ទោះរងការរិះគន់ យន្តហោះដ្រូនអាមេរិកនៅតែបាញ់សម្លាប់មនុស្សនៅប៉ាគីស្ថាន
យន្តហោះដ្រូន គ្មានមនុស្សបើករបស់អាមេរិក នៅថ្ងៃព្រហស្បតិ៍ម្សិលមិញ បានបាញ់សម្លាប់មនុស្សពីរនាក់ នៅភាគពាយ័ព្យនៃប្រទេសប៉ាគីស្ថាន។ ក្នុងអាណត្តិលោកដូណាល់ ត្រាំ នេះជាលើកទី ១ដែល យន្តហោះដ្រូនអាមេរិកចេញធ្វើប្រតិបត្តិការ និងសម្លាប់មនុស្ស នៅក្នុងទឹកដី ប៉ាគីស្ថាន។
ចុះផ្សាយនៅថ្ងៃ៖
តាមមន្រ្តីប៉ាគីស្ថាន ដែលដកស្រង់សំដីដោយទីភ្នាក់ងារ ព័ត៌មានបារាំង AFP យន្តហោះដ្រូនអាមេរិកធ្វើដំណើរមកពីទឹកដីអាហ្វហ្កានីស្ថាន បានបាញ់សំដៅម៉ូតូមួយគ្រឿង នៅក្នុងតំបន់កុលសម្ព័ន្ធប៉ាគីស្ថាន ដែលស្ថិតនៅជាប់ព្រំដែនជាមួយអាហ្វហ្កានីស្ថាន។ មន្រ្តីមូលដ្ឋានបានបញ្ជាក់ថា មនុស្សពីរនាក់ដែលស្លាប់នៅក្នុងការវាយប្រហាររបស់យន្តហោះដ្រូនអាមេរិក គឺជាជនប្រដាប់អាវុធ ដែលគេនៅមិនទាន់អាចបញ្ជាក់អត្តសញ្ញាណបាននៅឡើយ។
តាមមន្រ្តីប៉ាគីស្ថាន នៅក្រោយការបាញ់ប្រហារទៅលើយុទ្ធជន ក្នុងទឹកដីប៉ាគីស្ថាន យន្តហោះដ្រូនអាមេរិកបានហោះត្រលប់ទៅទឹកដីអាហ្វហ្កានីស្ថានវិញ នៅថ្ងៃព្រហស្បតិ៍។ នៅក្នុងរដ្ឋបាលដូណាល់ ត្រាំ នេះជាលើកទី១ ដែលយន្តហោះដ្រូន អាមេរិក ចេញធ្វើប្រតិបត្តិការ ក្នុងទឹកដីប៉ាគីស្ថាន។ ប្រជាជនប៉ាគីស្ថានបានប្រឆាំង រិះគន់ខ្លាំងណាស់ ប្រតិបត្តិការរបស់យន្តហោះដ្រូន ដែលគេចាត់ទុកថា បានរំលោភដែនអធិបតេយ្យភាពរបស់ប៉ាគីស្ថាន។ ផ្ទុយទៅវិញ ឯកសារដែលបែកលេចធ្លាយទៅដល់ដៃអ្នកកាសែត បានបង្ហាញ ឲ្យឃើញថា ទីក្រុងអ៊ីស្លាម៉ាបាត បានលួចលាក់ ចុះកិច្ចព្រមព្រៀង ទីក្រុងវ៉ាស៊ីនតោន ដើម្បីអនុញ្ញាតឲ្យយន្តហោះ ដ្រូន គ្មានមនុស្សបើករបស់អាមេរិក ធ្វើប្រតិបត្តិការយោធា ក្នុងទឹកដីប៉ាគីស្ថាន កន្លងមក។
យន្តហោះដ្រូនរបស់អាមេរិកធ្វើប្រតិបត្តិការដំបូងគេនៅប៉ាគីស្ថាន នៅឆ្នាំ ២០០៤ នៅក្រោមអាណត្តិរបស់ប៊ូស។ ប៉ុន្តែ គឺនៅក្នុងអាណត្តិលោកអូបាម៉ា ដែលយន្តហោះដ្រូន គ្មានមនុស្សបើក ធ្វើសកម្មភាពខ្លាំង ក្នុងទឹកដីប៉ាគីស្ថាន មុននឹងថយចុះមកវិញ នៅក្នុងអាណត្តិទី២ របស់លោកអូបាម៉ា។ ប្រតិបត្តិការចុងក្រោយរបស់យន្តហោះដ្រូនអាមេរិក នៅក្នុងទឹកដីប៉ាគីស្ថាន ធ្វើឡើងនៅខែ ឧសភា ឆ្នាំ ២០១៦ ដែលកាលណោះ អាមេរិកបានបាញ់សម្លាប់មេដឹកនាំតាលីបង់ មូឡា អាក់តា ម៉ានសួរ។
ប្រតិបត្តិការបាញ់សម្លាប់មនុស្ស ដោយយន្តហោះដ្រូន បានបង្កឲ្យមានមតិតវ៉ា មិនថា ពីប្រជាជនប៉ាគីស្ថាន ហើយនិងអង្គការការពារសិទ្ធិមនុស្ស។ នៅឆ្នាំ ២០១៣ អង្គការAmnesty International បាននិយាយថា ដោយប្រើយន្តហោះដ្រូន បាញ់សម្លាប់មនុស្សក្រៅផ្លូវច្បាប់ អាមេរិកអាចប្រឈមនឹងការចោទប្រកាន់ប្រព្រឹត្តបទឧក្រិដ្ឋកម្មសង្រ្គាម។
ការវាយប្រហារដោយប្រើយន្តហោះដ្រូន ក្នុងទឹកដីប៉ាគីស្ថាន នៅថ្ងៃព្រហស្បតិ៍ អាចសបញ្ជាក់ឲ្យឃើញពីជំហរនយោបាយរបស់លោកដូណាល់ ត្រាំ សម្រាប់ប៉ាគីស្ថាន ប្រទេសមហាអំណាចនុយក្លេអ៊ែរ និងដែលមានប្រជាជនច្រើនជាងគេទី ៦ ក្នុងពិភពលោក។ នៅខែធ្នូកន្លងទៅ នៅក្រោយកិច្ចសន្ទនាតាមទូរស័ព្ទ រវាងនាយករដ្ឋមន្រ្តីប៉ាគីស្ថាន និងដូណាល់ ត្រាំ មន្រ្តីក្រសួងការបរទេសប៉ាគីស្ថានបានរៀបរាប់ថា លោកដូណាល់ ត្រាំ បានសន្យាផ្តល់ជំនួយដល់ប៉ាគីស្ថាន ដែលលោក ដូណាល់ ត្រាំ អួតសរសើរថា ជាប្រទេសដ៏អស្ចារ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ