លោកដូណាល់ ត្រាំទាក់ទាញសម្ព័ន្ធមិត្តនៅ អាស៊ី ដើម្បីប្រឈមតទល់កូរ៉េខាងជើង
ចុះផ្សាយនៅថ្ងៃ៖
នៅថ្ងៃអាទិត្យទី ៣០មេសា ប្រធានាធិបតីអាមេរិកាំង លោកដូណាល់ ត្រាំ បាននិយាយទូរស័ព្ទអញ្ជើញប្រមុខដឹកនាំរដ្ឋាភិបាលថៃ សិង្ហបុរីឲ្យទៅធ្វើទស្សនកិច្ចនៅសេតវិមាន។ ពាក្យអញ្ជើញនេះធ្វើឡើង នៅមួយថ្ងៃក្រោយ លោកដូណាល់ ត្រាំបានបោះដៃ អញ្ជើញ ប្រធានាធិបតីហ្វីលីពីន លោកឌុយទែរទេ ឲ្យទៅថ្វើទស្សនកិច្ចនៅអាមេរិក។ ថ្នាក់ដឹកនាំអាស៊ី ដែលលោកដូណាល់ ត្រាំ អញ្ជើញ ឲ្យជួបនៅសេតវិមាន សុទ្ធតែជាអ្នកដែលអាមេរិក ក្នុងអាណត្តិរបស់លោកបារ៉ាក់ អូបាម៉ា រិះគន់ មិនរាប់រក ដោយសារតែនយោបាយផ្តាច់ការរបស់ពួកគេ។
កូរ៉េខាងជើង នៅថ្ងៃចន្ទទី ១ឧសភា បានគំរាមសាជាថ្មីម្តងទៀត ថា នឹងអាចធ្វើការបាញ់សាកល្បងអាវុធនុយក្លេអ៊ែរ នៅគ្រប់ពេលវេលា និងនៅទីកន្លែង ដែលកំណត់ដោយថ្នាក់ដឹកនាំកំពូល លោកគីម ជុងអ៊ុន។ តាមអ្នកនាំពាក្យរបស់ក្រសួងការបរទេសកូរ៉េខាងជើង ដែលដកស្រង់សំដីដោយទីភ្នាក់ងារព័ត៌មានរដ្ឋ KCNA កូរ៉េខាងជើងត្រៀមខ្លួន ដើម្បីឆ្លើយតបទៅគ្រប់ជម្រើសរបស់អាមេរិក។
នៅក្នុងបទសម្ភាសន៍ ជាមួយទូរទស្សន៍ អាមេរិក CBS នៅថ្ងៃអាទិត្យ ប្រធានាធិបតីអាមេរិក លោកដូណាល់ ត្រាំ បាននិយាយថា លោកនឹងមិនសប្បាយចិត្តទេ បើសិនកូរ៉េខាងជើងបាញ់សាកល្បងគ្រាប់បែកនុយក្លេអ៊ែរ។ លោកដូណាល់ ត្រាំបន្ថែមថា លោកក៏មិនជឿថា ប្រធានាធិបតីចិន លោកស៊ី ជីនពីង ដែលមនុស្សជាទីគោរពនោះ សប្បាយចិត្តនោះដែរ បើសិនកូរ៉េខាងជើងបាញ់សាកល្បងគ្រាប់បែកនុយក្លេអ៊ែរ។
នៅពេលអ្នកកាសែតសួរថា តើពាក្យមិនសប្បាយចិត្ត របស់លោកដូណាល់ ត្រាំ អាចមានន័យថា អាមេរិកនឹងអាចប្រើយុទ្ធសាស្រ្តយោធា លោកដូណាល់ ត្រាំបាននិយាយខ្លីថា លោកមិនដឹងទេ។ ប៉ុន្តែ លោកបានប្រាប់ឲ្យគេនៅរង់ចាំមើល នៅពេលឆាប់ៗខាងមុខ។
លោកដូណាល់ ត្រាំ បាននិយាយថា ជម្លោះដ៏ធំមួយជាមួយ កូរ៉េខាងជើងនឹងអាចផ្ទុះកើតឡើង ប៉ុន្តែ លោកមិនបានបង្ហើបឲ្យគេដឹងជាមុន ពីយុទ្ធសាស្រ្តយោធាដែលអាមេរិកប្រុងនឹងមាននោះទេ។ សម្រាប់លោកដូណាល់ ត្រាំ វាគឺល្បែងអុក ដែលគេត្រូវលាក់ពីយុទ្ធសាស្រ្ត មិនឲ្យសត្រូវដឹងជាមុនពីក្រឡាដែលគេត្រូវដើរ។ សត្រូវនោះ គឺលោកគីម ជុងអុន ដែលលោកដូណាល់ ត្រាំ បាននិយាយសរសើរ បែបចំអក ថា ជាក្មេងដែលឆ្លាតប្រកបដោយកលល្បិច។
នេះជាលើកទី១ ដែលគេឃើញ ប្រធានាធិបតី អាមេរិកនិយាយសរសើរមេដឹកនាំកូរ៉េខាងជើង។ តាមលោកដូណាល់ ត្រាំ គីម ជុងអ៊ុនបានចូលកាន់តំណែងជាប្រមុខដឹកនាំកូរ៉េខាងជើង តាំងពីនៅវ័យក្មេង អាយុប្រមាណ ២៦ ឬ២៧ឆ្នាំ។ លោកជឿថា មានមនុស្សច្រើនណាស់ ដែលនៅក្នុងនោះមានទាំងមាសាច់ថ្លៃ ឬមេទ័ពផ្សេងទៀត ចង់ផ្តួល ដណ្តើមអំណាច ប៉ុន្តែ គីម ជុងអ៊ុន នៅតែអាចឆ្លងកាត់ឧបសគ្គ ដើម្បីប្រមូលអំណាច ដឹកនាំកូរ៉េខាងជើង។
គេមិនដឹងច្បាស់ថា លោកដូណាល់ ត្រាំ ដែលនិយាយសរសើរលោកគីម ជុងអ៊ុន មានបំណងចង់បានអ្វីពិតប្រាកដនោះទេ។ ប៉ុន្តែ គេអាចជឿថា ប្រធានាធិបតីអាមេរិកអាច ធ្វើនយោបាយ ត្រជាក់ផង និងក្តៅផង ពោលគឺដើម្បីបន្ធូរបន្ថយស្ថានការណ៍នៅឧបទ្វីបកូរ៉េ គេមិនចេះតែគំរាមវាយប្រហារយោធានោះទេ។ តាមរយៈពាក្យសរសើរនេះ ជួនកាល មេដឹកនាំកូរ៉េខាងជើងអាចទន់ចិត្ត និងដូរចិត្តលែងបាញ់សាកល្បងនុយក្លេអ៊ែរ ដែលនឹងអាចធ្វើឲ្យលោកដូណាល់ត្រាំឈឺក្បាល ពិបាកដោះស្រាយ។
លោកដូណាល់ ត្រាំទូរស័ព្ទអញ្ជើញ មេដឹកនាំ ថៃ ហ្វីលីពីន និងសិង្ហបុរីឲ្យទៅធ្វើទស្សនកិច្ចនៅសេតវិមាន
ក្រៅតែពីកូរ៉េខាងត្បូង និងជប៉ុន អាមេរិកនៅត្រូវការជំនួយគាំទ្ររបស់សម្ព័ន្ធមិត្តអាស៊ីដទៃទៀត ជាពិសេស នៅក្នុងកាលៈទេសៈដែលស្ថានការណ៍ចុះអាក្រក់នៅកូរ៉េខាងជើង។ នេះបើតាមលោក Reince Priebus ប្រធានបុគ្គលិកនៅសេតវិមាន ដែលបន្ថែមថា លោកដូណាល់ ត្រាំចង់ជួបនាយករដ្ឋមន្រ្តីថៃ ប្រធានាធិបតីហ្វីលីពីន និងនាយករដ្ឋមន្រ្តីសិង្ហបុរី ព្រោះ អាមេរិកចង់បានការគាំទ្រពីប្រទេស នៅអាស៊ី ដើម្បីដាក់គំនាបទៅលើកូរ៉េខាងជើង តាំងក្នុងផ្នែកសេដ្ឋកិច្ច និងការទូត។
តាមអ្នកជំនាញ អាមេរិកធ្វើដូច្នេះ ដោយសារតែអាមេរិកមិនអាចពឹងតែទៅចិនតែមួយ ដើម្បីទប់ទល់នឹងការគំរាមកំហែងនុយក្លេអ៊ែររបស់កូរ៉េខាងជើងនោះទេ។ ថៃ និងសិង្ហបុរីជាដើមសុទ្ធតែជង្រុកហិរញ្ញវត្ថុ កន្លែងដោះដូរពាណិជ្ជកម្ម ដែលអាចដើរតួសំខាន់ក្នុងការដាក់គំនាប បិទច្រកដង្ហើមសេដ្ឋកិច្ចបន្ថែមទៀត ទៅលើកូរ៉េខាងជើង។
ថ្នាក់ដឹកនាំអាស៊ីដែលលោកដូណាល់ ត្រាំ អញ្ជើញ សុទ្ធតែជាអ្នកដែលកំពុងរងការរិះគន់ពីអន្តរជាតិ ក្នុងរឿងរំលោភសិទ្ធិមនុស្ស
នៅក្នុងអាណត្តិរបស់លោកបារ៉ាក់ អូបាម៉ា អាមេរិក និងថៃបានចាប់មានល្អក់កករនឹងគ្នា នៅពេលអាមេរិករិះគន់របបសឹកថៃ ដែលបានធ្វើរដ្ឋប្រហារទម្លាក់រដ្ឋាភិបាលប្រជាធិបតេយ្យ នៅឆ្នាំ ២០១៤។ វ៉ាស៊ីនតោនតែងតែរិះគន់ជាប់ជានិច្ចចំណាត់ការផ្តាច់ការរបស់របបសឹក ដែលបានចាប់ឃុំអ្នកដែលប្រឆាំងនឹងខ្លួន។ ខឹងនឹងការរិះគន់របស់អាមេរិក នាយករដ្ឋមន្រ្តីថៃ លោកបា្រយុទ្ធ ចាន់អូចា បានងាករេ ទៅចាប់ពង្រឹងចំណងជាមួយប្រទេសចិន តាមរយៈ ទស្សនកិច្ច ចុះកិច្ចព្រមព្រៀងដោះដូរសេដ្ឋកិច្ចនៅទីក្រុងប៉េកាំង នៅឆ្នាំ ២០១៤ ឆ្នាំធ្វើរដ្ឋប្រហារ។
ដោយសារតែខឹងនឹងអាមេរិកដែលរិះគន់វិធានការហិង្សា បង្រ្កាបក្រុមគ្រឿងញៀនប្រធានាធិបតីថ្មីរបស់ហ្វីលីពីន ឯណោះវិញ ក៏បែរខ្នងដាក់សម្ព័ន្ធមិត្តអាមេរិក ដើម្បីទៅចាប់ដៃជាមួយចិនដែរ។ ប្រធានាធិបតីហ្វីលីពីនលោកឌុយទែរតេ នៅបានប្រើពាក្យអសុរស ជេរប្រមាថ ប្រធានាធិបតីអាមេរិក លោកបារ៉ាក់ អូបាម៉ា ថា ជាកូនរបស់ស្រ្តីលក់ខ្លួនទៀត។
នៅពេលលោកដូណាល់ ត្រាំ ឈ្នះឆ្នោត ចូលកាន់តំណែងជាប្រធានាធិបតីអាមេរិក ទំព័របានបើកថ្មី។ នៅខែធ្នូ នៅមួយខែក្រោយជាប់ឆ្នោត លោកដូណាល់ ត្រាំ ធ្លាប់បានទូរស័ព្ទទៅកោតសរសើរ លោកប្រធានាធិបតីហ្វីលីពីន ឌុយទែរតេ ថា បានធ្វើល្អ ធ្វើត្រូវ ក្នុងសង្រ្គាមប្រឆាំងគ្រឿងញៀន។
តាមសេតវិមាន នៅក្នុងកិច្ចសន្ទនាតាមទូរស័ព្ទ នៅថ្ងៃសៅរ៍ លោកដូណាល់ ត្រាំ សប្បាយចិត្តនឹងនិយាយជាមួយលោកប្រធានាធិបតីហ្វីលីពីន ឌុយទែរតេ និងទន្ទឹងរង់ចាំចូលរួមក្នុងកិច្ចប្រជុំកំពូលអាស៊ាន អាមេរិក និងអាស៊ីខាងកើត ដែលត្រូវធ្វើនៅហ្វីលីពីននៅខែវិច្ឆិកាខាងមុខ។
ទោះកំពុងរងការរិះគន់ ពីអង្គការការពារសិទ្ធិមនុស្ស ថា បានបើកភ្លើងខៀវ ឲ្យសម្លាប់មនុស្សក្រៅផ្លូវច្បាប់ ប៉ុន្តែ លោកឌុយទែរតេនៅតែទទួលបានការសរសើរពីលោកដូណាល់ត្រាំ។ លោកនាយករដ្ឋមន្រ្តីថៃក៏ដូចគ្នាដែរ។ បានការអញ្ជើញឲ្យទៅជួបនៅសេតវិមានយ៉ាងដូច្នេះ គឺមានន័យថា អាមេរិករបស់លោកដូណាល់ ត្រាំ មិនប្រឆាំងនឹងនយោបាយរឹតបន្តឹង បិទសេរីភាពនៅប្រទេសថៃបច្ចុប្បន្ន ដូចដែលលោកអតីតប្រធានាធិបតីបារ៉ាក់អូបាម៉ាធ្លាប់ធ្វើនោះទេ។
នេះមិនមែនជាលើកទី១ទេ ដែលប្រធានាធិបតីអាមេរិកទទួលរាក់ទាក់ មេដឹកនាំប្រកបដោយចម្រូងចម្រាសនោះ។ លោកដូណាល់ ត្រាំ ទើបបានទូរស័ព្ទទៅអបអរប្រធានាធិបតីតួកគី លោកអ៊ែរដូហ្កាន ដែលបានឈ្នះឆ្នោត ទាមទារបានសម្រេចឲ្យគេកែប្រែរដ្ឋធម្មនុញ្ញ ដើម្បី បន្ថែមអំណាចប្រធានាធិបតីរបស់លោក នៅពាក់កណ្តាលខែមេសា។ នៅដើមខែនេះទៀត ប្រធានាធិបតីក៏ទើបទទួល ចាប់ដៃ មេដឹកនាំសឹក អេហ្ស៊ីប លោកស៊ីស៊ី ដែលល្បី ខាងបង្រកាប អ្នកប្រឆាំង នឹងខ្លួន។
នៅសេតវិមាន ប្រធានបុគ្គលិករបស់លោកដូណាល់ត្រាំ បាននិយាយសម្រាលថា លោកដូណាល់ ត្រាំ អញ្ជើញ ប្រមុខដឹកនាំអាស៊ី ដូចជាថៃ ហ្វីលីពីន និងសិង្ហបុរី ទៅសេតវិមាន ដើម្បីនិយាយតែពីរឿងកូរ៉េខាងជើងតែមួយមុខប៉ុណ្ណោះ គឺគ្មានលើកកិត្តិយស មេដឹកនាំណាមួយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ