តុលាការប៉ាគីស្ថាន៖លោក Pervez Musharraf ជាជនជាប់ចោទតែម្នាក់គត់នៅក្នុងឃាតកម្មសម្លាប់លោកស្រី Benazir Bhutto
នៅក្នុងប្រទេសប៉ាគីស្ថាន តុលាការទើបបានចេញសាលក្រមលើកទី១ នាថ្ងៃព្រហស្បតិ៍ ទី៣១ សីហាស្តីពីឃាតកម្មសម្លាប់លោកស្រីអតីតនាយករដ្ឋមន្រ្តី Benazir Bhutto កាលពីឆ្នាំ ២០០៧។ នៅក្នុងសាលក្រមនោះ តុលាការបានសម្រេចដោះលែងជនជាប់សង្ស័យចំនួន ៥នាក់ និងបានតម្កល់ទុកលោកអតីតប្រធានាធិបតី ឧត្តមសេនីយ Pervez Musharraf ដែលកំពុងភៀសខ្លួននៅក្រៅប្រទេសជាជនជាប់ចោទតែម្នាក់គត់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ក្រៅពីតម្កល់ទុកលោកPervez Musharraf ជាជនជាប់ចោទតែម្នាក់គត់នៅក្នុងឃាតកម្មសម្លាប់លោកស្រី Benazir Bhutto តុលាការក៏បានតម្រូវឲ្យមានការរឹបអូសលុយកាក់ និងទ្រព្យសម្បត្តិទាំងអស់របស់លោក Musharraf ផងដែរ។ សូមជម្រាបជូនថា អតីតប្រធានាធិបតី ឧត្តមសេនីយរូបនេះត្រូវបានតុលាការចោទប្រកាន់ក្នុងឆ្នាំ ២០១៣ ពីបទសម្លាប់លោកស្រី Bhutto ហើយបានចាកចេញពីប្រទេសក្នុងខែមីនា ឆ្នាំ ២០១៦ ដើម្បីព្យាបាលជម្ងឺនៅក្នុងប្រទេសអេមីរ៉ាអារ៉ាប់រួមដោយសន្យាត្រឡប់មកឆ្លើយនឹងតុលាការក្នុងបទចោទប្រកាន់នោះ។ តែមកទល់ពេលនេះ លោក Musharraf បន្តគេចខ្លួនដោយមិនបានវិលចូលស្រុកដូចពាក្យសន្យាទេ។
ដោយឡែក តុលាការបានសម្រេចដោះលែងជនសង្ស័យចំនួន ៥នាក់ បន្ទាប់ពីបានឃុំឃាំងពួកគេអស់រយៈពេលជាង ៩ឆ្នាំ ពោលតាំងពីក្រោយថ្ងៃឃាតកម្មសម្លាប់លោកស្រី Benazir Bhutto ក្នុងថ្ងៃទី២៧ ធ្នូ ឆ្នាំ ២០០៧។ ជាប់ឆ្នោតចំនួនពីរដងជានាយករដ្ឋមន្រ្តី លោកស្រី Bhutto គឺជាស្រ្តីទី១ ក្នុងសហសម័យដែលបានដឹកនាំប្រទេសកាន់សាសនាអ៊ីស្លាមមួយដូចប៉ាគីស្ថាន។ តែជាអកុសល លោកស្រីដែលកំពុងថ្លែងនៅក្នុងអង្គមេន្ទិញមួយត្រូវបានឃាតករបាញ់ចំ ក រួចទាញបំផ្ទុះគ្រាប់ជាប់នឹងខ្លួនគេបណ្តាលឲ្យលោកស្រីស្លាប់នឹងកន្លែង រួមទាំងមនុស្ស ២៤នាក់ផ្សេងទៀត។
ក្នុងឆ្នាំ ២០១០ អង្គការសហប្រជាជាតិបានចេញរបាយការណ៍មួយដោយចោទរដ្ឋាភិបាលរបស់លោក Musharraf ពេលនោះពីបទមិនបានផ្តល់សុវត្ថិភាព និងសន្តិសុខគ្រប់គ្រាន់ដើម្បីការពារលោកស្រី Bhutto។ តែលោក Musharraf តែងបដិសេធ និងថា លោកមិនមែនជាអ្នករៀបចំផែនការសម្លាប់លោកស្រី Bhutto ដែលរហូតបង្កឲ្យមានភាពអនាធិបតេយ្យពេញប្រទេសនោះឡើយ និងបានទម្លាក់កំហុសនេះដាក់ប្រមុខតាលីបង់ប៉ាគីស្ថានជំនាន់នោះឈ្មោះ Baitullah Mehsud។
យ៉ាងណាក៏ដោយ លោកស្រី Zardari ដែលជាកូនស្រីរបស់លោកស្រី Bhutto បានបញ្ចេញប្រតិកម្មនឹងសាលក្រមរបស់តុលាការថា បើលោក Musharraf នៅមិនបានចូលខ្លួនឆ្លើយបំភ្លឺនឹងបទឧក្រិដ្ឋរបស់ខ្លួនទេ នោះនឹងគ្មានយុត្តិធម៌សម្រាប់ម្តាយរបស់លោកស្រីឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ