ឥណ្ឌា និងចិនប្រកាន់យកត្រូវរៀងខ្លួន ក្នុងរឿងជម្លោះព្រំដែនដីគោក
ឥណ្ឌា នៅថ្ងៃព្រហស្បតិ៍ម្សិលមិញ បានអះអាងថា ខ្លួនបានទទួលការគាំទ្រពីអន្តរជាតិ នៅក្នុងរឿងបញ្ជូនទ័ពទៅខ្ទប់រារាំងសកម្មភាពសាងសង់ផ្លូវ ដែលចិនកំពុងធ្វើនៅលើខ្ពង់រាបដែលតវ៉ាទាមទារដោយប្រទេសប៊ូតង់។ តាមរដ្ឋមន្រ្តីការបរទេសឥណ្ឌា សន្តិសុខជាតិរបស់ឥណ្ឌានឹងត្រូវគំរាមកំហែង ប្រសិនបើចិន រំលោភ ចូលកាន់កាប់តំបន់ត្រីកោណ ដែលស្ថិតនៅចន្លោះ ប្រទេសប៊ូតង់ ឥណ្ឌា និងចិន។
ចុះផ្សាយនៅថ្ងៃ៖
នៅមុខសមាជិកសភាជាន់ទាបរបស់ឥណ្ឌា នៅថ្ងៃព្រហស្បតិ៍ម្សិលមិញ រដ្ឋមន្រ្តីការបរទេសឥណ្ឌា លោកស្រី ស៊ូស្ហម៉ា ស្វារ៉ាយ បាននិយាយថា ជំហររបស់ឥណ្ឌា នៅក្នុងជម្លោះព្រំដែនជាមួយប្រទេសចិន ត្រូវបានទទួលការគាំទ្រពីសំណាក់អន្តរជាតិ។ ប៉ុន្តែ ប្រមុខការបរទេសឥណ្ឌាមិនបានបញ្ជាក់ឈ្មោះប្រទេស ដែលបានគាំទ្រឥណ្ឌានោះទេ។ លោកស្រីស្វារ៉ាយ គ្រាន់តែបានលើកសរសើរដល់សេចក្តីក្លាហានរបស់ប្រទេសប៊ូតង់ ដែលបានចាត់វិធានការឆ្លើយតបយ៉ាងទាន់ហន់ និងមិនចុះចាញ់ប្រទេសយក្ស ជិតខាង ដូចជាចិន។
រដ្ឋមន្រ្តីការបរទេសឥណ្ឌាចេញមុខបញ្ជាក់ នៅថ្ងៃព្រហស្បតិ៍ ពីការគាំទ្ររបស់អន្តរជាតិ បន្ទាប់ពីភាគីចិន អះអាងរួចហើយថា ចិនបានទទួលការគាំទ្រពីអន្តរជាតិ នៅក្នុងរឿងជម្លោះព្រំដែនជាមួយឥណ្ឌាលើកនេះ។ នៅថ្ងៃអង្គារ ទីក្រុងប៉េកាំងបានសំដែងការរន្ធត់ចិត្ត ដែលឃើញ កងទ័ពឥណ្ឌាចូល ដោយខុសច្បាប់ ទៅក្នុងតំបន់ជាប់ព្រំដែនចិន និងប្រទេសប៊ូតង់។
ចិន និងឥណ្ឌា ដែលនៅជាប់មានជម្លោះព្រំដែន ដ៏រ៉ាំរ៉ៃ បានប្រឈមមុខដាក់គ្នា សាជាថ្មី បន្ទាប់ពីកងទ័ពឥណ្ឌា កាលពីខែមិថុនា កន្លងទៅ បានចូលទៅរារាំងសកម្មភាពសាងសង់ផ្លូវថ្នល់របស់ចិន នៅតាមព្រំដែនចិន ជាមួយប្រទេសប៊ូតង់។ ទីក្រុងញូវដេលី ជឿថា ដោយបញ្ជូនសម្ភារៈ និងគ្រឿងយន្តទៅសង់ផ្លូវ នៅលើខ្ពង់រាប ដែលចិន កំពុងជាប់មានជម្លោះជាមួយប៊ូតង់ ចិនកំពុងគ្រោង សំដៅផងដែរ តំបន់ត្រីកោណ ដែលមានជាប់ព្រំដែនរវាងប្រទេសទាំងបី គឺឥណ្ឌា ចិន និងប៊ូតង់។
ប៊ូតង់ដែលជាកូនប្រទេសដ៏តូចមួយ ស្ថិតនៅចន្លោះចិន និងឥណ្ឌា បានតវ៉ា ជំទាស់ និងចាត់ទុកសកម្មភាព សាងសង់ផ្លូវរបស់ចិន ថា ជាការរំលោភដោយផ្ទាល់ទៅលើកិច្ចព្រមព្រៀងដែលចិនបានចុះកន្លងមកជាមួយប្រទេសប៊ូតង់។ ប៊ូតង់ដែលគ្មានទំនាក់ទំនងការទូតជាមួយប្រទេសចិន ជាសម្ព័ន្ធមិត្ត គាំទ្រ ផ្តាច់មុខដោយរដ្ឋាភិបាលឥណ្ឌា។
រដ្ឋាភិបាលប៉េកាំងធ្លាប់បានទាមទារឲ្យ កងទ័ពឥណ្ឌា ដកចេញពីតំបន់ជម្លោះ ដែលតាមពិតទៅស្ថិតនៅឆ្ងាយខ្លាំងណាស់ ពីរដ្ឋ Sikkim របស់ឥណ្ឌា។ សូមបញ្ជាក់ថា ចិន និងឥណ្ឌា មហាយក្សអាស៊ី ដែលប្រជែងដណ្តើមឥទ្ធិពលគ្នានៅក្នុងតំបន់ នៅបន្ត ជាប់មានជម្លោះព្រំដែននឹងគ្នា និងធ្លាប់បានវាយប្រយុទ្ធគ្នាម្តង នៅឆ្នាំ ១៩៦២ ដើម្បី ដណ្តើមទឹកដី នៅតំបន់ភ្នំហិម៉ាល័យា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ