆ្នាំ ព្រោះថា តាមរដ្ឋធម្មនុញ្ញប៉ាគីស្ថាន ជំរឿនប្រជាជនត្រូវធ្វើរៀងរាល់១០ឆ្នាំម្តង។ ជំរឿនចុងក្រោយបំផុត គឺធ្វើតាំងពីឆ្នាំ១៩៩៨ ម្ល៉េះ ពោលគឺ១៩ឆ្នាំហើយ។ ជំរឿនឆ្នាំ១៩៩៨ បង្ហាញថា ប្រជាជន មាន១៣៤លាន៧សែននាក់។
ថ្ងៃពុធខានស្អែកនេះ ការិយាល័យជំរឿននឹងពង្រាយមន្ត្រីជិត១សែន២ម៉ឺននាក់ អោយចុះទៅតាមផ្ទះប្រជាជន។ ទាហានប៉ាគីស្ថាន២សែននាក់ក៏ចូលរួមសង្កេតការណ៍ជំរឿននេះដែរ តែក្នុងលក្ខណៈអព្យាក្រឹត។ ជំរឿនប្រជាជន នឹងធ្វើអោយគេបានដឹងពីសហគមន៍អ្នកកាន់សាសនាភាគតិចដូចជាអ្នកកាន់សាសនាហិណ្ឌូ រឺគ្រិស្តសាសនា។ គេរំពឹងថា អ្នកកាន់សាសនាភាគតិចហិណ្ឌូមានពី២លាន៥សែននាក់ ទៅ៤លាន៥សែននាក់។ ហើយអ្នកកាន់សាសនាគ្រិស្តវិញ អាចមានពី២លានទៅជាង១០លាននាក់។ ជាលើកទី១ដែរ ជំរឿននៅប៉ាគីស្ថាននឹងរាប់បញ្ចូលមនុស្សភេទទី៣។
ដោយឡែក មានការបារម្ភទាក់ទងនឹង វត្តមានជនភៀសខ្លួនជនជាតិអាហ្វហ្កានីស្ថាន មានដល់ទៅ២លាននាក់ ក្នុងប្រទេស។ ដោយសារការផ្តល់បណ្ណសំគាល់ខ្លួនមានភាពយឺតយ៉ាវ គេអាចច្រលំជនជាតិអាហ្វហ្កានីស្ថានទាំងនេះ ជាមួយប្រជាជនក្នុងស្រុក។ បក្សកាន់អំណាចនៅក្រុងការ៉ាឈី ធ្លាប់បានទាមទារអោយលើកពេលធ្វើជំរឿនទៀតផង ដោយរង់ចាំអោយជនភៀសខ្លួនចាកចេញពីប៉ាគីស្ថាន។
មួយឆ្នាំមុនការបោះឆ្នោតសភា ជំរឿនប្រជាជននៅប៉ាគីស្ថាននេះមិនបានធ្វើអោយអ្នកនយោបាយប៉ាគីស្ថានសប្បាយចិត្តទេ ព្រោះថា តាមរយៈជំរឿននេះ គេអាចវាយតម្លៃពីអំណាចនយោបាយ អាចប៉ាន់ស្មានចំនួនអ្នក តំណាងរាស្ត្រ តាមបក្សនយោបាយ តាមតំបន់បាន។ ជាក់ស្តែង នៅតំបន់ពិនចាប់ ភាគកណ្តាល ដែលជាតំបន់របស់បក្សកាន់អំណាច កំណើនប្រជាជនមិនសូវជាស្ទុះឡើងប៉ុន្មានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ