ហេតុអ្វីបានជាចិន និងឥណ្ឌាដំឡើងសសៃកដាក់គ្នា នៅពេលនេះ?
ចុះផ្សាយនៅថ្ងៃ៖
សង្រ្គាមពាក្យសំដីបានផ្ទុះឡើងរវាងចិននិង ឥណ្ឌា ដែលបានចោទគ្នាទៅវិញ ទៅមក ថាជាអ្នករំលោភដែនអធិបតេយ្យភាព និងគំរាមកំហែងសន្តិសុខជាតិ។ ចិន និងឥណ្ឌាបានតានតឹងនឹងគ្នា បន្ទាប់ពីកងទ័ពឥណ្ឌាបានចូលទៅរារាំងសកម្មភាពសាងសង់ផ្លូវរបស់ចិន នៅលើតំបន់ជួរភ្នំហិមាល័យ។ ឥណ្ឌាអះអាងថា ខ្លួនចូលធ្វើអន្តរាគមន៍ ទៅតាមការស្នើសុំរបស់រដ្ឋាភិបាលប៊ូតង់ ដែលប្រឆាំងនឹងការសាងសង់របស់ចិន នៅតំបន់ជម្លោះជាប់ព្រំដែន។ ប៉ុន្តែ អ្នកនាំពាក្យរបស់ក្រសួងការពារជាតិចិនវិញ បានហៅសកម្មភាពរបស់ឆ្មាំព្រំដែនឥណ្ឌា ថាជាការរំលោភយ៉ាងធ្ងន់ធ្ងរទៅលើអធិបតេយ្យរបស់ចិន និងរំលោភទៅលើច្បាប់អន្តរជាតិ។
ចិន នៅដើមសប្តាហ៍នេះ ព្រមានបង្កើនវត្តមានកងទ័ព នៅតាមបណ្តោយព្រំដែនដីគោក ចិន និងឥណ្ឌា។ ចិនបានដំឡើងសំឡេង ក្នុងរឿងព្រំដែន ដោយសារតែចិនមិនពេញចិត្តនឹងឥណ្ឌា ដែលចាប់តាំងពីពាក់កណ្តាលខែមិថុនាមក បានបញ្ជូនឆ្មាំព្រំដែនឲ្យចូលទៅរារាំង បិទខ្ទប់សកម្មភាពសាងសង់ផ្លូវរបស់ចិន នៅលើជំរាលភ្នំហិមាល័យ។
កន្លែងដែលចិនបញ្ជូនគ្រឿងចក្រទៅសាងសង់ផ្លូវស្ថិតនៅក្នុងតំបន់ខ្ពង់រាប Doklam នៃជួរភ្នំហិមាល័យ។ តំបន់ Doklam ជាកន្លែងប្រទាញប្រទង់ ដែលចិន កំពុងឈ្លោះដណ្តើមទាមទារជាមួយ រាជាណាចក្រប៊ូតង់ដែលបានចេញ រួចហើយ សេចក្តីថ្លែងការណ៍ផ្លូវការប្រឆាំងនឹងចំណាត់ការឯកតោភាគីរបស់ចិន។ សម្រាប់ប៊ូតង់ រាជាណាចក្រដែលមានប្រជាជនតិចជាង ១លាននាក់ សកម្មភាពសាងសង់របស់ចិនកំពុងរំលោភដែនអធិបតេយ្យភាពរបស់ប៊ូតង់ និងរំលោភ លើកិច្ចព្រមព្រៀងឆ្នាំ ២០១២ដែលចិន ប៊ូតង់ និងឥណ្ឌាបានចុះរួមគ្នា។
សម្រាប់អ្នកនាំពាក្យរបស់ក្រសួងការបរទេសចិន តំបន់ Doklam ជាទឹកដីចិនតាំងពីបុរាណមក គឺមិនមែនរបស់ប៊ូតង់ ហើយវារឹតតែមិនមែនរបស់ឥណ្ឌាទៅទៀត។ ជាការពិត ចិន និងឥណ្ឌាតានតឹងនឹងគ្នា មិនមែនដោយសារព្រំដែនរវាងប្រទេសទាំងពីរនោះទេ។ សួរថា ចិនសាងសង់ផ្លូវលើទឹកដីជម្លោះរវាងចិន និងប៊ូតង់សោះ ហេតុអ្វីបានជាឥណ្ឌាលូកដៃអន្តរាគម រហូតបញ្ជូនទ័ពទៅរារាំងការងារសាងសង់ផ្លូវរបស់ចិនទៅវិញ?
ភាគីឥណ្ឌាធ្លាប់បានបកស្រាយថា ខ្លួនបានទទួលសំណើសុំអន្តរាគមន៍ពីរាជាណាចក្រប៊ូតង់ ដែលពឹងអាស្រ័យទាំងអាស្រុងលើកងទ័ពឥណ្ឌា សម្រាប់ទប់ទល់នឹងមហាអំណាចចិន។ បើមើលនៅផែនទី គេអាចឃើញថា ឥណ្ឌាពិតជាទៅរំលោភចូលក្នុងដែនដីចិន ដែលកំពុងជាប់ជម្លោះជាមួយប៊ូតង់មែន គឺគ្មានទាក់ទងសូម្បីបន្តិចនឹងទឹកដីឥណ្ឌានោះទេ។ ប៉ុន្តែ បើគេពិនិត្យពិច័យឲ្យបានស៊ីជម្រៅ តំបន់ Doklamដែលចិនកំពុងបញ្ជូនគ្រឿងសាងសង់សន្ធឹកសន្ធាប់ ស្ថិតនៅមិនឆ្ងាយប៉ុន្មានពីច្រករបៀង ដ៏ក្រីក្រមួយរបស់ឥណ្ឌា។ ច្រករបៀងនេះដើរតួសំខាន់ណាស់ ព្រោះវាជាខ្សែផ្លូវតែមួយ ដែលតភ្ជាប់រវាងរដ្ឋចំនួន ៧ នៅប៉ែកឦសាន ឥណ្ឌា ទៅនឹងទឹកដីកណ្តាលរបស់ឥណ្ឌា។ បើសិនចិនលេបយកបានសម្រេច ទឹកដី Doklamពីប្រទេសប៊ូតង់ នោះឥណ្ឌាឈ្វេងយល់ថា ចិននឹងបន្តលេបយកបន្តទៀត ច្រករបៀងរបស់ឥណ្ឌា ដែលនឹងអាចធ្វើឲ្យទឹកដីខាងកើតឥណ្ឌា ត្រូវពុះចែកចេញជាពីរចំរៀក។
សម្រាប់អ្នកជំនាញឥណ្ឌា ដោយបញ្ជូនគ្រឿងចក្រទៅសាងសង់ក្នុងតំបន់ជម្លោះទឹកដី ជាមួយប៊ូតង់ ចិនចង់សាកល្បង តេស្តមើលប្រតិកម្មរបស់ឥណ្ឌា ដែលជាសម្ព័ន្ធមិត្តរបស់ប៊ូតង់។ ឥណ្ឌាវិញយល់ថា ខ្លួនត្រូវតែលូកដៃ អន្តរាគមន៍ នៅពេលនេះ ពោលគឺត្រូវធ្វើរបងនៅមុនក្របីបាត់ ព្រោះឥណ្ឌា ឃើញយល់ហើយថាចិន ធ្លាប់បាននយោបាយវាតទី ទឹកដីនេះ នៅសមុទ្រចិនខាងត្បូង នៅពេលដែលប្រទេសតូចៗ ដូចជាវៀតណាម ហ្វីលីពីន គ្មានកម្លាំងយោធា ប្រឆាំងតបត នឹងចិន។
មហាយក្សអាស៊ីទាំងពីរដែលមានព្រំដែនដីគោករួមគ្នា ជាង ៣៥០០គីឡូម៉ែត្រ នៅតែប្រទាញប្រទង់ ដណ្តើមទឹកដីគ្នា ជាច្រើនកន្លែង នៅតាមព្រំដែន។ ទំនាក់ទំនងរវាងប្រទេសជិតខាងទាំងពីរ កម្រនឹងល្អរលូនណាស់។ ឥណ្ឌា មិនពេញចិត្តទេ ដែលចិនផ្គត់ផ្គង់ ឧបត្ថម្ភ សាងសង់ហេដ្ឋារចនាសម្ព័ន្ធ នៅតំបន់ជម្លោះកាស្មៀ ដែលគ្រប់គ្រងដោយប៉ាគីស្ថាន។ ចិនវិញ ក៏អាក់អន់ចិត្តណាស់ដែរ ដែលឥណ្ឌា បដិសេធមិនចូលរួមក្នុងនយោបាយសាងសង់ផ្លូវសេដ្ឋកិច្ចខ្សែក្រវ៉ាត់មួយ ផ្លូវមួយ របស់ចិន។
ការប្រឈមមុខដាក់គ្នា រវាង ឥណ្ឌា និងចិន លើកនេះ ធ្វើឲ្យគេនឹកទៅដល់សង្រ្គាម បង្ហូរឈាម មួយប្រាវ រវាងមហាយក្សអាស៊ី ទាំងពីរនៅឆ្នាំ ១៩៦២។ នៅក្នុងការប្រឈមមុខដាក់គ្នាលើកនេះ សង្រ្គាមបង្ហូរឈាមដាក់គ្នា ទំនងមិនអាចកើតឡើង ដូចមុន ប៉ុន្តែ ភាពតានតឹងទំនងនឹងមិនអាចថមថយ ចុះវិញនោះទេ ព្រោះភាគីទាំងពីរ ម្ខាងៗ សុទ្ធតែចង់រក្សា មុខមាត់រៀងៗខ្លួន។ គេសង្ឃឹមថា វិបត្តិចិន និងឥណ្ឌាលើកនេះ នឹងអាចរកច្រកចេញ នៅក្នុងកិច្ចប្រជុំថ្នាក់រដ្ឋមន្រ្តីសន្តិសុខ ដែលរៀបចំ ឡើង នៅថ្ងៃព្រហស្បតិ៍ ស្អែក នៅទីក្រុងប៉េកាំង នៅក្នុងក្របខ័ណ្ឌ កិច្ចប្រជុំសន្តិសុខរបស់ក្រុមប្រទេសដែលកំពុងមានសេដ្ឋកិច្ចរីកលូតលាស់ថ្មី Brics ដែលមានចិន រុស្ស៊ី ឥណ្ឌា ប្រេស៊ីល និងអាហ្វ្រិកខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ