សហរដ្ឋអាមេរិករួមដៃជាមួយអង្គការសហប្រជាជាតិសង្គ្រោះសមុទ្ទ
មួយសប្តាហ៍ក្រោយពីបានប្រកាសដកខ្លួនចេញពីកិច្ចព្រមព្រៀងក្រុងប៉ារីស ស្តីអំពីអាកាសធាតុ សហគមន៍អន្តរជាតិក្រោមម្លប់អង្គការសហប្រជាជាតិ បានបើកសន្និសីទអន្តរជាតិជាលើកទីមួយឧទ្ទិសដល់មហាសមុទ្ទ។ បើតាមអង្គសន្និសីទដែលទើបសម័យប្រជុំរបស់ខ្លួនរយៈពេល៥ថ្ងៃពីថ្ងៃទី ៥-ដល់ថ្ងៃទី ៩ មិថុនា នៅទីក្រុងញូវយ៉ក ការឡើងកំដៅនៃភពផែនដី ការបំពុលបរិស្ថាន ជាការគំរាមកំហែងយ៉ាងធ្ងន់ធ្ងរចំពោះសមុទ្ទ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
លទ្ធផលនៃសន្និសីទលើកដំបូងនេះ បានប្រសូតចេញនូវសេចក្តីសម្រេចមួយ ដែលរំលឹកអំពីភាពចាំបាច់នៃការគោរពកិច្ចព្រមព្រៀងប៉ារីស និងដែលបានគូសបញ្ជាក់អំពីផលប៉ះពាល់នៃការប្រែប្រួលអាកាសធាតុចំពោះ សមុទ្ទ។
សមុទ្ទ លាតសន្ធឹងប្រមាណ៧១%នៃផ្ទៃភពផែនដី កំពុងធ្លាក់ដុនដាបខ្លាំងណាស់ ! នេះគឺដោយសារតែពិភពលោកភាវូបនីកម្ម ការបំពុលបរិស្ថាន នេសាទជ្រុល និងការឡើងកំដៅនៃភពផែនដី។ សមុទ្ទមានតួនាទីសំខាន់ណាស់ក្នុងប្រព័ន្ធអេកូឡូហ្ស៊ី ពាក់កណ្តាលនៃខ្សល់អុកស៊ីហ្សែន ដែលមនុស្សត្រូវការស្រូបជារៀងរាល់ថ្ងៃ ផលិតដោយមហាសមុទ្ទ ហើយសមុទ្ទក៏ជាអ្នកស្រូបយកមកវិញនូវមួយភាគបីនៃឧស្ម័នផ្ទះកញ្ចក់។ ប៉ុន្តែពេលនេះ សមុទ្ទកំពុងមានជំងឺ ! បើតាមរបាយការណ៍របស់អង្គការសហប្រជាជាតិ ប្រសិនបើគ្មានវិធានការទេ នោះនៅឆ្នាំ២០៥០ នៅក្នុងសមុទ្ទ នឹងមានផ្លាស្ទិកច្រើនជាងត្រី !
ដើម្បីថែរក្សាសម្ព័ន្ធភាពជាមួយមិត្តធម្មជាតិមួយនេះ ទល់នឹងការប្រែប្រួលអាកាសធាតុ សមាជិកអង្គការសហប្រជាជាតិទាំង១៩៣ប្រទេសបានអនុម័តចេញជាសេចក្តីសម្រេចដើម្បីធ្វើសកម្មភាព។ រដ្ឋាភិបាលនៃប្រទេសហត្ថលេខីទាំងអស់ បានសន្យាកាត់បន្ថយការប្រើប្រាស់បា្លស្ទិក និងចាត់វិធានការទប់ស្កាត់ការបំពុល ការបន្សាបសមុទ្ទ ព្រមទាំងទប់ស្កាត់ផលប៉ះពាល់ដល់សមុទ្ទបង្កឡើងដោយការឡើងកម្តៅនៃភពផែនដី។
ប៉ុន្តែសេចក្តីអំពាវនាវនេះ ដែលគូសបញ្ជាក់អំពីភាពបន្ទាន់នៃការសង្គ្រោះសមុទ្ទ គ្មានតម្លៃជាការចាប់បង្ខំឱ្យគោរព។ គ្រាន់តែថា សេចក្តីសម្រេចធ្វើសកម្មភាពនេះ បានទទួលការគាំទ្រពេញទំហឹងពីសហរដ្ឋអាមេរិក។ ថ្វីបើប្រធានាធិបតីបានប្រកាសដកខ្លួនចេញពីកិច្ចព្រមព្រៀងអាកាសធាតុក្រុងប៉ារីសមែន តែនាឱកាសសន្និសីទអន្តរជាតិស្តីពីសមុទ្ទនេះ សហរដ្ឋអាមេរិកបានធានាអះអាងប្រាប់សហគមន៍អន្តរជាតិថានឹងបន្តការពារសមុទ្ទ ជាមួយគ្រប់ភាគីទាំងអស់ ទាំងស្ថាប័នក្នុងនិងក្រៅក្របខ័ណ្ឌអង្គការសហប្រជាជាតិ ស្របតាមការអំពាវនាវរបស់សន្និសីទ។ រដ្ឋផ្សេងៗរបស់សហរដ្ឋអាមេរិក ព្រមទាំងសង្គមស៊ីវិល បានបង្ហាញឆន្ទៈការពារបរិស្ថានជាងរដ្ឋាភិបាល ដោយបង្ហោះពាក្យស្លោក "ធ្វើគ្រប់យ៉ាងដើម្បីសមុទ្ទស្អាត"៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ